Read Batak Dairi 1 Musa 22 Bible Online

1 Musa 22 - Batak Dairi bible

1 Musa 22

¹Daoh-daoh ariin nola, iunjun Dèbata mo kepercayaen si Abraham. Dilo-dilo mo Dèbata, “O, Abraham!” Nai ialoi si Abraham mo, “Kadè ngo alè Jahowa?”

²Nina Dèbata mo, “Laus mo kènè mi delleng Moria dekket si Isak, anakmu sisada i, kekelengen atèmi. I babo delleng sinaing Kutuduhken bamu i sidi, pèlèken mo anakmu i, mahan pèlèen situtungen bangKu.”

³Siceggen berembenkenna, itaka-taka si Abraham mo kayu mahan menutung pèlèen, ièkèti janah iampèken mi babo kalodèna. Berkat mo ia rebbakken dekket si Isak bak dua kalak naposona mi bekkas sinidokken JAHOWA bana.

⁴I ari petelluken itatap si Abraham mo bekkas i ndaoh dèng.

⁵Nai nina mo taba naposona sidua kalak i, “Tading mo kè i sèn dekket kalodè i. Ukum aku dekket anakku laus mo kami lebbè misadoi lako memèlè JAHOWA, mulak pè kami nahan mendahi kènè.”

⁶Iampèken si Abraham mo sebban i mi bara si Isak, janah ia merembah golok dekket api. Tikan rebbak merdalan kalak i,

⁷nina si Isak mo, “O Pa!” Ialoi si Abraham mo, “Kadè ngo alè anakku?” Mengkuso mo si Isak, “Enggo mo siembah api dekket sebban, tapi idikè ngo anak biri-biri sinaing sipèlèken mahan situtungen?”

⁸Ialoi si Abraham mo, “Dèbata ngo mèmaken anak biri-biri i,” Nai iterrusken kalak i mo merdalan.

⁹Soh kessa mo kalak i mi bekkas sinidokken JAHOWA taba si Abraham, ibahan mo sada langgaten janah isusun mo sebban i i babona. Nai ièkèt mo anakna i, iampèken mo mi langgaten i, i babo sebban i.

¹⁰Kessa i ibuat mo golokna lako menèat anakna i.

¹¹Tapi dilo-dilo mo malaèkat JAHOWA i langit nai, “O Abraham, Abraham.” Ialoi si Abraham mo, “Kadè alè Jahowa!”

¹²“Ulang sèat anakmu, janah ulang ikekadè ko ia.” Nina JAHOWA mo merkitè malaèkatna i. “Bagèndari enggo Kubettoh ipesangap janah iuèi kono ngo Aku, kerna oda ijua ko merèken anakmu sisada-sada i bangKu.”

¹³Nai tumulih mo si Abraham janah idah mo sada biri-biri tonggal tersangkut tandukna i rambah-rambah i. Itangkup si Abraham mo biri-biri i, ipèlèken mo bai JAHOWA, mahan pèlèen situtungen singkat anakna i.

¹⁴Igerari si Abraham mo bekkas i, “Ipèmaken JAHOWA ngo siniperluken”. Janah soh bagèndari ngo idokken dèba “I delleng JAHOWA ipepada ngo siniperluken”.

¹⁵Idiloken malaèkat JAHOWA mo sikali nai taba si Abraham,

¹⁶“Nina JAHOWA: Merbulaban ngo Aku merkitè gerarKu, kerna enggo ibaing kono bagi janah oda ijua ko merèken anakmu sada-sada i bangKu,

¹⁷mertinèncuk mo pasu-pasungKu bamu, janah pinemparmu bagè buè bintang i langit janah bagè buè kersik i biding laut. Italuken pinemparmu ngo musuhna.

¹⁸Karina bangsa i tanoh èn mengido taba Aku, asa Kupasu-pasu kalak i tosè bagè pasu-pasungKu bai pinemparmu — kumarna iuèi ko katangKu.”

¹⁹Kessa i balik mo si Abraham mendahi naposona sidua kalak i, nai rebbakken mo kalak i laus mi Bersyeba, janah merian i sidi mo si Abraham.

²⁰Lot ngo kaka si Abraham mergerar si Nahor. Enggo kessa simasa i delleng Moria, idengkoh si Abraham mo berita, ukum si Mika, sinibages si Nahor enggo ualuh anakna, imo:

²¹Si Us, imo situaen, si Bus, anggina, si Kemuel, imo gabè empung kalak Aram,

²²Si Kesed, si Hazo, si Pildas, si Jidlaf, dekket si Betuel,

²³imo gabè bapa si Rebekka.

²⁴Lot dèng ma ngo siterbuang si Nahor mergerar si Reuma, itubuhken mo si Tebah, si Gaham, Tahas dekket si Maakha.