Read Batak Dairi 1 Musa 50 Bible Online

1 Musa 50 - Batak Dairi bible

1 Musa 50

¹Ipegalè si Josep mo dirina mi daging bapana i ninganna tangis janah menanggohi abèna.

²Nai iperèntahken si Josep mo taba sibaso asa i sirai bangkè si Jakob i,

³Empatpuluh ari ngo dekkahna mengulaken i, imo biasana tikki lako menirai bangkè. Nai merhendem mo kalak Mesir pitupuluh ari kira pesangapken si Jakob.

⁴Enggo kessa pul tikki merhendem idokken si Josep mo taba naposo raja, “Pesoh mo tennahku èn taba raja i,

⁵‘Tikan naing roh ajal bapangku, idokken ngo asa kujandiken bana, asa kukuburken ia i kuburen sienggo ipèmaken kin i tanoh Kanaan. Kerna i, paduè mo aku laus mengkubur bapangku. Kessa pul i, balik ngo aku mi sèn.’ ”

⁶Nai idokken raja i mo, “Berkat mo ko lako mengkubur partuamu bagè sienggo ijandiken kono i tabasa.”

⁷Nai berkat mo si Josep menaruhken bapana i mi kuburen. Karina pugabè raja, pengetua-pengetuai istana dekket karina simersangap Mesir rabakken berkat ngo dekket si Josep.

⁸Simpangansa kaka-anggina dekket kadè-kadèna sidèban i pè dekket ma ngo. Pellin anak-anak bak pinakan kalak i mo kessa tading i ladang Gosyen.

⁹Soridadu merkurèta bak merkuda pè dekket ngo, asa nggeddang kalohon ngo nuhnuhen i.

¹⁰Soh kessa mo kalak i mi bekkas kalak mengerrik pagè i Goren-Haatad kan kebincaren laè Jordan, derru-derru mo kalak i nggang kalohon kumarna bonekna. Nai ibaing si Josep mo acarana mengendasi pitu ari dekkahna.

¹¹Idah pengisi Kanaan i kessa mo acara mengendasi i, nina kalak i mo. “Sondel ngo bonekna acara mengendasi kalak Mesir i.” Kumernaken i ngo asa igerari kalak i bekkas i Abel-Mizraim.

¹²Bagi mo ipesaut dukak-dukak si Jakob bagè nitennahken si Jakob i taba kalak i.

¹³Iembah kalak i ngo bangkèna mi tanoh Kanaan janah ikubur mi bagasen liang Makhpela kan kebincaren Mamre, i bekkas juma sienggo itokor si Abraham kin bai si Efron kalak Het i nai, ibaing gabè pekuburen.

¹⁴Enggo kessa ikubur si Josep bapana i, mulak mo ia mi Mesir rebbakken dekket kaka-anggina bak karina kalak simengèkutkensa lako mengkubur bapana i.

¹⁵Enggo kessa matè bapa ni kalak i, idokken kaka si Josep i mo, “Bakunè ngo sibaing mula nggettem atè si Josep, janah mula ibales kejahatenta arnia?”

¹⁶Kumarna i itennahken kalak i mo bai si Josep, “Sinderrang madèng matè bapanta arnia,

¹⁷isuruh ngo kami mendokken mendahi kono bagèen, ‘Ampuni mo sinibaing kaka-kakamu i arnia taba ko.’ Jadi, bagè naposo Dèbata nisembah bapanta i, kupido kami bamu, Ampuni mo kesalahen nami sienggo kubaing kami bamu.” Tangis mo si Josep tikan soh kessa bana tennah i.

¹⁸Nai roh mo dengan sibeltekna i mersembah i hadeppenna, ninganna mendokken, “Naposomu ngo kami.”

¹⁹Tapi nina si Josep mo taba kalak i, “Ulang kènè mbiar; ai oda ndorok aku maing bagè Dèbata.

²⁰Tuhu enggo merarih kènè maing jahat taba aku, tapi iobah Dèbata ngo kejahaten i gabè mendè, asa merkitè simasa arnia i mèduk jelma singgelluh bagèndari gabè terpaluah.

²¹Ulang kènè rembekbekken, kupehèdu-hèdu pè kènè dekket dukak-dukak ndènè.” Bagi mo ibaing peposken ukur kalak i merkitè kata melamlam, nai gabè melui mo ukur kalak i.

²²Tong ngo merian i Mesir si Josep dekket kadè-kadèna i; nggelluh ngo ia soh merumur seratus sipuluh tahun.

²³Sanga ngo idah dèng anak bak kempu si Efraim. Sanga ma ngo idèdah dukak-dukak si Makhir, imo kempu si Manasye, bagè dukakna sendiri.

²⁴Nina ngo taba kaka-anggina, “Ukum ajalku enggo ndessing, tapi ipehèdu-hèdu Dèbata ngo kènè janah mengarak kènè karuar i nagerri èn nai, mi nagerri sienggo iperbagah kin merdengan bulaban taba si Abraham, si Isak dekket si Jakob.”

²⁵Nai idokken si Josep mo taba karina kadè-kadèna i asa isumpahken, nina mo, “Jandiken kènè mo taba aku, mula iarak Dèbata kènè mi nagerri i, kennah embahen ndènè ma ngo tulan-tulanku.”

²⁶Nai matè mo si Josep i Mesir tikan merumur seratus sipuluh tahun. Nai irempah-rempahi kalak i mo bangkèna janah ipemasuk mi palongen.