Read Batak Dairi 1 Musa 27 Bible Online

1 Musa 27 - Batak Dairi bible

1 Musa 27

¹Nai tikan sidari, enggo kessa tua-tua si Isak, janah maknè merpendidah, idilo mo si Esau, anakna situaen i, idokken mo tabasa, “Kono alè pa. Anakku!” “Kadè pana alè pa.” nina si Esau.

²Nina si Isak mo, “Ibettoh kono ngo, ukum aku enggo mo tua-tua, janah tah mak nèngè ndekkah nggelluh.

³Jadi embah mo panahmu, buru mo sada binatang rambah.

⁴Roroh mo i merasa bagè kuculku, nai taruhken mo bangku. Asa mula enggo kupangan kupasu-pasu mo ko, sinderrang madèng matè aku.”

⁵Idengkoh si Rebekka ngo pengeranaen si Isak dekket si Esau i. Enggo kessa laus si Esau merburu,

⁶idokken si Rebekka mo taba si Jakob, “Gejapken èn dèng kudengkoh idokken bapamu taba si Esau, bagèen,

⁷‘Buru mo sada binatang janah roroh mo i merasa lako bangku. Enggo kessa kupangan kupasu-pasu mo ko i lebbè JAHOWA, sinderrang madèng matè aku.’

⁸Asa alè pa” nina si Rebekka dèng ma, “Dengkohken janah bahanken mo sikudokken èn.

⁹Laus mo ko mengaleng pinakanta, pilih mo dua anak kambing singgomokna, asa kuroroh mahan pangaen kucul bapamu.

¹⁰Kessa i taruhken mo bana asa ipangan, kessai berènkenna mo pasu-pasuna bamu sinderrang madèng matè ia.”

¹¹Tapi idokken si Jakob mo taba inangna, “Nangè, otang mbukbuk ngo daging si Esau, keppèken dagingku melèmus ngo?

¹²Mula ijamah bapa dagingku, gabè ibettoh mo kutipu ia; dungna ulang lebbè pasu-pasu, gabè isumpahi nola mo aku nahan.”

¹³Ialoi inangna i mo, “Ulang pikirken i alè pa. Aku pè gumongken sempettana i, baingken sambing mo sikudokken i, lako mo alengi kambing i.”

¹⁴Nai laus mo si Jakob meraleng kambing i, iembah taba inangna, nai iroroh si Rebekka mo pangaen kucul si Isak.

¹⁵Kessa i ibuat si Rebekka mo pakèen si Esau simendèna, nibonikenna i bages, nai ipakkèken mo taba si Jakob.

¹⁶Ibalutken ma mo bebak kambing i mi betekken bak mi kerahong si Jakob siso mbukbuk i.

¹⁷Nai iberèken mo taba si Jakob gulè sienggo iroroh merasa i, dekket roti sienggo itasak.

¹⁸Kessa i, laus mo si Jakob mendahi bapana, nina mo, “Opa!” “Kadè i,” nina si Isak, “Isè ngo ko, si Esau ngo barang si Jakob?” nina si Isak.

¹⁹Ialoi si Jakob mo, “Si Esau ngo aku, anakmu situaen i alè pa; enggo kubahan sinidokkenmu pa. Kundul mo ko, pangan mo jukut sikuburu sikuembah èn, asa ipasu-pasu ko aku alè pa.”

²⁰Nina si Isak mo, “Ndor ma mo dapet kono i pa.” Ialoi si Jakob mo, “Kumarna Dèbata JAHOWA nisembahmi ngo Pa mengurupi aku.”

²¹Nai nina si Isak mo taba si Jakob, “Roh mo ko ndessing mi sèn, asa kujamah dagingmi, tah tuhu ngo ko si Esau?”

²²Ijolmiti si Jakob mo bapana, nai ijamah bapana i mo ia ninganna idokken, “Ukum soramu bagè sora si Jakob ngo, tapi betekkenmu bagè betekken si Esau.”

²³Oda itandai si Isak si Jakob kumarna mbukbuk betekkenna bagè si Esau. Tapi naing kessa mo si Jakob ipasu-pasu,

²⁴ikusoken dèng ngo sikali nai, “Tuhu ngo ko si Esau?” “Tuhu ngo,” nina si Jakob.

²⁵Nai idokken si Isak mo, “Dikè mo gulè i, enggo kessa kupangan kupasu-pasu mo ko.” Iberèken si Jakob mo gulè i bana, dekket situk anggur ènumenna.

²⁶Nai nina bapana i mo mbangsa, “Pedessing mo tok nai alè pa, janah sanggoh mo aku alè pa.”

