Read Batak Dairi 1 Musa 41 Bible Online

1 Musa 41 - Batak Dairi bible

1 Musa 41

¹Enggo kessa lebbih dua tahun nai nola, datang mo nipi raja Mesir, bagè cara cènder ia rupana i biding laè Nil.

²Sintempu mèter rumuar mo pitu lembu nggomok-nggomok janah merèlèng-èlèng i laè i nai, janah menggagat mo i biding laè i.

³Kessa i rumuar nola mo pitu lembu sidèban, mèrung kalohon pellin koling-koling kirakut nai ngo. Cènder mo lembu mèrung i i gembar lembu nggomok i biding laè i.

⁴Nai ipangan lèmbu mèrung i mo lembu nggomok i. Kessa bagi terengnget mo raja i.

⁵Nai terpeddem nola mo ia, janah datang dèng ma mo nipina. Idah mo ibas nipina i pitu ngkerohi pagè mebrras janah enggo ntua, tubuh ipas sada tangkè nai.

⁶Nai tubuh ma mo pitu ngkerohi pagè sidèban, lambang janah pellin apa ibaing angin padang gurun.

⁷Nai mèter ibendut pagè lambang i mo pagè sipitu ngkerohi simberras i. Nai terengnget nola mo raja i, janah saddar mo ia, datang keppè nipina.

⁸Ceggenna i dak bulisah mo raja i, kumarna i ipasulak mo mendiloi karina nagguru dekket simpantas niasè ni Mesir. Isukutken mo nipina taba kalak i, tapi sada kalak poda ndorok magahken lapatna.

⁹Enggo kessa bagidi, ibagahken simenaku ènumen idi mo taba raja i, “Bagèndari kupertuhu mo kesalahenku.

¹⁰Tikala i melaga ngo raja i taba simahan roti dekket taba aku, gabè ikurung mo kami, i bages èkuten penjaga istana.

¹¹Tikan i sada berngin datang mo nipi nami sidua, janah oda ngo dos lapaten nipi nami i.

¹²Lot mo i sidi anak perana kalak Heber rebbak dekket kami. Ia kin ngo kettoken èkuten penjaga istana i. Kusukutken kami ngo nipi i tabasa, nai ibagahken mo lapaten nipi i.

¹³Keppè tuhu ngo masa bagè nidokkenna i, imo: Ipebangkit raja i ngo aku mi ulaenku tikala i, tapi ihukum kènè ngo matè simahan roti i.”

¹⁴Nai ipasulak raja i mo mengaleng si Josep, mèter ndor mo ia ikaruarken i kurungen nai. Enggo kessa mergonting ia janah mersalin, mèter idahi mo raja i.

¹⁵Idokken raja i mo mbangsa, “Lot ngo datang nipingku, tapi isè poda ndorok magahken alamatna. Jadi lot magahken bangku, kono nina ndorok peterangken lapaten nipi.”

¹⁶Ialoi si Josep mo, “Oda ngo aku alè Raja nami, tapi Dèbata ngo simerèken alamat nipi situhuna.”

¹⁷Nai itoriken raja i mo, “Kuipi, pana cènder aku i biding laè Nil.

¹⁸Nai rumuar mo i laè i nai pitu lembu nggomok-nggomok janah merèlèng-èlèng, nai menggagat mo ia i biding laè i.

¹⁹Enggo kessa i rumuar mo pitu lembu sidèban murung-murung, koling-koling kirakut nai ngo. Madèng pennah kuidah bagi merroha lembu i suberri Mesir.

²⁰Ipangani lembu rekkus i mo kerri lembu nggomok sipitu ndai.

²¹Tapi enggo kessa i, tong ngo rekkus lembu simèrung i. Nai terengnget mo aku.

²²Kessa bagidi terpeddem nola mo aku keppè datang nola mo nipingku, kuidah mo pana pitu ngkerohi pagè mberras janah enggo ntasak, tubuh ipas sada tangkè nai.

²³Nai kuidah ma mo pana tubuh pitu ngkerohi pagè lambang, janah ngkerrah mermpiuken ibaing angin gurun pasir.

²⁴Ibendut rohi lambang i mo rohi pagè mberras i. Enggo ngo nemmu kutoriken dua bagèna nipingku i taba nangguru, tapi sada kalak poda ndorok peterangken lapatenna.”

²⁵Nai nina si Josep mo taba raja i, “Dos ngo lapaten nipi ndènè sidua i alè Raja nami; enggo ibagahken Dèbata taba raja i kadè sinaing baingenna.

²⁶Lembu nggomok sipitu i imo magahken pitu tahun janah pitu rohi pagè mberras, i tong ma magahken pitu tahun; dos alamat sidua i.

²⁷Lembu rekkus sipitu i, siremuar podien, dekket sipitu ngkerohi pagè lambang janah ngkerrah mermpiuken kumarna angin gurun pasir imo magahken masa lèhè pitu tahun.

²⁸Bagè sienggo kudokken bai raja i, enggo ipacidah Dèbata bai raja i kadè sinaing pemasaenna.

²⁹Roh mo tikkina pitu tahun mbellen kiniduma i suberri nagerri Mesir.

