Read Batak Dairi 1 Musa 23 Bible Online

1 Musa 23 - Batak Dairi bible

1 Musa 23

¹Enggo kessa merumur 127 tahun si Sara,

²matè mo ia i Hebron i tanoh Kanaan. Bonek ngo si Abraham janah itangisi permatè sinibagesna i.

³Nai itadingken mo lebbè bangkè sinibagesna i, laus mo ia mendahi kalak Het, simengiani aur i. Nina mo,

⁴“Kalak siroh ngo aku merian i tengah-tengah ndènè; duè kènè mo kutokor sinterpuk tanoh, asa ndorok kukubur sinibageski.”

⁵Ialoi kalak i mo,

⁶“Kuhormati kami ngo kono èkuten merkuasa i tengah-tengah nami, jadi kubur mo sinibagesmi mi perkuburen simerandalna kalohon silot i kuta nami. Lolo ngo kami, merèken tanoh perkuburen bekkas sinibagesmu i.”

⁷Nai sujud mo si Abraham i hadeppen kalak i,

⁸ninganna idokken, “Mula toko ngo atè ndènè i sèn kukubur sinibagesku i, urupi kènè mo aku midoken taba si Efron, anak si Zoar,

⁹asa uè ia mendèaken bangku liang Makhpela nibiding jumana. I sèn mo nemmu idèa tanoh i isaksiken kènè. Luas pè kugarar hargana asa gabè milikku tanoh i.”

¹⁰Rebbak kundul ngo si Efron dekket kalak Het i i bekkas perpulungen i pèntu pengkeruhen. Nai ialoi mo ninganna isaksiken karina jelma silot i sidi,

¹¹“Bangsangku mo gabè saksi magahken, enggo kuberèken jumangku i dekket liangna i bamu, asa i sidi ikubur kono sinibagesmu.”

¹²Nai sujud mo si Abraham i hadeppen kalak Het i,

¹³janah idengkoh karina jelma i, idokken mo taba si Efron, “Kupido bamu, asa dengkohken lebbè ranangku. Dok atèngku kutokor mo karina juma i. Jalo mo tokorna, asa kukubur sinibagesku i mi sidi.”

¹⁴Ialoi si Efron mo,

¹⁵“Sinterpuk juma, pellin empat ratus kèpèng pirak ngo hargana kadè mo artina i banta sidua? Kuburken mo sinibagesmu i mi si.”

¹⁶Iuèi si Abraham ngo harga i. Ibilang mo riar nasa buè sinidokken si Efron i, imo empat ratus kèpèng pirak, bagè timbangen sinipakkè saudagar. Igarar mo taba si Efron isaksiken karina kalak Het i.

¹⁷Bagi mo carana juma si Efron sini Makhpela kan kebincaren Mamre, gabè milik si Abraham. Imo karina juma dekket liangna bak karina kayu bak suan-suanna, bagi dekket kayu silot i perbalengenna.

¹⁸Iperketuhu karina kalak Het simertumpu i pèntu Pengkeruhen i ngo tanoh i enggo milik si Abraham.

¹⁹Nai ikuburken si Abraham mo sinibagesna i mi liang Makhpela i tanoh Kanaan.

²⁰Bagi mo dalanna, juma dekket liang milik kalak Het kin gabè milik si Abraham mahan perkuburen.