Read Batak Dairi 1 Musa 18 Bible Online

1 Musa 18 - Batak Dairi bible

1 Musa 18

¹Ipacidah JAHOWA mo dirina taba si Abraham imo i gembar kayu keramat bekkas mersembah i Mamre. Tikanna i nggara kalohon ngo ari janah kundul-kundul ngo si Abraham i babah pèntu undung-undungna.

²Tikan ipedorgak takalna, idah mo tellu kalak cènder i lebbèna. Mèter lojang mo si Abraham naing menimbaki kalak i. Ninganna mersembah

³nina mo, “Kènè alè tuan, singgah mo kènè lebbè mi sapongku, ulang pellin lausi kènè sambing; paduè kènè mo asa kukebbasi lebbè kènè.

⁴Kualeng lebbè laè asa lot morih nèhè ndènè. Mengadi mo lebbè kènè i terruh kayu èn.

⁵Asa kukebbasi lebbè situk pangaen merorohken mpeddasna, asa lot gegoh ndènè menerrusken perdalanen ndènè. Enggo ipesangap kènè naposo ndènè èn, mula singgah kènè.” Ialoi kalak i mo, “Lias atè kumarna mendè pemaingmi. Singgah pè kami.”

⁶Mèter ibengketti si Abraham mo undung-undungna janah nina taba si Sara, “Kettu mo, buat mo bagèndari nditak simendèna, janah bahan mo roti cengko.”

⁷Nai lojang mo ia mi bekkas pulung pinakanna, ipilih mo anak lembu singgomok janah toko kessa pangaen, iberèken mo taba naposona asa ndor ikebbasi.

⁸Kessa i ibuat si Abraham mo susu, dadih dekket gulè sienggo iroroh i, nai ihantari mo taba tamuèna i. Si Abraham ngo mengkebasi kalak i mangan i terruh kayu i.

⁹Nai mengkuso mo kalak i, “Idikè ngo si Sara sinibagesmu i?” Ialoi si Abraham mo, “Ibagasen undung-undung adoi ngo.”

¹⁰Nina sada kalak bai kalak idi nai mo, “Sibah bulan nai molih nola ngo Aku. Jadi tikanna i menubuhken anak mo si Sara sinibagesmu i.” Sinderrang bagidi, idengkohken si Sara ngo rana i ibalik pèntu nai, kan podi tamuè i.

¹¹Ukum si Abraham dekket si Sara, enggo mo tua-tua, janah si Sara enggo mo saib ladang.

¹²Kumernaken i, ncilmang mo atè si Sara ibas ukurna janah idokken, “Aku sienggo tua-tua janah tading rokihen èn, bakunè mo ndorok lot nè dukakku? Sinibalèngku pè enggo ma ngo tua-tua.”

¹³Nai ikuso JAHOWA mo si Abraham, “Kasa tertaba si Sara janah ragu, tah ndorok ia menubuhken anak tikan tua-tua?

¹⁴Kadè pana siso ndorok ibaing JAHOWA? Bagè sienggo Kudokken ndai, sibah bulan nai balik mo Aku mi sèn. Tikanna i menubuhken anak mo si Sara.”

¹⁵Karna mbiar si Sara, iperso mo, nina, “Oda tertaba aku.” Tapi ialoi JAHOWA mo, “Tertaba ngo kono ndai.”

¹⁶Enggo kessa i berkat mo tamuèna sitellu kalak i itaruhken si Abraham. Nai soh mo kalak i mi sada bekkas, janah i sidi nai tertatap ngo Sodom.

¹⁷Nina JAHOWA mo ibagasen ukurna, “Oda ngo uè Aku merboni-boni taba si Abraham èn kadè sinaing Kubakin.

¹⁸Otang gabè bangsa mbellen ngo pinemparna janah merkuasa? Otang kumarnaken ia gabè Kupasu-pasu karina bangsa ni tanoh èn?

¹⁹Enggo Kupilih ia asa iperèntah dukak-dukakna dekket pinemparna asa iuèi Aku janah mengulaken simerandal janah adil. Mula iulaken kalak i ngo i, saut mo Kubaing karina sienggo Kujanjiken i.”

²⁰Nai idokken JAHOWA mo taba si Abraham, “Lot ngo asung tersèngèt Sodom dekket Gomora mberrat kalohon, janah enggo mo mbelgah kalohon dosana i.

²¹Kerna i ngo asa susur Aku lako mi sidi lako menengen tah tuhu ngo karina asung siKudengkoh i barang oda.”

²²Nai dua kalak tamuè i berkat lako mi Sodom, tapi ukum JAHOWA tading dèng ngo rebbak dekket si Abraham.

²³Ijolmiti si Abraham mo JAHOWA, ikusoken mo, “Tuhu ngo naing iripasken kono alè JAHOWA kalak siso mersalah rebbak dekket kalak simersalah?

²⁴Mula lot limapuluh kalak siso mersalah i kuta i, karinana kuta i ngo iripasken kono alè JAHOWA? Oda ngo uè ko alè JAHOWA mengampuni i, asa maluah silimapuluh kalak i?

²⁵Ulang mo ibunuh kalak siso mersalah i rebbak dekket kalak simersalah. Ulang mo alè JAHOWA. Mula ilaluken kono ngo alè JAHOWA, gabè terhukum mo kalak siso mersalah rebbak dekket kalak simersalah. Oda mèter siso adil nola ibakinken perhukum dunia ènda.”

²⁶Nina JAHOWA mo, “Ukum lot dapet Aku limapuluh kalak siso mersalah i Sodom, Kuampuni ngo karina kuta i kumernaken kalak i.”

²⁷Nina si Abraham nola mo, “Ampuni mo aku alè Jahowa kumerna pang aku mengudut pengeranaen èn. Jelma ngo aku, janah oda lot hakku lako mendokken barang kadè pè.

²⁸Tapi tah bakunè lot empatpuluh lima kalak siso mersalah, tapi oda limapuluh kalak. Mada ngo gabè iripasken kono alè Jahowa karina kuta i, kumernaken lima kalak selisihna?” Idokken JAHOWA mo, “Oda Kuripasken kuta i, mula dapet Aku lot empatpuluh lima kalak siso mersalah.”

²⁹Nina si Abraham nola, “Bakunè, mula pellin empatpuluh kalak?” Ialoi JAHOWA mo, “Kumernaken siempatpuluh kalak i Kusondati ngo takingKu.”

³⁰Nina si Abraham nola, “Ulang kono melaga alè Jahowa mula mengerana dèng aku. Bakunè mula lot pellin tellupuluh kalak?” Ialoi JAHOWA mo, “Mula jumpa Aku tellupuluh kalak Kusondati mo takingKu.”

³¹Idokken si Abraham mo, “Ampuni mo aku alè Jahowa kumarna pang aku mengudut pengeranaen èn. Mula pellin duapuluh kalak sambing mo kessa?” Ialoi JAHOWA mo, “Mula lot dapet Aku duapuluh kalak oda Kuripasken kuta i.”

³²Perpodi nina si Abraham mo, “Ulang ko melaga alè Jahowa, pellin sikali nai mo aku mongkam. Bakunè, mula terdapet pellin sipuluh kalak sambing?” Nina JAHOWA mo, “Mula lot sipuluh kalak oda Mersalah, oda Kuripasken kuta i.”

³³Enggo kessa dung mengeranai dekket si Abraham, laus mo JAHOWA, janah si Abraham molih mi bagesna.