³⁰Enggo kessa i roh mo tikki lèhè pitu tahun, janah gabè ilupaken mo tikki kiniduma i, kumarna lèhè matè kocing ngo lèhè i, gabè kadè nè poda tubuh i suberri nagerri èn.

³¹

³²Asa dua kali pè datang nipi raja i, alamat enggo itetahken Dèbata janah ndor mo i masa.

³³Kumarna i, selloh mo ipilih raja i sada kalak, kalak mpantas janah bijak janah iberrè bana kuasa lako mengatur nagerri èn.

³⁴Bagima kennah ipebangkit raja i ma mo pugabè-pugabè sidèban dèng ma, janah merkuasa lako menjaloi niperlima ipas karina pagè sienggo iperani sidekkah pitu tahun mbellen masa nduma i, nai ipedèmpu mo i gennep kuta ninganna ijagai.

³⁵

³⁶Nai pagè nipepulung i mo mahan pangaen sidekkah kelèhèen sipitu tahun sinaing roh mi Mesir. Merkitè bagidi oda uè matè melèhè karina jelma ginemgemmu.”

³⁷Raja dekket karina pugabèna mengoangken rencana si Josep i.

³⁸Nai idokken raja i mo taba kalak i, “Dok atèngku oda dapet kita nè sidèban mèter sellohen daripada si Josep, kumarna iajari tendi Dèbata ngo ia.”

³⁹Nai idokken raja i mo mbang si Josep, “Enggo ibagahken Dèbata i karina bamu, kumarna i kono nai ngo simpantasna bak sibijakna daripada barang isè nola pè i.

⁴⁰Kupebangkit mo ko gabè gubèrnur janah karina ginemgemku kennah menguèi perèntahmu. Aku nai ngo kessa merkuasa i babomu.”

⁴¹Enggo kessa bagi mèter italkasi raja i mo cincin i jari-jarina nai, ipakkèken mo bai si Josep ninganna idokken, “Dekket èn, kupebangkit mo kono gabè gubèrnur i suberri Mesir.” Nai iselukken mo bai si Josep sada jubah melèmus kalohon janah ibaing mi kerahongna borgot emmas.

⁴²

⁴³Nai iberèken mo taba si Josep kerèta kerajaen sipeduaken mahan dalan-dalanna, bagi ma penjaga kesangapen raja merdalan i lebbè kerèta i, ninganna dilo-dilo, “Kènè alè! Berrè kènè dalan i! Berrè kènè dalan!” Bagidi mo carana si Josep mbangkit gabè gubèrnur i Mesir.

⁴⁴Idokken raja i mo tabasa, “Aku ngo raja — janah enggo kutingtingken, ukum oda ngo ijinmu, isè poda ndorok i suberri Mesir memaing barang kadè pè.”

⁴⁵Ibaing raja i mo gerar Mesir taba si Josep, imo si Zafnat-Paaneah. Iberèken mo sada kalak sinibagesna mergerar si Asnat, berru si Potifera, imo imam i kuta Heliopolis. Merumur tellupuluh tahun mo si Josep tikan ia mbangkit mengula lako bai raja Mesir. Berkat mo si Josep i istana raja nai lako mengkulilingi suberri nagerri.

⁴⁶

⁴⁷Ibagasen sipitu tahun mbellen nduma i, iberèken tanoh i ngo hasil oda merkerri-kerriin.

⁴⁸Ipepulung si Josep mo pagè i janah ikebbenken i gennep kuta. I gennep kuta ikebbenken ngo pagè hasil juma sikuliling kuta i nai.

⁴⁹Kumarna buèna pagè nipepulung i, gabè oda pella nè isukati, kumerna buèna bagè kersik i biding laut.

⁵⁰Sinderrang madèng masa lèhè i, sinibages si Josep imo si Asnat menubuhken dua anak.

⁵¹Idokken si Josep mo, “Enggo ibaing Dèbata aku lupa i karina kinidersangku dekket taba kaum bapangku.” Kerna i ibaing mo gerar anakna situaen i si “Manasye.”

⁵²Idokken dèng ma, “Enggo iberèken Dèbata bangku dukak tikan mpersuk aku,” nai ibaing mo gerar anakna peduaken i “si Efraim”.

⁵³Enggo kessa pitu tahun tikki nduma i iakapi nagerri Mesir, mengadi mo.

⁵⁴Nai roh mo tikki kelèhèen pitu tahun ma, tosè bagè sienggo ibagahken si Josep. Masa mo kelèhèen i suberri tanoh èn, tapi ukum i nagerri Mesir lot ngo taha-taha pangaen.

⁵⁵Enggo kessa terasa lèhè i taba jelma ginemgem i Mesir, ipido kalak i mo pangaen taba raja i. Nai ipasulak raja i mo kalak i mendahi si Josep janah kennah menguèi karina barang kadè iperèntahken si Josep taba kalak i.

⁵⁶Enggo kessa makin mpiahna lèhè i selli mi suberri aur, ibuka si Josep mo karina langgih, idèa mo pagè i taba kalak Mesir.

⁵⁷I suberri dunia èn nai roh ngo kalak i mi Mesir lako menokor pagè bai si Josep nai, ai lèhè matè kocing ngo kelèhèen i barang i dikè sambing pè.