Read Batak Dairi 1 Musa 28 Bible Online

1 Musa 28 - Batak Dairi bible

1 Musa 28

¹Kessa i idilo si Isak mo si Jakob, ipasu-pasu mo, janah idokken, “Ulang kabini berru Kanaan.

²Laus mo ko mi Mesopotamia mendahi pemparen si Betuel empungmi, janah jejap mo ko dekket sada kalak berru puhunmu si Laban i Haran.

³Dak ipasu-pasu Dèbata Perkuasa i mo perjejapenmu, janah iberèken mbuè pinemparmu, asa gabè empung mbuè bangsa ko.

⁴Katerra pè ipasu-pasu JAHOWA mo ko dekket pinemparmu tosè bagè pemasu-masuna si Abraham, janah katerra pè gabè milikmu mo tanoh niianenmu èn, sienggo iberèken Dèbata bai si Abraham!”

⁵Bagi mo carana ipeberkat si Isak si Jakob laus mi Mesopotamia, mendahi si Laban, anak si Betuel kalak Aram i. Ukum si Laban turang si Rebekka inang si Jakob bak si Esau ngo.

⁶Terbertik ngo bai si Esau, enggo ipasu-pasu si Isak ukum si Jakob janah ipeberkat laus mi Mesopotamia lako mengeririt. Bagi ma tikan si Isak memasu-masu si Jakob, igerra ngo si Jakob mak ndorok ibuat berru Kanaan.

⁷Ibettoh si Esau ma ngo iuèi si Jakob ngo karina nidokken bapana bak inangna i janah enggo mo berkat mi Mesopotamia.

⁸Nai ibettoh si Esau mo, ukum bapana si Isak, oda toko atèna midah daberru Kanaan,

⁹kernana i, laus mo si Esau mendahi si Ismael anak si Abraham, janah ikabini mo berru si Ismael mergerar si Mahalat, turang si Nebayot.

¹⁰Berkat mo si Jakob i Bersyeba nai mi Haran.

¹¹Sundut kessa mo mataniari soh mo ia mi sada bekkas melongo janah mermalam mo ia i sidi. Galè mo ia naing meddem; ipertandèan mo sada batu.

¹²Nai lot mo nipina, idah mo lot sada ardan cènder i tanoh èn nai songket mi langit janah malaèkat-malaèkat menangkeng mengencuah i ardan i.

¹³Nai cènder mo i gembarna JAHOWA mendokken, “Aku ngo JAHOWA Dèbata nisembah si Abraham dekket si Isak. Kuberèken mo bamu dekket bai pinemparmu tanoh bekkasmu galè èn.

¹⁴Ukum pinemparmu bagè buè abu i tanoh èn. Makin ipebellang kalak i mo aurna mi sikulilingna, janah merkitè ko dekket pinemparmu, Kupasu-pasu mo karina bangsa ni tanoh èn.

¹⁵Èngèt mo Kuurupi janah Kuondingi ngo ko, barang mikè pè ko laus, janah Kuarak nola ngo kono balik mi nagerri èn. Oda Kutadingken kono mèma saut Kubaing karina sienggo Kuperbagah bamu i.”

¹⁶Nai terèngèt mo si Jakob, nina mo, “I bekkas èn ngo keppè JAHOWA, tapi bagèndari pè asa kubettoh.”

¹⁷Buradan mo ia, nai idokken mo, “Meheji kalohon ngo bekkas èn. Isèn ngo bages Dèbata pèntu pengkeruhen Sorga.”

¹⁸Njengkas siberembenkenna, kèkè mo si Jakob, ibuat mo batu tandèanna i, ipecènder mo i mahan pernèngèten. Iarirken mo minak Zaitun mi babo batu i lako bai Dèbata.

¹⁹Igerari mo bekkas i Betel (Lus kin ngo gerarna arnia).

²⁰Nai ibulabanken si Jakob mo, “Mula iurupi janah iondingi JAHOWA ngo aku i perdalanenku èn janah iberrè bangku pangaen dekket perolessen

²¹janah njuah-njuah aku balik mi bages bapa, JAHOWA mo gabè Dèbatangku.

²²Nai kuberèken mo bai JAHOWA nipersipuluh ibas karina niberèken JAHOWA bangku. I bekkas batu pernèngèten sikupecènder èn kennah gabè bekkas mersembah bai JAHOWA.”