Read Batak Dairi 1 Musa 43 Bible Online

1 Musa 43 - Batak Dairi bible

1 Musa 43

¹Makin ntengamna ngo lèhè i tanoh Kanaan, janah kerri kessa mo ipangan simpangaen si Jakob pagè niembahna i Mesir nai, nina si Jakob mo taba dukak-dukakna, “Lakè nola mo mi Mesir menokor pagè mahan panganta.”

³Jadi idokken si Juda mo taba bapana, “Enggo kin memmes ipesèngèt Gubèrnur Mesir i kami mendokken mak ndorok roh kami mi hadeppenna, mula oda kuembah kami dèdahen nami i.

⁴Mula ipadiat bapa ngo dekket dèdahen nami i, uè ngo kami laus mi sidi menokor pangaen.

⁵Tapi mula oda ipadiat bapa si Benjamin dekket, oda kami uè laus, kumarna enggo kin idokken gubèrnur i oda ndorok kami roh mengadep ukum mak dekket dèdahen nami i.”

⁶Nina si Jakob mo, “Kasa isusahi kènè aku merkitè ibagahken kènè bana lot dèng ngo dèdahen ndènè?”

⁷Ialoi kalak i mo, “Dak iseksek ngo kami tersèngèt karina kita sisimpangaen, ai nina ngo, ‘Nggelluh dèng ngo bapa ndènè? Lot dèng ngo daholi dèdahen ndènè?’ Nai kennah ngo kualoi kami kuso-kusona i. Ai kubettoh kami kin gabè idokken kennah kuarahken kami nola dèdahen nami i?”

⁸Nai idokken si Juda mo taba bapana i, “Padiat mo si Benjamin janah aku mo mertanggung jabab tersèngèt ia. Kusudu kami pè merdalan asa ulang sanga lot matè rapar banta nai.

⁹Aku mo menjaminsa, janah bangku nai mo tunggu ia. Mula oda kuembah ia balik merkinijuah, aku mo menanggung hukum sidekkah nggelluh.

¹⁰Ukum oda kin bagidi dekkahna dak terendep-endep kita, tentu enggo mo nemmu dua kali nola kami laus roh.”

¹¹Nai idokken bapa kalak i mo, “Mula kennah bagidi nai ngo lakona, embah kènè mo luah ndènè hasil simerandalna i kutanta èn nai bai gubèrnur i: imo nditak, tenggoli, rempah-rempah, buah kerras dekket buah badem.

¹²Embah kènè mo riar dua kali lempit, ai kennah ulakenken ndènè ngo riar sijumpa ibas baka ndènè tikala i. Tah bakunè lupana kin i.

¹³Arahken kènè mo dèdahen ndènè i, janah ndor mo kènè balik.

¹⁴Katerra pè masèh mo atè gubèrnur i midah kènè ibaing Dèbata perkuasa i, asa iolihken si Benjamin dekket si Simeon taba kènè. Tersèngèt aku, mula kennah mago mo keppè dukak-dukakku karinana, ueh bakunè nibaing.”

¹⁵Nai iembah kaka-anggi si Josep mo luahna dekket riar dua kali lempit, nai berkat mo kalak i rebbak dekket si Benjamin mi Mesir. Soh kessa mo kalak i, ihadep kalak i mo si Josep.

¹⁶Idah si Josep kessa mo si Benjamin dekket karina kakana i, idokken mo taba naposona, “Arahken mo kalak i mi bagesku. Naing rebbak mangan ngo aku cèger ari èn dekket kalak i, jadi sembellih mo sada pinakan, janah kebbasi kènè mo i.”

¹⁷Ibahanken perkebbas i mo bagè nidokkenna i, iarahken ma mo dekket kaka-anggi si Josep i mi bagesna.

¹⁸Iarahken kessa mo kalak i mi bages si Josep, buradan mo kalak i ninganna mersura-sura, “Dok atè iarahken pè kita misèn kumernaken riar sijumpa kita ipas bakanta tikan kita misèn tikala i ngo. Ai naing itangkup kalak i mo kita simpusta, nai irampasi mo kalodènta janah iperhamba mo kita.”

¹⁹Kernana i, i gembar pèntu bages si Josep idokken kalak i mo taba perkebbas i,

²⁰“Sintabi mo alè tuan, ukum kami enggo ngo pernah roh misèn menokor pangaen.

²¹Tikan balik kami, nai i permalamen, kubuka kami ngo baka nami. Keppè karina riar tokor pagè i jumpa kami nola i babo pagè i. Oda kubettoh kami tah isè maing riar i mi sidi. Bagèndari enggo kuembah kami bai ndènè alè Tuan. Janah dèng ma kuembah kami ngo penokor pagè nola.”

²³Idokken perkebbas i mo, “Ulang kènè mbiar. Ulang rembekbekken. Dèbatamu sinisembah partuamu ngo memasukken riar i mi bagasen baka ndènè i. Enggo kin ngo kujalo penggarar pagè idi bamu nai.” Nai iarahken mo si Simeon mendahi kalak i,

²⁴nai itaruhken mo kalak i mi bages. Iberèken dèng ma ngo bai kalak i laè mahan morih nèhè, bagi ma pangaen kalodè kalak i.

²⁵Kessa bagi irongkari kalak i mo luah sinaing berèenkenna bai si Josep, roh kessa ia cèger ari, kumarna enggo kin ngo ibagahken taba kalak i, naing rebbak mangan kalak i dekketsa.

²⁶Soh kessa mo si Josep mi bages, iberèken kalak i mo luah i bai si Josep ninganna mersembah tabasa.

²⁷Ikusoken si Josep mo tersèngèt kalak i, idokken mo, “Enggo nung isukutken kènè taba aku tersèngèt bapa ndènè sienggo tua-tua i. Bakunè ngo ia bagèndari? Njuah-njuah ngo?”

²⁸Ialoi kalak i mo, “Sentabi mo alè raja nami, ukum bapa nami i njuah-njuah ngo.” Nai mersembah mo kalak i tabasa.

²⁹Idah si Josep kessa mo si Benjamin, anggina i, idokken mo, “En ngo anggi ndènè siampun-ampun i siniranaken ndènè bangku i? Katerra pè ipasu-pasu Dèbata mo ko alè pa.”

³⁰Mbencet ngo ukur si Josep kumarna enggo messeng nteddohna dekket kumarna ngkelleng atèna midah dèdahenna i. Enggo hampir maknè terhempeksa dirina, kumernakenna i sintempu mèter laus mo ia i sidi nai, mi bilikna ninganna tangis.

³¹Enggo kessa i merduhap mo ia, nai karuar nola mo ia ninganna kipessel ukurna, idokken mo asa ipehantar pangaen.

³²Laèn ngo mèja si Josep mangan i, janah kaka-anggina i mèja sidèban. Kalak Mesir nisidi mangan ma i mèja sidèban, ai merlèa ngo pengakap kalak i mula rebbak mangan dekket kalak Heber.

³³Ukum kaka-anggi si Josep pedempak mo ibaing dekket mèja si Josep, mengèkutken umurna gennep, mulai i situaen nai soh mi siampun-ampun. Idah kalak i kessa mo cara perkundul i, mersitengenen mo kalak i janah lengang.

³⁴Pangaen kalak i pè ibuat i meja si Josep nai ngo, tapi ukum si Benjamin lima kali lempit ngo pengkebasina daripada kakana i. Nai mangan mènum mo kalak i rebbak dekket si Josep soh pulak.