Read Batak Dairi 1 Musa 39 Bible Online

1 Musa 39 - Batak Dairi bible

1 Musa 39

¹Ukum si Josep iembah kalak Ismael ngo mi Mesir janah idèa bai si Potifar, sada kalak èkuten pengabal istana.

²Dak iurupi JAHOWA ngo si Josep, gabè dak merhasil ngo karina nibahanna. Merian i bages indukna ngo ia imo kalak Mesir i.

³Idah indukna ngo dak iurupi JAHOWA ngo si Josep janah kemulihkenna i dak selloh merhasil karina ndiulana.

⁴Ngkelleng ngo atè si Potifar midah si Josep, gabè ipebangkit mo ia mahan pengkebasi mi dirina; nai gabè ibaing mo si Josep mengurus bagesna dekket karina milikna.

⁵Mulai i sidi nai kumernaken si Josep gabè ipasu-pasu JAHOWA mo pendirien kalak Mesir i dekket karina silot bana i bages bang pè silot i juma.

⁶Karinana silot harta si Potifar isohken ngo bai si Josep. Merkitè bagidi oda pella nèngè ipikirken tersèngèt mengurus bagesna, laènken panganna. Ukum si Josep i maholi ngo.

⁷Enggo kessa barang sadikè dekkah, gabè laèn mo penèngen sinibages si Potifar taba si Josep, gabè iarahken mo ia asa rebbak meddem kalak i.

⁸Tapi oda ngo uè si Josep janah idokken mo ranana, “Sintabi mo nangè, enggo tok atè indukku si Potifar janah ipesakat karinana hartana bangku. Oda nè pella ipikirken barang kadè i bages èn.

⁹Ukum isèn dos ngo kuasangku dekket kuasana. Kadè poda mak enggo ipessoh taba aku, kènè nai ngo kessa mada. Mèter bakunè nola mo uè aku mengulaken ulaen jahat i, janah gabè merdosa aku taba Dèbata?”

¹⁰Tukasi pè ièlèk-èlèk sinibages si Potifar si Josep i gennep ari, tapi laju ngo oda uè ia rebbak meddem dekketsa.

¹¹Tikan sidari nderrang masuk si Josep mi bages lako mengulaken bahanna, isè poda i sidi.

¹²Mèter icèkèpi sinibages si Potifar mo jubah si Josep ninganna idokken, “Arko mo rebbak meddem kita.” Nai gumalèsang mo si Josep, maluah mo ia janah lojang mo ia mi ruar. Tapi ukum jubahna, tading ngo itangan daberru i.

¹³Idah sinibages si Potifar kessa mo enggo lojang si Josep keppè jubahna tading,

¹⁴idiloi mo naposona janah idokken mo, “Tengen kènè mo. Kalak Heber siniembah sinibalèngku mi bages èn mengelèai aku. Masuk ngo ia mi bilikku janah naing irampok aku, tapi mersurak mo aku nggang kalohon.

¹⁵Kerna idengkoh mersurak aku, gabè lojang mo ia mi ruar, tapi jubahna tading ngo.”

¹⁶Nai iboniken sinibages si Potifar mo jubah i pèma balik sinibalèna.

¹⁷Balik kessa mo sinibalèna, isukutken mo simasa i tabasa, nina mo, “Kalak Heber siniembahmu misèn, masuk mi bilikku, naing mengelèai aku.

¹⁸Tapi kumarna mersurak aku, gabè lojang mo ia mi ruar, janah tading mo jubahna.”

¹⁹Melaga kalohon ngo si Potifar.

²⁰Iperèntahken mo asa ndor itangkup si Josep janah ikurung mi bekkas kurungen raja.

²¹Tapi dak iurupi JAHOWA ngo si Josep janah masèh atèna bana, gabè ngkelleng mo atè èkuten kurungen i bana.

²²Ipesakat mo taba si Josep kalak sinikurungen sidèbanna i, janah taba si Josep ngo isohken karina bahaen siniulaken ibas kurungen i.

²³Oda nè pella iperdimata huntuen kurungen i karina sienggo ipercayaken bai si Josep, kumarna dak idengani JAHOWA ngo ia dak merhasil ibas karina bahanna.