²⁷Tikan ndessing si Jakob lako menanggohsa, ianggoh si Isak mo bau pakèen si Esau, nai mèter ipasu-pasu mo ia, nina mo, “Bau merasa anakku i bagè bau jampalen sienggo ipasu-pasu JAHOWA.

²⁸Dak iberèken Dèbata mo bamu hembun i langit nai, asa gabè nggabur karina jumamu. Iberèken mo bamu pagè dekket anggur lahlah kalohon.

²⁹Karina bangsa gabè hambamu janah karina marga tunduk bamu. Kono mo mengerajai karina kaka-anggimu, janah pinempar inangmu sujud i hadeppenmu. Kenna sempetta mo karina kalak simenumpahi ko, janah terolih pasu-pasu mo karina kalak simemasu-masu ko.”

³⁰Enggo kessa ipasu-pasu si Isak si Jakob, mèter laus mo ia, keppè enggo balik merburu kakana si Esau.

³¹Ia pè iroroh ma mo merasa kalohon janah itaruhken mo bai bapana, nina mo, “Kundul mo ko alè pa, pangan mo gulè sikuembah bamu èn, asa ipasu-pasu kono aku alè pa.”

³²“Isè ngo ko?” nina si Isak. “Si Esau anakmu situaen i ngo aku alè pa,” nina mengaloi.

³³Mèter menggirgir mo karina daging si Isak, janah ikusoi, “Mula bagi, isè ngo sienggo merburu jukut janah enggo iembah bangku ndai? Enggo mo kupangan, tikan madèng soh i ko. Nai enggo mo kuberèken pasu-pasungku bana, janah ukum bagèndari enggo gabè milikna pasu-pasungku soh mi amman sumendah.”

³⁴Enggo kessa idengkoh si Esau kata i, derru-derru mo ia janah jut iakap nina mo, “Pasu-pasu ma mo aku alè Pa.”

³⁵Nina si Isak mo, “Enggo ngo roh dèdahenmu misèn, janah enggo iakkali aku. Enggo mo ibuat pasu-pasu sinaing kuberèken bamu kin.”

³⁶Idokken si Esau mo, “En mo padua kaliken ia menipu aku. Patut ngo keppè si Jakob gerarna. Hakku situaen pè enggo ibuat; bagèndari enggo ma ibuat pasupasu bangku kin. Oda nè ngo lot bamu alè pa pasu-pasu sidèban lako bangku?”

³⁷Ialoi si Isak mo, “Enggo kubaing ia mo gabè pengguruenmu, janah karina kaka enggina kubaing gabè naposona. Enggo kub erèken bana pagè bak anggur. Bagèndari oda lot kadè nèngè sindorok kubaing bamu alè p`a.”

³⁸Tapi oda uè mentadi si Esau lako mengido taba bapana, “Pellin sada bagè ngo kessa pasu-pasumu pa? Pasu-pasu ma mo aku pa.” Nai tangis nola mo ia.

³⁹Kessa i idokken si Isak nola mo, “Oda lot hembun i langit nai lako bamu, Oda lot nggabur tanoh mahan jumamu.

⁴⁰Nggelluh mo ko ipas peddangmi nai, tukasi pè kono gabè naposo anggimu, tapi mula mengalo kono, maluah mo kono ipas kuasana nai.”

⁴¹Nai nggogo kalohon mo atè si Esau midah si Jakob kumernaken enggo iberèken bapana pasu-pasuna taba dèdahenna i. Mersura-sura mo ia, “Oda nè ndekkah matè mo bapa, janah pul kessa mo ukur bonek kubunuh mo si Jakob.”

⁴²Terbertik kessa mo sura-sura si Esau i taba si Rebekka, ipasulak mo meraleng si Jakob idokken mo, “Dengkohken mo, ukum kakamu si Esau naing ngo memalesken hellemna, memunuh kono.

⁴³Kerna i, bahanken mo sikudokken èn. Kettu mo laus mendahi turangku si Laban i Haran,

⁴⁴janah rebbaksa mo ko lebbè merian barang sadikè dekkah soh malap laga kakamu itangko ari itangko berngin,

⁴⁵asa ilupaken karina ulah-ulahmu bana i. Kessa i, kupasulak pè mengalengi ko asa balik ko misèn. Oda uè aku rebbak mago anakku sidua i tupung sada ari.”

⁴⁶Nai nina si Rebekka mo taba si Isak, “Moyang ngo atèngku midah perukat-perukat si Esau i marga sidèban i nai. Mula si Jakob nola pè kabin dekket berru Het, lotiin mo aku matè.”