Read Batak Dairi 1 Musa 17 Bible Online

1 Musa 17 - Batak Dairi bible

1 Musa 17

¹Tikan merumur sibahpuluh sibah tahun si Abram, ipacidah JAHOWA mo dirina tabasa ninganna idokken, “Aku ngo Dèbata Pergegoh Sisotercodi. Uèi mo Aku janah dak ulaken mo lemmo atèngKu.

²Kubaing mo padanku dekket kono janah kuberèken bamu pinempar mbuè kalohon.”

³Nai tangkep mo si Abram mersembah, nai nina Dèbata mo,

⁴“En mo padanKu siKupadanken dekket kono: Kupadanken bamu, ukum kono gabè empung ni kalak mbuè bangsa ngo. Kerna i oda nè si Abram gerarmu tapi si Abraham mo.

⁶Kuberèken pè bamu mbuè pinempar, janah mèduk ngo bai kalak i nai gabè raja. Lahlah kalohon mo pinemparmu nai gabè merbangsa-bangsa ngo kalak i.

⁷Kupesaut ngo padanKu i bamu dekket bai pinemparmu turun-tumurun janah hot ngo padan i oda mosè. Aku mo gabè Dèbatamu dekket Dèbata ni pemparenmu.

⁸Kuberèken pè bamu dekket bai pemparenmu tanoh èn, siniianenmu bagèndari bagè kalak ginemgem. Karina tanoh Kanaan gabè milik pinemparmu soh mi amman sumendah, janah Aku mo gabè Dèbata kalak i.”

⁹Nina Dèbata dèng ma taba si Abram, “Kono pè kennah setia ngo mi padan èn, bagi soh mi pemparenmu turun-tumurun.

¹⁰Ko dekket karina pinemparmu anak laki kennah mertakkil ngo.

¹¹Mulai bagèndari nai, kennah itakkil kono ngo gennep anak simerumur ualuh ari, bagi dekket hamba situbuh i undung-undungmu barang pè sinitokormu. Mertakkil imo pertandaen padanKu dekket kono.

¹³Gennep jelma kennah itakkil, imo pertandaen sitaridah, magahken hot ngo padanKu dekket kono i oda mosir-osir.

¹⁴Barang isè anak laki siso itakkil oda nè ètongen bangsangKu kerna oda ièngèt padan i.”

¹⁵Nai nina Dèbata mo taba si Abraham, “Ulang nè mo dokken gerar sinibagesmu si Sarai, tapi mulai bagèndari si Sara mo.

¹⁶Naing Kupasu-pasu mo ia asa itubuhken sada anak bamu. Uè naing Kupasu-pasu mo si Sara, janah gabè inang mbuè bangsa. Ibas pemparenna nai mèduk ngo gabè raja.”

¹⁷Nai mersembah mo si Abram, tapi tertaba ngo ia ninganna merpikir, “Bakunè mo sada anak laki sienggo merumur seratus tahun terolih anak? Bakunè mo si Sara sienggo merumur sibahpuluh tahun tubuh-tubuhen?”

¹⁸Nai idokken mo taba Dèbata, “Sellohen mo pellin si Ismael gabè warisku.”

¹⁹Tapi nina Dèbata mo, “Oda ngo bagi. Naing menubuhken anak mo sinibagesmu si Sara janah baing mo gerarna si Isak. Dak setia ngo Aku mi padanKu dekket soh mi pinemparna soh mi amman sumendah. Hot ngo padan i oda mosir-osir.

²⁰Tapi Kuuèi ma ngo pengidoenmu tersèngèt si Ismael. Kumernaken i, Kupasu-pasu mo ia janah mbuè mo pinemparna. Gabè empung sipuluh dua marga mo ia, janah Kubaing mo pinemparna gabè sada bangsa mbellen.

²¹Tapi Kubaing mo padan dekket si Isak, anakmu sinaing itubuhken si Sara, tahun siroh kira-kira bagèen tong katikana.”

²²Enggo kessa idokken bagi, itadingken Dèbata mo si Abraham.

²³Sidarinkenna i ma iuèi si Abraham ngo nidokken Dèbata, itakkil mo anakna si Ismael dekket karina daholi silot i bagesna dekket hambana situbuh i bagesna bang sinitokorna pè.

²⁴Merumur sibahpuluh sibah tahun mo si Abraham tikan mertakkil ia,

²⁵janah merumur sipuluh tellu tahun mo anakna si Ismael.

²⁶Rebbak mersunat mo kalak i,

²⁷rebbak dekket hambana bak naposo si Abraham.