Read Batak Dairi 1 Musa 37 Bible Online

1 Musa 37 - Batak Dairi bible

1 Musa 37

¹Ukum si Josep hot mo ia i nagerri Kanaan, imo bekkas bapana,

²bagèen mo tarombo si Jakob: Tikan merumur sipuluh pitu tahun si Josep anak si Jakob i, rebbak-rebbak ngo kalak i mermakani kambing bak biri-birina, imo tubuh si Bilha dekket tubuh si Zilpa imo rading bapana. Dak ibagahken ngo taba bapana pengelako siso patut.

³Ngkellengen ngo atè si Jakob midah si Josep daripada karina anakna sidèban i, kumarna si Josep tubuh, enggo narih tua-tua bapana. Tikan sidari ibahan mo baju jubah bai si Josep mendè kalohon.

⁴Idah kaka-kakana kessa mo ngkellengen atè bapana midah si Josep daripada kalak i, nggogo mo atè kalak i midah si Josep, gabè oda nè uè kalak i mendè permongkam tabasa.

⁵Tikan sada berngin, datang mo nipi si Josep, janah isukutken nipina i taba kaka-kakana, makin nggogo mo atè ni kalak i tabasa.

⁶Bagèen mo idokken si Josep taba kalak i, “Dengkohken kènè aku lebbè.

⁷Kuipi pana karina kita i juma tupung memerkessi pagè, nai cènder mo pana pagèngku i. Tibalen ndènè mengkulilingi tibalenku, janah mèter sujud taba tibalenku i.”

⁸“Idokken kono ngo mèter kembali raja ko janah merkuasa bai nami?” nina kaka-kakana i. Nai makin ceggona mo atè kalak i midahsa kumernaken nipina i dekket katana i.

⁹Enggo kessa i datang dèng ma mo nipina, janah iranaken ma mo taba kaka-kakana, “Lot dèng ma nipingku, kuidah mataniari, bulan dekket sipuluh sada bintang mersembah taba aku.”

¹⁰Isukutken ma ngo nipina i taba bapana, nai ipincang bapana mo ia, nina mo, “Nipi kadè mo nipi mi? Idokdok kono ngo roh aku dekket inangmu bak kaka-anggimu lako sujud mersembah taba kono?”

¹¹Karina kaka si Josep cian midahsa, tapi ukum bapana dak iradum-radumi ngo nipina i.

¹²Tikan sidari nderrang laus mi Sikhem kaka-kaka si Josep lako mermakan kambing bak biri-biri bapa kalak i

¹³idokken bapana mo mbang si Josep, “Laus mo ko mi Sikhem mendahi kakamu, ai mermakan kambing bak biri-birinta ngo kalak i i sidi.” Ialoi si Josep mo, “Uè opa.”

¹⁴Nina bapana, “Tengen mo tah bakunè karina kakamu bagi ma dekket pinakan i, kessa i balik mo ko misèn magahken bangku.” Nai berkat mo si Josep i napa Hebron nai. Oda pella sadikè dekkahna soh mo si Josep mi Sikhem.

¹⁵Tikanna ia menulusi kakana i jampalen pejumpa mo ia dekket sada kalak daholi mengkusoisa, “Kadè tulusenmu?”

¹⁶Ialoi si Josep mo, “Menulusi kakangku ngo. Ai mermakan kambing bak biri-biri ngo kalak i bagèndari. Ibettoh kènè ngo ndia, barang i dikè kalak i sendah bagèndari?”

¹⁷Idokken kalak i mo, “Enggo laus kalak i i sèn nai. Kudengkoh idokken kalak i, naing laus mi Dotan ngo nina.” Nai berkat mo si Josep mengayaki kakana i janah dapetsa mo kalak i, i Dotan.

¹⁸Ndaoh dèng, enggo mo itatap kalak i si Josep, janah tikan madèng ia soh mendahi kalak i, enggo sada tuptup kalak i lako munuh si Josep.

¹⁹Nina kalak i samahsa, “Tengen kènè kaltu, adoi mo enggo roh tukkang nipi i.

²⁰Aci, sibunuh mo ia, janah sidabuhken mo bangkèna mi talaga sienggo ngkerrah. Sidokken mo taba bapa, enggo ijerngem biahat ia. Nai siidah mo tah bakunè lakona nipina i.”

²¹Terbertik ngo taba si Ruben arih kalak i, nai itulusi mo dalan paluahken si Josep. “Ulang ibunuh ia”, nina.

²²“Sidabuh sambing mo ia mi bagasen telaga silot i gurun pasir èn, tapi ulang siligas barang pè ugahen ia sibaing.” Idokken pè bagi, kerna dok atèna ipaluah ngo si Josep janah ipasulak ia balik mi rumah.

²³Soh kessa mo si Josep mendahi kakana i, mèter italkasi kalak i mo jubah si Josep simendè kalohon i.

²⁴Nai iruah kalak i mo ia, idabuh mo mi bagasen telaga sienggo ngkerrah.

²⁵Sidang mangan kalak i, mèter idah kalak i mo mentas nuhnuhen pertiga-tiga kalak Ismael merdalan i Gilead nai lako mi Mesir. Unta kalak i merembah rempah-rempah dekket damar.

²⁶Nai idokken si Juda mo taba kaka-anggina, “Kadè lapatenna sibunuh angginta i?

²⁷Lotin mo sidèa ia bai kalak Ismael adoi. Ulang pella sidersa ia. Bakunè nola pè, angginta ngo ia.” Tuju mo iakap kalak i,

²⁸janah mellus kessa mo pertiga-tiga kalak Midian i, itontoni kalak i mo si Josep i telaga i nai, idèa mo taba kalak Ismael merharga duapuluh kèpèng pirak. Nai iembah pertiga-tiga i mo ia mi Mesir.

²⁹Tikan idahi si Ruben telaga i oda nè i sidi si Josep, iribaki mo olesna kumerna bonekna.

³⁰Idahi mo anggina, nina mo, “Oda nè i sidi bagèndari ia. Bakunè mo kubaing bagèndari?”

³¹Nai isèat kalak i mo sada kambing, iguyui mo jubah si Josep dekket daroh kambing i.

³²Kessa i, ipasulak kalak i mo menaruhken jubah i mendahi bapa kalak i dekket tennah, “Jupa kami ngo jubah èn. Tah mada ngo baju anak bapa ndia èn?”

³³Nai itandai si Jakob mo jubah i, nina mo, “Tuhu ngo, jubah anakku ngo èn. Enggo pana ijerngem biahat ia. Nong ngalè enggo mo keppè matè ipersuragè biahat anakku.”

³⁴Iribaki si Jakob mo alesna kumarna bonekna iselluk mo pakèen merhendem. Tah piga ari dekkahna dak itangisi anakna i.

³⁵Karina anakna dekket berruna roh lako mengapoisa, tapi oda terapoen ia. Ai nina ngo, “Soh matè aku dak kutangisi ngo anakku i.” Bagi mo dak marsak ia kumernaken si Josep anakna i.

³⁶Tikan bagidi, idèa kalak Midian ngo si Josep i Mesir taba si Potifar, sada kalak èkuten pengabal bages raja.