Read Batak Dairi 1 Musa 35 Bible Online

1 Musa 35 - Batak Dairi bible

1 Musa 35

¹Tikan sidari nina Dèbata mo taba si Jakob, “Aku ngo Dèbata sienggo pacidahken diringKu taba kono, tikan mperrus ko bai kakamu si Esau nai. Kettu mo laus mi Betel. I sidi mo kè merian janah bahan mo i sidi langgaten bangKu.”

²Nai idokken si Jakob mo taba dukak-dukakna dekket taba karina sirebbak dekketsa, “Lompat mo kita isèn nai mi Betel. Naing kubahan ngo i sidi sada langgaten bai Dèbata simengurupi aku tikan tersessak dekket mengondingi aku barang mikè aku laus. Patakken kènè mo karina gana-ganaen silot i bai ndènè; menguras mo kènè nai pakkè kènè mo oles mbersih.”

⁴Nai ipemberrèken kalak i mo taba si Jakob karina gana-ganaen silot bai kalak i, bagi dekket atting-attingna. Karinana i itanem si Jakob mo i terruh kayu mbellen i gembar kuta Sikhem.

⁵Tikan berkat si Jakob dekket denganna i, ibaing Dèbata mo buradan karina jelma silot i sikuliling kuta; gabè oda ijalang kalak i si Jakob dekket denganna i.

⁶Nai soh mo kalak i mi kuta Betel i tanoh Kanaan, ukum arnia Lus ngo gerar kuta i.

⁷Ibahan si Jakob mo i sidi langgaten janah igerari mo bekkas i “El-Betel,” kumarna ipeteridah Dèbata dirina i sidi tikan mperrus ia bai kakana nai.

⁸I sidi ma mo matè si Debora simendèdah si Rebekka kin, janah ikubur mo iterruh kayu mbellen kan selatan kuta i. Kumernakenna i ngo asa igerari kayu i “Kayu Tangis”.

⁹Enggo kessa balik si Jakob i Mesopotamia nai, ipeteridah Dèbata ngo dirina bana ninganna memasu-masu si Jakob.

¹⁰Nina Dèbata tabasa, “Oda nèngè kono igerari si Jakob tapi si Israel ngo.” Bagi mo igerari Dèbata ia si Israel.

¹¹Nai idokken Dèbata dèng ma, “Aku ngo Dèbata perkuasa. Merrak-merrik mo ko. Mbuè mo bangsa pemparenmu janah gabè empung raja-raja.

¹²Nagerri sienggo Kuberèken bai si Abraham dekket bai si Isak, Kuberèken mo bamu dekket bai pinemparmu.”

¹³Kessa i laus mo Dèbata menadingken si Jakob.

¹⁴I bekkas mengerana Dèbata taba si Jakob, ipecènder ngo i sidi sada batu pernèngèten. Ipèlèken mo batu i bai Dèbata, merkitè iarirken anggur dekket minak zaitun mi babona.

¹⁵Bekkas i mo igerari “Betel”.

¹⁶Enggo kessa i itadingken si Jakob dekket denganna mo Betel. Tikan mayak Efrata, dapet mo ketikana ketaring si Rahel. Tapi mahal ngo tubuh dukakna i.

¹⁷Tikan makin itestes iakap rabisen i, nina sibaso mo tabasa, “Pepihir ukurmu alè Rahel daholi ngo dukakmu i.”

¹⁸Tapi enggo njolmit ajal si Rahel, janah tikan naing mpostep kessahna, ibaing mo gerar anak i si Ben-Oni, tapi ukum bapana ibaing mo gerarna si Benjamin.

¹⁹Enggo kessa matè si Rahel, ikubur mo ia i biding dalan laus mi Efrata, bagèndari gerarna Betlehem.

²⁰Ipecènder si Jakob mo sada batu i sidi mahan pernèngèten, soh sidari èn teridah dèng ngo kuburen si Rahel kumernaken batu pernèngèten i.

²¹Kessa i, iterrusken si Jakob ngo perdalanenna janah ipajek mo perundung-undungenna i sada bekkas ilausi kessa pak Eder.

²²Tikan i sidi kalak i, rebbak meddem mo si Ruben dekket si Bilha, imo rading bapana. Terbertik ngo i taba si Jakob, gabè melaga kalohon mo ia. Lot ngo sipuluh dua anak si Jakob.

²³Tubuh si Lea imo: si Ruben (anak situaen si Jakob), si Simeon, si Lewi, si Juda, si Isasar dekket si Zebulon.

²⁴Tubuh si Rahel imo si Josep dekket si Benjamin.

²⁵Tubuh si Bilha rading si Rahel imo si Dan bak si Naptali.

²⁶Tubuh si Zilpa rading si Lea imo si Gad dekket si Asyer. Imo situbuh i Mesopotamia.

²⁷Nai soh mo si Jakob mendahi bapana, imo i kuta Mamre i gembar Hebron. (Arnia empungna si Abraham pè merian i sidi ngo).

²⁸Ibas umurna nggeddang kalohon, imo seratus ualuhpuluh tahun, matè mo si Isak. Nai ikubur anakna si Esau bak si Jakob mo.