Read Batak Dairi 1 Musa 2 Bible Online

1 Musa 2 - Batak Dairi bible

1 Musa 2

¹Nai pul mo enggo ihanaken karina suberri silot,

²I ari pepituken pul mo enggo ibakin JAHOWA ulanNa idi, nai mentadi mo Ia.

³Nai ipasu-pasu mo ari pepituken idi janah ibaing gabè ari simerkedekoen, kerna mentadi ngo Dèbata ibas ari i enggo kessa pul ibakin bahanNa.

⁴Bagi mo tersèngèt penempa Dèbata mi karinana silot. Sinderrang ijadiken Dèbata JAHOWA karinana silot,

⁵madèng ngo lot bennih simertunas janah madèng ngo lot suan-suanen i tanoh èn, kumarna madèng roh udan ibaing Dèbata, janah madèng lot jelma lako mengula tanoh i.

⁶Tapi ukum laè mulai mo meniir i terruh nai, gabè merlaè mo sisik tanoh i.

⁷Nai ibuat Dèbata JAHOWA mo situk tanoh, igana mo i gabè sada kalak jelma, nai isempulken mo kessah simerèken nggelluh mi ruang ègungna; nai nggelluh mo jelma i.

⁸Nai ibaing Dèbata JAHOWA mo pekken Eden, kan kebincaren, janah ibaing mo merian i sidi jelma sienggo nitempaNa i.

⁹Ipenturahken Dèbata JAHOWA mo karina matcam bagè kayu merandal, merbuahken buah merandal. I tengah pekken i turah mo kayu merèken nggelluh dekket kayu maing perbinettohen mendè dekket nggodo.

¹⁰Menjarir ngo sada laè i Eden nai, asa merlaè pekken i; janah i ruar Eden gabè bagi empat mo laè i.

¹¹Sada mergerar Pison, marir ngo laè i mengkulilingi tanoh Hawila.

¹²Mbuè ngo i sidi terdapet emmas tingtingen bagi dekket sibaungkus bak batu permata.

¹³Laè peduaken mergerar Gihon; laèna marir mengkulilingi tanoh Kus.

¹⁴Laè petelluken mergerar Tigris, marir mi kebincaren Assur. Laè peempatken mergerar Efrat.

¹⁵Nai ibaing Dèbata JAHOWA mo jelma i mi pekken Eden asa iula janah irajai pekken i.

¹⁶Nina Dèbata mo taba jelma i, “Ndorok ngo panganenmu karina ibas buah kayu ni pekken èn,

¹⁷tapi ukum buah kayu perbinettohen mendè dekket nggodo i oda ndorok ipangan kono; mula ipangan kono i, kennah matè ngo ko sidarinkenna i.”

¹⁸Nai nina Dèbata JAHOWA mo, “Oda selloh jelma i nggelluh punjung. Kubaing mo denganna mahan pengurupi bana.”

¹⁹Enggo pul ihanaken Dèbata i tanoh i nai mermatcam bagè binatang darat dekket manuk-manuk. Karinana i iarak Dèbata mendahi jelma i lako mengidah kadè gerarna ibakinken taba binatang-binatang i. Idi mo permulaen lot gerar binatang darat dekket simerkabeng i.

²⁰Bagi mo carana jelma i mahan gerar karina binatang darat dekket simerkabangen i. Tapi sada poda cocok i gabè denganna mahan pengurupina.

²¹Nai ibaing Dèbata JAHOWA mo jelma i meddem lènek kalohon. Tikan meddem i ia, iorot Dèbata JAHOWA mo sada rusukna janah idampelken nola suka mi pemuaten i.

²²Rusuk i mo ihanaken Dèbata gabè sada daberru, janah iarahken mendahi jelma i.

²³Nai nina jelma i mo, “En mo ia, kalak tosè bagè aku — tulan ibas tulanku nai, janah suka ibas sukangku nai. Kugerari mo ia daberru, kerna i daholi nai ngo ia ihanaken.”

²⁴I ngo memaingken asa itadingken anak laki partuana, asa rebbak ia dekket sinibagesna, nai gabè sada mo kalak i sidua.

²⁵Lubus ngo ukum anak laki bak daberru i, tapi oda lot perasaen mèla bai kalak i.