Read Batak Dairi 1 Musa 34 Bible Online

1 Musa 34 - Batak Dairi bible

1 Musa 34

¹Tikan sidari, laus mo si Dina berru si Jakob dekket si Lea mendahi barang piga-piga kalak daberru Kanaan.

²Tikan idah si Sikhem anak si Hemor kalak Hewi imo raja i suak i kessa mo si Dina, mèter iluaken mo ia janah irampok.

³Tapi ngkelleng kalohon ngo atèna midah si Dina, janah itulus ngo dalan asa ngkelleng ma atè si Dina midahsa.

⁴Idokken si Sikhem mo taba bapana, “Kupido bamu pa, usahaken mo asa uè bangku simerbaju i. Sèkel ngo aku kabin dekketsa.”

⁵Terbertik ngo bai si Jakob, enggo icèdai berruna i, tapi kumerna i jampalen ngo dukak-dukakna menjaga pinakanna, oda terbakinsa maing barang kadè pè, kum madèng balik kalak i.

⁶Nai roh mo si Hemor, bapa si Sikhem mendahi si Jakob lako merarih dekketsa.

⁷Sinderrang bagidi tupung mo balik dukak-dukak si Jakob i jampalen nai. Idengkoh kessa mo simasa i, tersengget ngo kalak i janah melaga. Ai kumernaken irampok si Sikhem berru si Jakob enggo mo ihina kalak Israel.

⁸Idokken si Hemor mo taba si Jakob, “Ngkelleng ngo atè anakku si Sikhem midah berrumu i; jadi kupido bamu asa ijinken mo jejap anakku dekket berrumu i.

⁹Sibaing mo arih, asa ndorok mersibuaten bangsamu dekket bangsangku.

¹⁰Nai merkitè bagidi kènè pè ndorok mo merian rebbak dekket kami i ladang èn; barang i dikè sambing roh gèut ndènè. Janah ndorok ma mo kènè mertiga-tiga janah memiliki harta.”

¹¹Nai idokken si Sikhem mo taba bapa si Dina dekket taba turang-turangna i, “Kupido bai ndènè, asa nemmuken uèi kènè pengidoenku èn, uè ngo aku merèken barang kadè sambing ipido kènè bangku nai.

¹²Dokken kènè mo bakunè adatna sinaing bakinen nami bai ndènè, asal mo ipaduè kènè kabin kami.”

¹³Kumernaken enggo sanga irampok si Sikhem turang kalak i si Dina i, gabè iluapi dukak-dukak si Jakob mo si Sikhem dekket bapana si Hemor i.

¹⁴Nina kalak i mo taba kalak i sidua, “Mèla ngo kami pejahèken turang nami taba kalak siso mertakkil.

¹⁵Ndorok ngo kuuèi kami nidokken ndènè i tapi kennah bagè kami ngo kènè, imo kennah mertakkil.

¹⁶Enggo kessa i kuuèi kami pè pengidoen ndènè i, imo ndorok mersibuaten. Nai gabè merian mo kami i tengah-tengah ndènè janah gabè sada bangsa dekket kènè.

¹⁷Tapi mula oda kènè uè bagè nidokken nami i, janah oda uè kènè mertakkil, kualengi kami mo turang nami i nai laus mo kami i sèn nai.”

¹⁸Patut ngo nidokken kalak i dok atè si Sikhem dekket si Hemor,

¹⁹janah uè ngo ndor si Sikhem mengulaken sarat-sarat i karina, kumarna ngkelleng atèna midah si Dina. Ukum ibas karina kaka-anggina si Sikhem mo siterdokkensa ranana.

²⁰Kessa i laus mo si Hemor dekket si Sikhem mi bekkas perarihen imo i pèntu pengkeruhen, mengerana mo kalak i taba pengisi kuta i, bagèen,

²¹“Supan-supanta ngo kalak Israel i. Jadi sipadiat mo kalak i merian i ladangta èn rebbak dekket kita, janah bèbas ia barang mikè lemmo atèna. Mbellang ngo ladangta èn, siat ngo bang kalak i pè. Nai ndorok mo kita muat berru kalak i, janah kalak i pè ndorok ma mo muat berrunta.

²²Tapi lot ngo saratna asa uè kalak i merian rebbak kita dekket asa gabè sada bangsa dekket kita, imo: karina daholi banta nai kennah mersittak ngo bage kalaki.

²³Ujungna sikali èn karina pinakan dekket harta kalak i gabè milikta. Jadi siuèi mo pengidoen kalak i asa tong merian rebbak kita kalak i.”

²⁴Karina pengisi kuta simerpulung i sidi mengoangken sinidokken si Hemor dekket si Sikhem, nai karina mo daholi simbelgah ni kuta i itakkil.

²⁵Enggo kessa tellu ari nai nola, tikan ncio dèng iakap daholi-daholi simertakkil i, roh mo mi kuta sipsip dua kalak turang si Dina simergerar si Simeon dekket si Lewi enggo tagak merpeddang. Nai ibunuh kalak i mo karina daholi ni sidi,

²⁶dekket ngo si Hemor bak si Sikhem. Nai ialengi kalak i mo si Dina i bages si Sikhem nai janah iembah mo laus i sidi nai.

²⁷Enggo kessa pul iragèken, irampasi dukak-dukak si Jakob sidèbanna i mo harta kuta i bagè mahan bèla, kumernaken irampok turang kalak i.

²⁸Iarak kalak i mo kambing, biri-biri, lembu, kalodè, dekket kadè dèng silotna i kuta dekket i jampalen pè.

²⁹Iapus kalak i ngo karina barang simaharga, itaban mo karina daberru dekket anak-anak, janah irampasi mo karina pengisi bages i kuta i.

³⁰Nai idokken si Jakob mo taba si Simeon dekket si Lewi, “Menusahi aku ngo kè. Bagèndari karina kalak Kanaan dekket kalak Feris dekket karina pengisi ladang èn mergogo atè mo midah aku. Kita oda piga, tah bakunè mersada taki kalak i mengalo janah menjuhap aku iragèken mo karina kita sisimpangaen.”

³¹Tapi ialoi kalak i mo, “Oda tertengen-tengen kami turang nami ibaing bagè kalak sibabijalang.”