Read Batak Dairi 1 Musa 8 Bible Online

1 Musa 8 - Batak Dairi bible

1 Musa 8

¹Oda ngo lupa Dèbata taba si Noak dekket binatang-binatang silot ibas keppel i. Menempul mo angin ibaing Dèbata gabè mulai mo surut laè i.

²Ipètut mo karina takal laè i terruh tanoh dekket pèntu laè i langit. Udan pè enggo leggo

³janah makin surutna mo laè i. Enggo kessa 150 ari oda sadikè ndates nè laè i.

⁴Tupung anggara kolom bulan pekepitu, songket mo keppel i i sada pucuk delleng Ararat.

⁵Terrus mo makin surut laè i, asa tupung antia bulan pekesipuluh, mulai mo taridah pucuk-pucuk delleng.

⁶Enggo kessa empatpuluh ari nai nola, ibuka si Noak mo jendèla keppel i,

⁷janah ipaluah mo sada kak. Oda ngo balik kak i mi keppel, tapi mayap-ayap ngo, soh surut kalohon laè i.

⁸Ningan bagidi ipaluah si Noak nola mo sada ndarapati asa ibettoh tah enggo tuhu surut laè i.

⁹Tapi kumarna iremrem laè i dèng ngo sisik tanoh i oda lot jupa ndrapati i bekkasna seggep. Nai balik ngo ia mi keppel i; idoroken si Noak mo tanganna, ninganna kipebengket mi keppel i.

¹⁰Ipèma si Noak mo pitu ari nai, nai ipaluah nola mo ndarapati i.

¹¹Cibonna, balik ngo ndarapati i mendahisa merembah serambar bulung Zaitun meratah dèng i pagutna. Ibettoh si Noak mo enggo keppè surut laè i.

¹²Enggo kessa ipèma pitu ari nai, ipaluah nola mo ndarapati i sikali nai, ukum sikali èn, oda balik nè ndarapati i mendahisa.

¹³Tikan merumur si Noak 601 tahun, tupung Antia bulan pekesada, enggo surut laè i karina. Ibuka si Noak mo saong keppel i, janah itatap kuliling. Idah mo, enggo ngkerrah sisik tanoh i.

¹⁴Ari Cukerra duduk bulan pekedua, enggo ngo ngkerrah tanoh èn.

¹⁵Nai nina Dèbata mo taba si Noak,

¹⁶“Ruar mo ko i keppel i nai rebbak dekket sinibagesmu, anakmu dekket sinibagesna.

¹⁷Pedarat mo karina manuk-manuk dekket binatang sidèbanna i, mbelgah barang kètèk pè, asa meppar kalak i janah mèrap mi suberri tanoh èn.”

¹⁸Nai karuar mo si Noak i keppel i nai rebbak dekket sinibagesna, anakna dekket sinibages kalak i.

¹⁹Karina manuk-manuk dekket binatang darat karuar ma i keppel i nai, gennep mersiteppet horongna.

²⁰Ipajek si Noak mo sada langgaten pemèlèen bai Dèbata. Itangkup mo gennep matcam manuk-manuk dekket binatang halal, nai ipèlèken mo mahan pèlèen situtungen i babo langgaten i.

²¹Meliup mo baungkus pèlèen i pesennangken ukur JAHOWA, nai nina mo ibas ukurNa, “Oda nè Kuhukum dunia èn ukum kumarna ulah-ulah jelma; Kubettoh mulai bajar dèng pè enggo mo jahat sura-sura jelma i. Oda nèngè Kuripasken karina singgelluh bagè sienggo Kubaing i.

²²Sidekkah lot dunia èn, kennah masa mo mosim menuan dekket mosim merani, mosim mbergoh dekket mosim mpeddas, mosim leggo dekket ari perudan, berngin dekket mahar.”