Read Batak Dairi 1 Musa 38 Bible Online

1 Musa 38 - Batak Dairi bible

1 Musa 38

¹Tikala i laus mo si Juda menadingken kaka-anggina janah gabè merian rebbak dekket si Hira, sada anak laki asalna i kuta Adulam nai.

²Mersitandaen mo i sidi si Juda dekket sada kalak berru Kanaan, imo berru si Sua, nai jejap mo kalak i.

³Tubuh mo anak buka bajuna, ibaing bapana mo gerarna si Er.

⁴Tubuh nola mo peduaken tong ma daholi, ibaing mo gerarna si Onan.

⁵Tubuh nola mo petelluken tong ma daholi, ibaing mo gerarna si Sela. Tikan tubuh si Sela, i kuta Kesib ngo si Juda.

⁶Ipekabin si Juda mo si Er anakna situaen i dekket si Tamar.

⁷Luhlah ngo pengelako si Er, gabè melaga mo JAHOWA tabasa, ibunuh mo ia.

⁸Nai idokken si Juda mo katana taba si Onan anggi si Er, “Lako mo mendahi kalak purmaèn tading-tadingen kakamu, gelluhi mo ia. Garar utangmu bana, kumarna anggi simenokorsa ngo ko, merkitè bagidi ipecèndek kono mo pemparen kakamu.”

⁹Tapi ibettoh si Onan ngo, mula lot pè podiin èn dukakna, oda ngo pendikèi ia. Jadi gennep campur ia dekket sinibages kakana i, gabè mi ruar mo ibelli orè bennihna i, asa ulang lot pinempar kakana i.

¹⁰Melaga ngo JAHOWA midah pemaingna i, gabè ibunuh ma mo ia.

¹¹Kessa i nina si Juda mo taba kalak purmaènna i, “Molih mo kènè lebbè mi bages kalak silih partua ndènè, pèma mbelgah anakku si Sela.” Idokken pè bagi kumarna mbiar ngo, tah bakunè si Sela pè gabè ibunuh JAHOWA ma, bagè anakna sidua i. Nai molih mo si Tamar mi bages partuana.

¹²Daoh-daoh ariin, matè mo sinibages si Juda. Enggo kessa pul tikkina bonek, iarahken si Juda mo denganna si Hira kalak Adulam i laus mi Timna, imo bekkas menggonting bukbuk biri-birina.

¹³Terbertik ngo berita bai si Tamar naing roh simatuana si Juda mi Timna lako menggonting bukbuk biri-birina.

¹⁴Nai mersalin mo ia, igancihi mo pakèenna mebalu dekket pakèen sidèban. Itutupi ngo abèna, nai kundul mo ia i pèntu pengkeruhen kuta Enaim, imo dalan lako mi Timna. Ibettoh si Tamar ngo ntangkas, ukum si Syela anak si Juda siampun-ampun i, enggo mo mbelgah, tapi madèng ipejejap ia dekket anak perana i.

¹⁵Tikan idah si Juda si Tamar, idokken ngo daberru i sada kalak sibabijalang, kumarna abèna mertutup,

¹⁶nai ijolmiti si Juda mo ia mi biding dalan i, idokken, “Sadikè ipido ko?” Oda ibettoh purmaènna ngo keppè daberru i. Ialoi si Tamar mo, “Sadikè mo katè ndènè.”

¹⁷Idokken si Juda dèng ma, “Kuberèken pè bamu sada anak kambing.” Ialoi si Tamar mo, “Jadi, asal mo lot gadèna jèmakenku pèma itengesken kènè kambing i.”

¹⁸“Kadè mo sikira gadèna?” nina si Juda. Ialoi si Tamar mo, “Berèken mo bangku stèmpèl ndènè i dekket borgot bagi ma dekket tongket ndènè i.” Nai iberèken si Juda mo barangna i taba daberru i, janah campur mo kalak i, gabè mbadan mo si Tamar.

¹⁹Balik mo si Tamar mi sapona, iagoi mo gedda penutup abèna, janah ipakkèken nola mo pakèenna mebalu.

²⁰Oda pella ndekkah i sidi nai, ipasulak si Juda mo si Hira denganna i lako menaruhken kambing nijanjikenna i janah mengido balik barang-barangna niberèkenna mahan gadè, tapi oda lot jupa si Hira dekket daberru i.

²¹Dak kuso-kuso mo si Hira taba kalak Enaim i, “Idikè ngo daberru sibabijalang sidak biasa mèma i biding dalan èn?” “Oda nung lot daberru sibabijalang i sèn”, nina kalak i mengaloi.

²²Nai balik mo si Hira mendahi si Juda magahken, “Oda lot jumpa aku daberru i. Pendokken kalak nisidi, oda nung lot daberru sibabijalang i sidi.”

²³Nai nina si Juda mo, “Barang bana pè barang-barang i jadi, asal mo ulang mèla kita. Enggo ngo kupasulak ko menggarar, tapi oda jumpa kono ia.”

²⁴Enggo kessa kira-kira tellu bulan, terbertik mo bai si Juda ukum purmaènna si Tamar enggo luhlah bagè daberru sibabi jalang janah enggo mengkandong. Nai iperèntahken si Juda mo, “Alengi mo ia janah tutung mo ia soh matè.”

²⁵Tikan iarahken si Tamar mi ruar, itengesken mo tennahna taba simatuana, bagèen, “Sidasa barang-barang èn ngo maing aku mbadan. Perèso kènè mo isè sidasa stèmpèl, borgot dekket tongket èn.”

²⁶Nai itandai si Juda mo barang-barang i, nai idokken mo, “Oda ngo salah daberru i. Aku ngo oda mengulaken sibahanenku tersèngèt ia; nemmuken kin kennah kupekabin ia dekket anakku si Sela.” I sidi nai maknè nung campur si Juda dekket si Tamar.

²⁷Dapet kessa mo ketikana ketaring mo si Tamar, keppè leppa ngo dukakna i.

²⁸Sidang rabisen dèng ia, sada ibas sidukak si leppa i nai mendoroken tanganna, nai mèter icèkèp sibaso i mo tangan i janah irakut dekket bennang mbara. Nina mo, “Anak èn ngo perlebbè tubuh.”

²⁹Tapi iruah si dukak i nola ngo tanganna i molih, janah sidukak sisada nai ngo pelebbè tubuh. Nai idokken sibaso i mo, “Bagi mo keppè caramu menessak tubuh.” Jadi ibaing ngo gerar siperlebbè tubuh i si Peres.

³⁰Kessa i pè asa tubuh anggina imo tanganna sienggo lot bennang mbara. Ibaing mo gerarna si Zerah.