Read Batak Dairi 1 Musa 42 Bible Online

1 Musa 42 - Batak Dairi bible

1 Musa 42

¹Idengkoh si Jakob ngo berita, ukum i Mesir lot ngo pagè, nai nina mo taba dukak-dukakna, “Kasa ndong-ndong sambing kènè?

²Kudengkoh lot ngo nina pagè i Mesir; misi mo kènè menokor pagè asa ulang matè melèhè kita.”

³Nai berkat mo kaka si Josep si sipuluh kalak i mi Mesir lako menokor pagè.

⁴Tapi ukum si Benjamin anggi si Josep kalohon i, oda ngo iberrè si Jakob dekket rebbak kalak i, ai mbiar ia tah bakunè lot mara bai anakna i.

⁵Kumarna kelèhèen ngo i Kanaan, gabè mèduk ngo sidèban pè rebbak dekket dukak-dukak si Jakob laus mi Mesir lako menokor pagè.

⁶Ukum simerdèa pagè taba jelma siroh i suberri dunia èn nai, si Josep ngo, ai ia ngo gubèrnur i Mesir. Kumarna i kaka si Josep i pè mendahisa ngo roh janah mersembah bana.

⁷Idah si Josep kessa mo kakana i, itandai ngo kalak i, tapi ipekulah mo bagè cara oda itandai. Isergang mo kalak i mengkusoken, “Kalak dikè ngo kènè?” “Kalak Kanaan ngo kami. Roh ngo kami lako menokor pagè,” nina kalak i mengaloi.

⁸Tukasi pè ukum si Josep itandai ngo kakana i, tapi ukum kakana i oda ngo itandai kalak i ia.

⁹Nai terèngèt mo ia mi nipina tersèngèt kalak i. Idokken mo taba kalak i, “Kuidah bagè mata-mata ngo kènè; roh kènè mi sèn lako menengen kadè kekurangen nagerri nami èn.”

¹⁰“Oda ngo raja nami,” nina kalak i mengaloi. “Pellin lako menokor pangaen ngo kami asa roh, alè Raja nami.

¹¹Merkaka-kuanggi ngo kami alè raja nami. Kalak borjok ngo kami, oda ngo mata-mata.”

¹²Idokken si Josep mo taba kalak i, “Luap ngo kè. Roh kènè mi sèn lako menengen kadè kekurangen nagerri èn ngo.”

¹³Ialoi kalak i mo, “Ukum kami sipuluh dua ngo sibeltek alè raja nami, sada ngo bapa nami i tanoh Kanaan. Sada bai nami nai enggo matè janah siampun-ampun i rebbak bapa nami ngo ia bagèndari.”

¹⁴“Tuhu ngo bagè sikudokken i, mata-mata ngo kènè,” nina si Josep mengaloi.

¹⁵“Kuoji mo kènè lebbè: Kumangmangken mo ibas gerar raja, oda ndorok dèng itadingken kènè nagerri èn, kum makdèng roh anggi ndènè siampun-ampun i mi sèn.

¹⁶Kennah balik sada kalak bai ndènè nai mengalengisa. Sidebanna itahan mo lebbè, soh terbukti sinidokken ndènè i. Kum mada ngo mata-mata musuh ngo kènè.”

¹⁷Nai ipemasuk mo kalak i mi kurungen tellu ari dekkahna.

¹⁸Petellu ariken idokken si Josep mo taba kalak i, “Kalak merkebiaren janah menguèi Dèbata ngo ukum aku. Ndorok ngo kè kupaluah dekket sarat.

¹⁹Lako membuktiken kalak bujur kènè, sada kalak mo bai ndènè nai itahan i kurungen èn; sidèbanna ndorok balik ninganna merembah pagè nitokor ndènè i bai dukak-dukak ndènè simenggongken lèhè sendah bagèndari.

²⁰Nai arahken kènè mo anggi ndènè siampun-ampun i mendahi aku. Idi mo tandana sikali èn magahken tuhu ngo rana ndènè i, asa ulang kuhukum matè kènè.” Tuju ngo iakap kalak i bagè pendokken gubèrnur i.

