Read Batak Dairi 1 Musa 21 Bible Online

1 Musa 21 - Batak Dairi bible

1 Musa 21

¹Ipasu-pasu JAHOWA mo si Sara, bagè sienggo ijanjiken kin.

²Tikki sienggo ibuhul Dèbata, enggo kessa tua-tua si Abraham, mbadan mo si Sara nai itubuhken mo sada anak.

³Igerari si Abraham mo anak i si Isak;

⁴janah enggo kessa ualuh ari umur si Isak, itakkil si Abraham mo ia bagè sienggo idokken Dèbata.

⁵Merumur siratus tahun mo si Abraham tikan tubuh si Isak.

⁶Idokken si Sara, “Enggo tertaba aku ibaing Dèbata kerna lolongku. Karina kalak mendengkoh simasa èn tertaba bak lolo rebbak dekket aku.”

⁷Nai nina dèng ma, “Isè kin mo nè mendokken taba sinibalèngku, ndorok aku pesusuken dukak? Tapi enggo mo menubuhken dukak aku, tukasi pè enggo tua-tua kalohon sinibalèngku.”

⁸Makin mbelgah mo anak i, janah tikan mulai ia sirang susu merpèsta mo si Abraham rami kalohon.

⁹Tikan sidari, si Ismael imo anak si Abraham dekket si Hagar berru Mesir i, tupung kumiali dekket si Isak anak si Sara.

¹⁰Idah si Sara ngo i gabè idokken mo taba si Abraham, “Pelaus mo hamba daberru i rebbak dekket anakna. Oda ndorok anak daberru i menjalo perbagien ipas kinibèakmu nai sinaing iwarisi anakmu si Isak.”

¹¹Tapi oda ngo sennang si Abraham mendengkoh rana i, ai anakna ma ngo si Ismael pè.

¹²Tapi nina Dèbata mo taba si Abraham, “Ulang pella rintektekken kono tersèngèt hambamu si Hagar dekket anakna i. Uèi mo pendokken si Sara i, ai merkitè si Isak ngo pinemparmu siKujanjiken i.

¹³Bagi ma ngo bai anak si Hagar pè, Kuberèken ma ngo mbuè pinemparna asa gabè sada bangsa kalak i. Kerna anakmu ma ngo ia pè.”

¹⁴Siceggen sibarembenkenna, iberèken si Abraham mo bai si Hagar pangaen dekket sada tabu bebak sin laè, mahan bekkel i dalan. Iampèken mo anak i mi gurung si Hagar, nai idokken mo laus daberru i. Berkat mo si Hagar maot-aot i padang gurun Bersyeba.

¹⁵Kerri kessa mo laè bekkelna, igamparken si Hagar mo anakna i mi terruh rambah-rambah,

¹⁶nai kundul mo ia kira-kira seratus mèter i bekkas i nai. Nina mo ibagasen ukurna, “Oda tertengen aku matè anakku.” Nai tangis mo ia.

¹⁷Idengkoh Dèbata ngo sora si Ismael i, mongkam mo malaèkat Dèbata i langit nai taba si Hagar, nina mo, “Kadè iarsakken kono alè Hagar? Ulang ko mbiar. Enggo idengkoh Dèbata sora anakmu.

¹⁸Dahi mo anakmu, dokong janah orih-orihken mo ia. Kubaing pè pinemparna gabè bangsa mbellen.”

¹⁹Nai ipejengnger Dèbata mo penengen si Hagar, gabè idah mo sada telaga. Laus mo ia mi sidi, idomi laè mo tabu i, iberrè mo mènum anak i.

²⁰Idengani Dèbata ngo si Ismael. Makin mbellen mo anak i; merian i gurun pasir Paran ngo ia, janah gabè sada kalak perburu mahantu.

²¹Ipejejap inangna mo ia dekket sada kalak berru Mesir.

²²Tikanna i roh mo raja Abimelekh dekket si Pikhol pakalima soridaduna mendahi si Abraham janah mendokken, “Dak iurupi Dèbata ngo ko ipas karina ulanmu.

²³Kerna i, bulabanken mo bagèndari i sèn i hadeppen Dèbata, magahken oda uè ko maingken siso puna-puna taba aku, bang pè taba dukak-dukakku. Bagè aku sienggo maing mendè bamu, bagidi ma mo baing bangku dekket taba aur siniianenmu èn.”

²⁴Nina si Abraham mo, “Uè, kubulabanken mo i.”

²⁵Tapi isesalken si Abraham ngo tersèngèt sada telaga nirampasen hamba-hamba raja i.

²⁶Ialoi si Abimelekh mo, “Oda tahu aku, isè simaing bagidi. Oda nung ibagahken kono taba aku, èn dèng mo kudengkoh tersèngèt i.”

²⁷Nai iberèken si Abraham mo dèba biri-biri dekket lembu bai si Abimelekh, janah merbulaban mo kalak i sidua.

²⁸Ipejaè si Abraham pitu anak biri-birina,

²⁹janah ikusoken si Abimelekh mo mbangsa, “Kasa ibaing kono bagidi?”

³⁰Ialoi si Abraham mo, “Jalo mo sipitu anak biri-biri èn, mahan pertanda, magahken ipertuhu raja i aku ngo mengkurak telaga èn.”

³¹Kumarna i mo asa ibaing gerar bekkas i Bersyeba, karna i sidi ngo kalak i sidua merbulaban.

³²Enggo kessa merbulaban kalak idi i Bersyeba, balik mo si Abimelekh dekket si Pikhol mi nagerri kalak Palistin.

³³Nai isuan si Abraham mo sada kayu ara i Bersyeba janah mulai i sidi nai mo bekkas i ibaing gabè bekkas menembah JAHOWA, Dèbata simenettap i.

³⁴Kessa i, narih ndekkah ngo si Abraham merian i nagerri kalak Palistin.