Read Batak Dairi 2 Samuel 1 Bible Online

2 Samuel 1 - Batak Dairi bible

2 Samuel 1

¹Enggo kessa matè si Saul, molih mo si Daud i pergerahanna nai mengalo kalak Amalek, nai merian i kuta Ziklag mo ia dua ari.

²Sibarembenkenna roh mo sada kalak naposo i undung-undung si Saul nai. Mahan tanda merhendem, enggo mo iribaki olesna janah ibaing tanoh mi babontakalna. Idapetken mo si Daud ninganna sujud i hadeppenna.

³Ikusoi si Daud mo ia, “Idikè nai ngo kono?” Ialoi mo, “Mperrus i perundung-undungen kalak Israel nai ngo aku.”

⁴Ikusoi si Daud dèng ma, “Bagahken mo kadè masa.” Ialoi naposo i mo, “Mperrus ngo enggo balapergunggung nami ipas geraha i nai, janah enggo mèduk matè, bak si Saul dekket si Jonatan pè.”

⁵“Bakunè pemettohmu?” nina si Daud mbangsa.

⁶Ialoi mo, “Tupung ngo aku i Delleng Gilboa, nai kuidah mo si Saul tunandè mi kujurna, keppèken kurèta bak soridadu musuh simerkuda, enggo ndessing mengkubusa.

⁷Nai tumulih mo si Saul mi podi, gabè idah mo aku, gabè idilo mo aku, nai kualoi mo, ‘Uè alè raja nami,’ ningku.

⁸Ikuso mo barang isè aku, nai kubagahken mo, kalak Amalek ngo aku.

⁹Nai idokken mo taba aku, ‘Mi sèn mo ko, janah bunuh mo aku. Mparah kalohon ngo ugahku, matè nai ngo aku.’

¹⁰Nai kujolmiti mo ia, janah kubunuh mo, ai kubettoh mula geppah ia kumarna maknè tahan cènder, bakunè pè matè nai ngo ia. Kessa i kubuat mo rudang i takalna nai, bak gellang i tanganna nai, kuembah mi sèn bai Raja nami.”

¹¹Mendengkoh i, iribak si Daud mo olesna kumarna bonekna, gabè karina ma mo parangenna maing bagidi.

¹²Mengandung mo kalak i janah puasa soh berngin lako menghormati si Saul dekket si Jonatan bang bai kalak Israel ummat JAHOWA, kemulihken buèna matè mergeraha i.

¹³Enggo kessa i ikusoi si Daud mo naposo simerembah berita i, “Kalak dikè ngo ko?” Ialoi mo, “Kalak Amalek ngo aku, sada kalak pengeranto mi nagerrimu èn alè raja nami.”

¹⁴Idokken si Daud mo, “Pangna i ko memunuh raja nipilih JAHOWA.”

¹⁵Nai idilo mo sada kalak parangenna, idokken mo mbangsa, “Bunuh mo ia.” Nai iaccong mo anak perana Amalek i soh matè.

¹⁶Idokken si Daud mo taba kalak Amalek i, “Kono sendiri ngo maing hukum matè bamu merkitè iaku kono memunuh raja nipilih JAHOWA.”

¹⁷Enggo kessa i mernangen mo si Daud lako menangisi si Saul bak si Jonatan,

¹⁸janah idokken asa ipeddahken i bai marga Juda. (Nangen èn tersurat ipas Bukku Jasar).

¹⁹“Nongalè Israel, i babo dellengmu, i sadoi mermatèen lubalangmu, imo dukak-dukak bangsami rabbat ngo kalak i sikira bunga bangsa.

²⁰Katerra pè ulang mo nemmu terbettoh bai kalak Gad berita i. Ulang mo nemmu ibettoh Askelon berita tersèngèt i. Asa ulang mersurak-surak berru Palistin i ulang meroang-oang berru kalak perbuah langgè i.

²¹Kènè alè delleng Gilboa, dengkohken mo sorangku: Ulang mo nemmu lot hembun bak udan mi babomu! Ngkerrah kerring mo juma bak jampalenmu. Kumarna i sidi ngo mastak tambeng-tambeng kalak brani. Tambeng-tambeng si Saul pè enggo karaten, maknè iminaki.

²²Biasana mahantu ngo panah si Jonatan, janah memaing matè. Peddang si Saul pè oda kin ngo menandai masèh atè memunuh musuh, menumpatken alo.

²³Ramah kalohon ngo si Saul bak si Jonatan janah ikekelengi; dak ngo rebbak nggelluh bang pè matè; nderrasen ngo kalak i daripada manuk-manuk rajawali, gegohen daripada singa bajar nai.

²⁴Kènè alè berru Israel, tangisi kènè mo si Saul raja ndènè i! Sienggo memakè kènè merkitè pakèen mbara mbèrèng i, janah merèken pakèenmu merkitè permata merandal i.

²⁵Enggo mo mermatèen lubalang-lubalang matè tikan pergerahaen i uruk-uruk simelongo i si Jonatan gampar enggo nggoh.

²⁶Alè Jonatan silihku, bonek kalohon ukurku kumarna soh mo mahargana kono bangku. Mermulia kalohon ngo ngkelleng atèmu bangku, ai buèen ngo i daripada ngkelleng atè daberru.

²⁷Enggo mermatèen lubalang bangsa. Magosia karina senjata kalak i!”