Read Batak Dairi 1 Musa 20 Bible Online

1 Musa 20 - Batak Dairi bible

1 Musa 20

¹Lompat mo si Abraham i Mamre nai mi selatan tanoh Kanaan, janah merian mo ia i kellang-kellang kuta Kadès dekket Sur. Daoh-daoh ariin, tikan merian i Gerar ia,

²iranaken mo ukum si Sara sinibagesna i, turangna ngo. Kerna i ipasulak si Abimelekh raja kalak Gerar mo pasulakkenna meraleng si Sara asa roh mendahisa.

³Tikan sada berngin ipacidah Dèbata mo dirina taba raja i merkitè nipi, mendokken, “Matè mo ko, kerna ibuat ko daberru i; ai enggo lot sinibalèna.”

⁴Tapi madèng ngo sempat ijamah si Abimelekh ukum si Sara, nai nina raja i mo, “Ialè Jahowa, oda ngo aku salah! Tah mada ngo iripasken kono alè Jahowa, aku dekket bangsangku?

⁵Si Abraham ngo mendokken bangku, turangna ngo nina daberru i, janah daberru i pè mendokken bagi ma ngo. Kubaing pè bagidi roh ipas pusuh peratèenku tutus nai ngo, jadi oda mersalah aku.”

⁶Nai ialoi Dèbata mo ibas nipi i, “Tuhu ngo i, Kubettoh ngo ibaing kono pè bagi roh ibas pusuh peratèenmu tutus nai ngo. Kerna i ngo asa Kugerra kono asa ulang merdosa ko bangKu, janah oda Kupaduè kono menjamah daberru idi.

⁷Tapi balikken mo ia bagèndari mendahi sinibalèna. Sada kalak nabi ngo sinibalèna, asa isodipken kono ulang matè. Tapi èngèt mo, mula oda ibalikken kono ia, kennah matè ngo ko dekket karina ginemgemmu.”

⁸Njengkas sibarembenkenna, idiloi si Abimelekh mo karina pugabèna, janah ibagahken mo karina simasa i. Gabè buradan kalohon mo kalak i.

⁹Kessa i, idilo si Abimelekh mo si Abraham janah ikusoken mo, “Kadè ngo enggo ibaing kono taba kami? Kadè ngo salah ku bamu, asa bagidi ibaing kono olpek taba diringku dekket kerajaenku? Situhuna, oda patut ibaing ko bagi taba aku.

¹⁰Kasa bagi ibaing kono?”

¹¹Ialoi si Abraham mo, “Dok atèngku, oda lot isèn kalak merkebiaren midah Dèbata, gabè ibunuh kalak simerkelleng atè midah sinibagesku nola mo aku.

¹²Janah ma, ukum ia tuhu ngo turangku. Sada bapa ngo kami, tapi sinama, nai jejap mo kami.

¹³Jadi tikan idokken Dèbata kutadingken bages bapangku, mengeranto mi nagerri ni dèba, kudokken ngo tabasa, ‘Tandana ngkelleng atèmu midah aku, kennah dokenkenmu taba barang isè sambing pè, turangmu aku.’ ”

¹⁴Kessa bagi, ibalikken si Abimelekh mo si Sara taba si Abraham, janah iberèken ma mo karangkenna i dèba hamba, biri-biri dekket lembu.

¹⁵Idokken raja i mo taba si Abraham, “En mo karina nagerringku; merian mo ko barang kan dikè dok atèmu.”

¹⁶Nina mo taba si Sara, “Enggo kuberèken taba turangmu seribu riar pirak mahan tanda betti taba jelma, magahken tuhu-tuhu ngo oda mersalah kono.”

¹⁷Gabè nggempus mo karina daberru i istana si Abimelekh, kumerna simasa bai si Sara i. Nai mersodip mo si Abraham taba Dèbata, gabè ipemalum Dèbata mo si Abimelekh, sinibagesna dekket naposona daberru, gabè ndorok mo menubuhken nola daberru-daberru i.