Read Batak Dairi 1 Musa 33 Bible Online

1 Musa 33 - Batak Dairi bible

1 Musa 33

¹Idah si Jakob mo roh si Esau dekket denganna empat ratus kalak. Nai ibagiken mo dukakna ikellangi si Lea, si Rahel, dekket rading sidua kalak sienggo ibanaken i.

²Ibaing ia mo radingna sidua kalak i rebbak dekket dukakna i i lebbè, nai si Lea dekket dukakna, nai si Rahel dekket si Josep i podi kalohon.

³Ukum si Jakob merdalan mo i lebbè kalohon. Ninganna makin ndessing mendahi kakana, sujud mo ia pitu kali.

⁴Tapi lojang mo si Esau mendapetken si Jakob, nai idakep mo janah isanggohi. Janah semep-semeppen mo kalak i duana.

⁵Idah si Esau kessa mo karina daberru dekket anak-anak i, ikusoken mo, “Isè ngo kalak denganmu èn?” Ialoi si Jakob mo, “Dukakku ngo kalak i. Ai enggo ibasa-basaken Dèbata kalak i taba aku.”

⁶Enggo kessa i mi lebbè mo rading i dekket dukak-dukakna, nai sujud mo kalak i.

⁷Nai roh nola mo si Lea rebbak dekket dukakna janah perpodi roh mo si Josep dekket si Rahel njolmit nai sujud mo kalak i karina.

⁸Mengkuso mo si Esau, “Man kadè ngo dok atèmu nuhnuhen si jumpa aku ndai?” Ialoi si Jakob mo, “Lako pesampangken atèmu ngo kaka oli.”

⁹Tapi idokken si Esau mo, “Enggo mo cukup bagèna hartangku ulang pella berèken i bangku.”

¹⁰Idokken si Jakob mo, “Ulang mo bagi alè kaka oli. Mula lolo ngo kono midah aku, jalo mo sikuberèken i. Ukum bangku mengidah abèmu sambing pè, dosken mengidah abè Dèbata ngo perasaenku, karna bagi ramahna kono bangku.

¹¹Kupido bamu jalo mo luahku sikuembah èn. Ai enggo merbasa-basa Dèbata bangku, iberèken ngo bangku karina siperlu.” Dak ièlèkken si Jakob ngo, ujungna gabè ijalo si Esau mo luahna i.

¹²Nai idokken si Esau mo, “Kebbas mo kita lako berkat, merdalan mo aku lebbèen.”

¹³Ialoi si Jakob mo, “Ibettoh kono ngo kaka oli makdèng mergegoh anak-anak èn, janah kennah mermanat ma ngo aku mi karina pinakan penusuen. Mula ialai ndor-ndor, mula pè pellin sidari sambing, matè mo karina pinakan i.

¹⁴Lebbè mo kono, kuèkutken pè hanjar-hanjar. Katerra pè ndorok kami merdalan narih ndor, bagi ma pinakan dekket anak-anak èn, soh kudapetti kami ko i Edom.”

¹⁵Nina si Esau ma, “Mula bagi, selloh mo kutadingken rebbak ko dèba soridadungku èn.” Tapi ialoi si Jakob mo, “Ulang pella kono susah-susah, ai pellin pesampangken ukurmu sambing ngo kessa aku.”

¹⁶Jadi bagi mo balik si Esau sidarinkenna i mi Edom.

¹⁷Tapi ukum si Jakob, mi Sukot ngo ia laus, ipajek mo bagesna i sidi, bagi ma perculèndungen pinakanna. Ingo memaing igerari bekkas i Sukot.

¹⁸I perdalanen i Mesopotamia nai, njuah-njuah ngo si Jakob soh mi Sikhem i nagerri Kanaan, nai ibahan mo undung-undungna ibas jampalen i gembar kuta.

¹⁹Ukum jampalen bekkas undung-undung i itokor ngo i bai pemparen si Hemor nai, imo bapa si Sikhem, hargana seratus kèpèng pirak.

²⁰Nai ipajek mo langgaten i sidi, janah igerari mo i “El, Dèbata Israel”.