Read Batak Dairi 1 Musa 25 Bible Online

1 Musa 25 - Batak Dairi bible

1 Musa 25

¹Ukum si Abraham kabin nola ngo dekket sada daberru mergerar si Ketura.

²Tubuhen anak ngo sinibagesana i, gerarna: si Zimran, si Joksan, si Medan, si Midian, si Isybak dekket si Suah.

³Si Joksan anakna si Syeba dekket si Dedan janah pemparen si Dedan mo kalak Assur, kalak Letus dekket kalak Leum.

⁴Dukak-dukak si Midian imo: si Efa, si Efer, si Henokh, si Abida, dekket si Eldaa. Karinana mo i pemparen si Ketura.

⁵Tukasi pè ipesoh si Abraham karinana hartana taba si Isak,

⁶tapi sinderrang nggelluh dèng ia mbuè ma ngo iberèken taba dukak-dukakna situbuh arap sinibagesna sidèban. Nai ipasulak mo dukak-dukakna i lompat mi suak kan kebincaren tanoh Kanaan, asa ndaoh bai anakna si Isak nai.

⁷Enggo mo tua-tua kalohon asa matè si Abraham ai sanga umurna 175 tahun.

⁹Ikubur dukak-dukakna mo ia, imo si Isak bak si Ismael i liang Makhpela imo i juma kan kebincaren Mamre. Ukum juma i milik si Efron anak si Zohar kin ngo i, kalak Het,

¹⁰tapi enggo itokor si Abraham bai kalak Het i nai. Si Sara sinibages si Abraham pè i sidi ma ngo ikubur.

¹¹Enggo kessa matè si Abraham, ipasu-pasu Dèbata mo si Isak anak si Abraham. Tikanna i, merian i gembar telaga mergerar “Ia ngo memperdatèken Aku” ngo si Isak.

¹²Si Ismael imo anak si Abraham dekket si Hagar daberru Mesir, hamba si Sara.

¹³Sipuluh dua ngo anak si Ismael, gerarna mulai i situaen nai imo: si Nebayot, si Kedar, si Adbeel, si Mibsam, si Misyma, si Duma, si Masa, si Hadad, si Tema, si Jetur, si Napis dekket si Kedma. Dukakna i gabè empung sipuluh dua bangsa, kuta bak ladang kalak i pè ibaing ngo mengèkutken gerar kalak i.

¹⁷Merumur 137 tahun mo si Ismael, tikan matè ia.

¹⁸Pemparenna merian i aur kellang-kellang Hawila bak Sur, kan kebincaren Mesir, mayak Assur. Pedaoh-daoh ngo kalak i dekket pemparen si Abraham sidèban i.

¹⁹Bagèen ngo sejarah si Isak anak si Abraham.

²⁰Merumur empatpuluh tahun mo si Isak tikan jejap ia dekket si Rebekka turang si Laban, berru si Betuel kalak Aram i Mesopotamia nai.

²¹Kumarna oda merdukak si Rebekka, mersodip mo si Isak taba JAHOWA tersèngèt sinibagesna i. Iuèi JAHOWA ngo sodip si Isak i, ai mengkandong mo si Rebekka.

²²Dua kalak ngo anak i dagingna i, janah tikan madèng tubuh anak i, kumadah ngo kalak i ibas kurungen manik dèng pè. Nina si Rebekka, “Kasa mo kennah masa bagèn bangku?” Nai ipido mo peddah bai JAHOWA nai.

²³Idokken JAHOWA mo tabasa, “Dua bangsa ngo nidagingmi; dak merselisih ngo sidua bangsa sinaing nitubuhkenmi gegohen ngo anggina daripada kakana situaen ngo merkebbas taba sikèdèken.”

²⁴Dapet ketikana ketaring si Rebekka, itubuhken mo leppa dua daholi.

²⁵Situaen bagè simbara ngo, janah kolingna mbukbuk. Kerna i ibaing mo gerarna si Esau.

²⁶Tikan tubuh kessa sipeduaken, ijèmak mo tukul-tukul si Esau. Kerna i ibaing mo gerarna si Jakob. Merumur ennempuluh tahun mo si Isak tikan tubuh anakna i.

²⁷Makin mbelgah mo anak sidua kalak i. Ukum si Esau gabè sada kalak perburu pandè ngo janah lemmo atèna merian i rambah, tapi ukum si Jakob kalak persip ngo janah lemmo atèna merian i bages.

²⁸Kellengen ngo atè si Isak midah si Esau, kerna kucul ngo si Isak kipangan jukut niburu. Tapi ukum si Rebekka, ngkellengen ngo atèna midah si Jakob.

²⁹Tikan sidari iroroh si Jakob mo kacang mbara, roh mo si Esau mulak merburu. Melèhè mo iakap.

³⁰Nina mo taba si Jakob, “Melèhè kalohon kuakap. Dikè mo situk kacang mbara mi.” (I ngo sebabna idokken ia Edom).

³¹Ialoi si Jakob mo, “Selloh, asal mo lebbèen berèken bangku hakmu situaen i.”

³²Nina si Esau mo, “Man kadèngku mo hak i bangku ukum matè ngo aku kumara lèhèngku.”

³³Idokken si Jakob dèng ma, “Sumpahken mo lebbè, magahken iberèken kono hakmu i bangku.” Imangmangken si Esau mo merèken hakna i bai si Jakob.

³⁴Kessa i iberèken si Jakob mo roti dekket dèba roroh kacang mbara i. Nai mangan mènum mo si Esau, kessa i laus mo ia. Bagi mo si Esau oda menghargai hakna situaen.