²¹Nai merarih mo kalak i samahsa, “Idi mo, hukum ngo èn bagèndari banta, kumernaken kesalahenta taba angginta tikala i; mersembah merkuraja ngo ia tikala i, tapi oda siparduliken, tukasi pè siidah mpersah kalohon iakap. Ingo memaingken asa mengakapken ndersa kita bagèndari.”

²²Nai idokken si Ruben mo, “Otang tikkina i pè kudokken ngo taba kènè, asa ulang ikekadè ia. Tapi oda uè kè mendengkohken ranangku i. Bagèndari enggo roh bales permatèna i banta.”

²³Iantusi si Josep ngo rana kalak i, tapi oda ibettoh kalak idi i, kumarna mengerana pè kalak i dekket si Josep, merkitè sada kalak pandè bahasa ngo.

²⁴Nai itadingken si Josep mo kalak i, ninganna tangis. Enggo kessa ndorok nola ia menghempek karina ukurna janah ndorok mengerana, idahi nola mo kalak i, idokken mo asa ièkèti si Simeon i lebbè-lebbè kaka-anggina i.

²⁵Iperèntahken si Josep mo, asa isini karina baka perembahen kakana i dekket pagè janah riar kalak i pè ipemasuk mi bakana gennep. Bagima asa iberèken bekkel i dalan. Karina perèntahna i ibahanken mo.

²⁶Enggo kessa i iampèken kaka si Josep mo pagè sienggo itokor i mi babo kalodè, nai berkat mo kalak i i sidi nai.

²⁷I bekkas permalamen kalak i, lot mo sada kalak memuka bekkas pagèna, kumarna naing merrè mangan kalodèna ia. Keppè idah mo riarna i babo pagè i.

²⁸“Iah, iulakken ngo riarku i,” nina taba dengan sibeltekna i. “Tengen kènè mo ipas bakangku èn ngo.” Makin buradan mo kalak i, janah ibagasen mbiar mersikosoen mo kalak i samahsa, “Kasa bagi pemaing Dèbata banta?”

²⁹Soh kessa kalak i mi Kanaan, isukutken kalak i mo taba bapana karina sinialamen kalak i.

³⁰Nina kalak i, “Toko ngo laga gubèrnur Mesir i mengerana taba kami, janah idokken nola kami mata-mata mi nagerri kalak i.

³¹Kudokken kami ngo, ‘Ukum kami kalak bujur ngo, oda ngo mata-mata, kalak selloh ngo kami.

³²Sipuluh dua ngo kami sibeltek sada bapa, sada enggo matè, ukum siampun-ampun tading ngo rebbak bapa i Kanaan.’

³³Idokken gubèrnur i ngo bai nami, ‘Naing kuoji ngo kènè tah tuhu ma kalak bujur kènè: Tading mo lebbè sada kalak bai ndènè nai; sidèbanna ndorok balik merembah pagè i taba dukak-dukak ndènè simenggong lèhè i.

³⁴Mula enggo mulak nola kènè mi sèn janah mengarahken siampun-ampun ndènè i, kubettoh mo oda mata-mata kènè keppè, tapi kalak bujur ngo. Nai kupaluah mo dengan smbeltek ndènè sikutahan i, balik bai ndènè janah ndorok mo kènè merian i ladang nami èn janah bèbas mertiga-tiga.’ ”

³⁵Nai tikan isalini kalak i baka bekkas pagè kalak i, idah kalak i bagut-bagutna gennep merisi riar, nai buradan mo kalak i.

³⁶Nai nina bapa kalak i mo, “Kènè ngo maing aku kembalangen karina anakku. Si Josep oda lot nèngè; si Simeon pè maknè lot; janah bagèndari naing iembah kènè dèng ma si Benjamin. Nang ngalè nang. Bakunè nai ngo ndia akapenku èn!”

³⁷Nai idokken si Ruben mo taba bapana, “Sohken mo si Benjamin bangku o pa; kuembah pè ia balik mi sèn, mella oda bunuh mo pa kempumu sidua kalak i.”

³⁸Tapi nina si Jakob mo, “Mak ndorok. Ukum si Benjamin mak ndorok iarahken kènè; kakana enggo matè, bagèndari pellinsa nai ngo kessa tading. Tah bakunè mermara ia i tengah dalan i. Aku enggo tua-tua, uè ngo bonek niperembahken ndènè i pedor aku matè.”