Read Batak Dairi 1 Musa 36 Bible Online

1 Musa 36 - Batak Dairi bible

1 Musa 36

¹En mo pemparen si Esau sinigerari ma kalak Edom.

²Tellu ngo sinibages si Esau, berru Kanaan, imo: si Ada, berru si Elon kalak Het; si Oholibama, berru si Ana, kempu si Zibeon kalak Hewi,

³Si Basmat, berru si Ismael, turang si Nebayot.

⁴Tubuh si Ada imo si Elipas, tubuh si Basmat imo si Rehuel,

⁵tubuh si Oholibama imo si Jeus, si Jaelam dekket si Korah. Karinana i tubuh i Kanaan.

⁶Kessa i itadingken si Esau mo si Jakob lako laus mi ladang ni dèba janah iarahken karina sinibagesna, dukakna bak karina kalak silot i bagesna, rebbak dekket karina pinakanna sinicametna i Kanaan.

⁷Mersirang pè si Esau dekket si Jakob kemulihken buè hartana ngo asa oda terbaing kalak i rebbak. Bagi dèng ma ukum ladang siniianen kalak i oda lot cukup pangaen pinakan kalak i simbuè i.

⁸Nai si Esau sinigeraren ma si Edom, gabè merian mo ia i uruk Seir.

⁹En mo pemparen si Esau, empung kalak Edom.

¹⁰Sinibages si Esau simergerar si Ada menubuhken sada anak, gerarna si Elifas. Lima ngo anak si Elifas imo: si Téman, si Omar, si Zefo, si Gaetam dekket si Kenas. Si Elipas lot ngo siterbuangna, gerarna si Timna. Itubuhken ngo anakna mergerar si Amalek. Sinibages si Esau simergerar si Basmat menubuhken sada anak mergerar si Rehuel. Empat ngo anak si Rehuel, imo: si Nahat, si Zerah, si Syama, dekket si Miza.

¹⁴Sinibages si Esau simergerar si Oholibama imo berru si Ana, kempu si Zibeon, tellu ngo itubuhken anak imo si Jeus, si Jaelam dekket si Korah.

¹⁵En mo èkuten i marga-marga pemparen si Esau: si Elipas, imo anak situaen si Esau, ia mo empung marga: Téman, Omar, Zefo, Kenas,

¹⁶Korah, Gaetam, dekket Amalek. Karina i pemparen si Ada sinibages si Esau ngo.

¹⁷Anak si Esau si Rehuel, imo empung marga Nahat, Zerah, Syama dekket Miza. Karina i pemparen si Basmat sinibages si Esau ngo.

¹⁸Marga-marga èn nola imo: Jeus, Jaelam, dekket Korah imo pinempar si Esau arap sinibagesna si Oholibama berru si Ana.

¹⁹Karina marga i pinempar si Esau.

²⁰Ukum pengisi asli tanoh Edom imo, marga pemparen si Seir, kalak Hori. En mo marga-marga i: Lotan, Syobal, Zibeon, Ana, Disyon, Ezer dekket Disyan.

²²Si Lotan imo empung marga Hori dekket Heman. (Lot ngo turang si Lotan imo si Timna).

²³Si Syobal imo empung marga: Alwan, Manahat, Ebal, Syefo dekket Onam.

²⁴Si Zibeon dua ngo anakna, imo si Aya dekket si Ana. (Si Ana èn mo dapet-dapetten mata laè nggara i Gurun Pasir, tikala mermakan kalodè bapana ia).

²⁵Si Ana imo bapa si Disyon, janah si Disyon imo empung marga Hemdan, Esyban, Jitran dekket Keran. Lot ma ngo sada berru si Ana mergerar si Oholibama.

²⁷Si Ezer imo empung marga Bilhan, Zaawan, dekket Akan.

²⁸Si Disyan imo empung marga Us dekket Aran.

²⁹En mo marga-marga Hori i nagerri Edom: Lotan, Syobal, Zibeon, Ana, Disyon, Ezer dekket Disyan.

³¹Sinderrang madèng lot raja Israel, ukum i Edom enggo mo lot raja memerèntah i gennep cundut imo: Si Bela anak si Beor i Dinhaba nai. Si Jobab anak si Zera i Bozra nai. Si Husyam i ladang Téman nai. Si Hadad anak si Bedad i Awit nai (ia mo menaluken kalak Midian tikan i ladang Moab). Si Samla i ladang Mazreka nai. Si Saul i Rehobot nai imo kan biding laè. Si Baal-Hanan anak si Akhbor. Si Hadar i Pahu nai (sinibagesna mergerar si Mehetabeel, berru si Matred janah kempu si Mezahab).

⁴⁰Ukum si Esau imo empung kalak Edom siniterruh èn: si Timna, si Alwa, si Jetet, si Oholibama, si Ela, si Pinon, si Kenas, si Téman, si Mibzar, si Magdiel dekket si Iram. Gennep marga maing gerarna i gennep ladang bekkasna merian.