Read Batak Dairi 1 Musa 32 Bible Online

1 Musa 32 - Batak Dairi bible

1 Musa 32

¹Iterrusken si Jakob mo perdalanenna. Nai roh mo barang piga-piga malaèkat lako mendahisa.

²Idah si Jakob kessa mo kalak i, nina mo, “Isèn ngo Undung-undung Dèbata,” kumarna i ibaing mo gerarna Mahanaim.

³Kessa i ipasulak si Jakob mo utusenna merdalan mengelebbèisa mi Edom lako menjumpai si Esau kakana i.

⁴Tennah si Jakob taba kalak i, “Bagèen mo dokken taba kakangku si Esau, ‘Aku si Jakob dedahenmu sidekkahna èn rebbak si Laban ngo aku.

⁵Bagèndari lot ngo lembungku, kalodèngku, biri-biri, kambing dekket naposo pè. Kutengesken berita èn taba kono abang, dekket pengidoen asa sampang atèmu.’ ”

⁶Balik kessa mo utusen i mendahi si Jakob, idokken kalak i mo, “Enggo laus kami mendahi si Esau kaka ndènè i. Bagèndari enggo i dalan ia lako roh mi sèn menimbaki kènè. Lot ngo empat ratus kalak denganna.”

⁷Mendengkoh i mbiar bana buradan mo si Jakob. Nai ibagi mo denganna i gabè dua nuhnuhen, bagima pè biri-birina, kambingna, lembuna bak untana pè.

⁸Dok atèna, “Mula roh si Esau janah ikubu nuhnuhen perlebbè i, tah ndorok giam mperrus nuhnuhen peduaken lako mabaken dirina asa maluah.”

⁹Kessa i mersodip mo si Jakob, “Ialè Dèbata siniuèen empungku si Abraham dekket bapangku si Isak, dengkohken mo aku. Kono ngo alè JAHOWA mendokken aku balik mi nagerringku. Ipadanken kono ma ngo alè JAHOWA mengatur karina selloh bangku.

¹⁰Situhunna oda patut aku menjalo kelleng atèmu dekket kinituhu sienggo niberèkenmu bangku. Tikan berkat aku meneberangi Laè Jordan, pellin tongket ngo kessa kuembah. Bagendari balik dekket sidua nuhnuhen èn.

¹¹Memmes kupido bamu, paluah mo aku bai kakangku si Esau nai. Mbiar aku, tah bakunè pekirohna i lako mengkubu janah mengeradasken kami karina, bagi bak daberru dekket anak-anak.

¹²Èngèt mo alè JAHOWA bagah-bagahmu ai kono ngo mengatur karina mendè taba aku janah memerèken bangku mbuè pinempar. Sada kalak poda terbaingsa milang kumerna buèna bagè kersik i biding laut.”

¹³Enggo kessa mermalam i sidi, ibuat si Jakob mo dèba pinakan-pinakan i lako merèken bai si Esau. Sinaing berèenkenna, imo: Dua ratus kambing berru-berru, duapuluh kambing tonggal, dua ratus biri-biri berru-berru, duapuluh biri-biri tonggal, tellupuluh unta pesusuken rasken anakna, empatpuluh lembu berru-berru, sipuluh lembu tonggal, duapuluh kalodè berru-berru, dekket sipuluh kalodè tonggal.

¹⁶Ibagi-bagi mo pinakan i gabè piga-piga nuhnuhen, janah gennep nuhnuhen ipesakat mendahi sada kalak naposona. Nina mo taba kalak i, “I lebbè mo kènè merdalan janah kennah lot kellangna nuhnuhen sisada mi nuhnuhen sisada nai.”

¹⁷Idokken si Jakob mo taba naposona perlebbè, “Mula pejumpa ko dekket kakangku si Esau janah mula ikusoken, ‘Isè tuanmu? Naing mikè ko? Isè sidasa pinakan-pinakan siniarakmi?’

¹⁸Aloi mo bagèen, ‘Milik dèdahenmu si Jakob ngo i. Itengesken ngo èn mahan persembahna taba si Esau kakana. Ukum dèdahenmu si Jakob roh nè mo ipodi nami nai.’ ”

¹⁹Taba naposona peduaken, petelluken dekket karina sinidokna lako pehèdu-hèduken nuhnuhen i, tong ngo bagi ma pendokkenna. Dokatè si Jakob ndorok ngo ièlèk si Esau merkitèken pemerèkenna i, asa mula jumpa ia nahan tentu malap ngo ukur si Esau midahsa.

²¹Jadi lebbèen ngo itengesken siberèenkenna i, tapi ukum ia mermalam dèng ngo i undung-undungna.

²²Bernginkenna i, kèkè mo si Jakob, iarahken mo duana sinibagesna i, dekket sidua kalak radingna i dekket anakna sisipuluh sada kalak i, meneberangi laè Jabok.

²³Enggo kessa isuberrangken kalak i karina, molih ngo ukum ia, janah ibakin mo karina hartana mi suberrang kèpar.

²⁴Tapi tading ngo i kèpar sadasa. Nai roh mo sada kalak anak laki, mergumpil dekket si Jakob soh mi mayak nterrang ari.

²⁵Iakap alona i kessa mo oda ndorok mennang ia i pergumpilen i, mèter itempuk mo tulan tembuk si Jakob, gabè sihit mo tulan tembukna i.

²⁶Nai idokken mo taba si Jakob, “Paluah mo aku; ai sigejap nai mbincar mo mataniari.” Ialoi si Jakob mo, “Oda kupaluah kono, mula oda ipasu-pasu kono aku.”

²⁷“Isè ngo gerarmu?” nina mengkusoi. “Si Jakob ngo” nina mengaloi.

²⁸Nai idokken nola mo, “Oda nè si Jakob gerarmu. Enggo mergumpil ko dekket Dèbata bang dekket jelma, janah mennang ngo ko; kerna nai gabè si Israel mo gerarmu.”

²⁹Nai idokken si Jakob mo, “Bagahken mo gerarmu.” Tapi ialoi kalak i mo, “Oda perlu kusoenmu isè gerarku.” Nai ipasu-pasu mo si Jakob.

³⁰Nai idokken si Jakob mo, “Enggo hadep abè aku dekket Dèbata, janah nggelluh dèng ngo aku.” Kumernaken i ibaing mo gerar bekkas i Pniel.

³¹Tikan mbincar mataniari, itadingken si Jakob mo Pniel i, janah mekah-ekkah ngo ia kerna kellip tulan tembukna.

³²Soh bagèndari pè oda ngo ipangan kalak Israel jukut tulan tembuk, kumernaken itempuk tulan tembuk si Jakob.