Read Batak Dairi 2 Samuel 11 Bible Online

2 Samuel 11 - Batak Dairi bible

2 Samuel 11

¹Cemmalna laus ngo raja-raja geraha enggo kessa salpun tahun mbaru. Asa tikan salpun tahun mbaru tahun na i ipasulak si Daud mo si Joab rebbak dekket perwirana bak karina tenterra Israel juhap lako geraha; nai italuken kalak i mo kalak Amon janah ikubu mo kuta Raba. Tapi ukum si Daud tading ngo i Jerusalem.

²Tikan mayak bon ari, kessa ndungo si Daud, merdalan-dalan mo ia i babo ntarum istana sindèas i. Idah mo i sidi nai sada kalak daberru mberru kalohon meridi.

³Nai ipasulak si Daud mo mengkuso, isè ngo daberru i. Jadi ibagahken mo bana si Batsyeba ngo gerar daberru i; bapana mergerar si Eliam, simenokorsa imo si Uria kalak Het.

⁴Nai ipasulak si Daud mo meraleng daberru i. Roh kessa daberru i mi istana, gabè rabbak meddem mo si Daud dekketsa. (Tupung ngo rembaru dèng merpangir si Batsyeba kumarna kerohen bulan). Nai molih mo ia mi bagesna.

⁵Kessa bagi, irasaken si Batsyeba mo mulai mengkandong ia, gabè itengesken mo berita i taba si Daud.

⁶Nai mèter iperèntahken si Daud mo taba si Joab, “Pasulak mo si Uria kalak Het i roh mendahi aku.” Nai ipasulak si Joab mo si Uria mendahi si Daud.

⁷Tikan menghadep raja Daud si Uria, ikuso-kusoi raja i mo tersèngèt bakunè si Joab dekket parangen Israel, bagi ma bakunè perdalan geraha i.

⁸Nai idokken si Daud mo taba si Uria, “Lako mo mi bagesmu perohken kessah giam sigejap.” Enggo kessa karuar si Uria i istana nai, mèter itengesken si Daud mo hadiah mi bages si Uria.

⁹Keppèken oda ngo mi bagesna si Uria laus, tapi meddem ngo ia i pèntu pengkeruhen istana rebbak dekket penjaga raja.

¹⁰Lot mo magahken i taba si Daud. Nai ikusoi mo si Uria, “Idèng ko roh i perdalanenmu ndaoh nai kasa oda mi sapomu kono?”

¹¹Ialoi si Uria mo, “Sidang juhap mertuhu-tuhu ngo tenterra Israel bak Juda janah Pèti Perpadanen JAHOWA pè mendengani kalak i ngo; si Joab pakallima nami dekket pengendengna merundung-undung i jampalen ngo. Nai mèter aku nola mo balik mi bages mangan mènum bak rebbak meddem dekket sinibagesku? Bagè sèntengna nggelluh Rajai nggelluh dekket kessahku, oda uè aku mahanken bagidi.”

¹²Nai nina si Daud mo, “Kono mo mula bagi, ndong mo ko i sèn sidari èn janah ceggen baremben kupaduè mo ko laus.” Jadi i Jerusalem mo si Uria sidarinkenna i. Sibarembenkenna idilo si Daud mo ia mangan.

¹³Nai mangan mo ia, janah iberrè bana mbuè mènum gabè mabuk mo ia. Tapi bernginkenna i nola ma pè oda ma ngo laus si Uria mi sapona, meddem rebbak perjaga ngo ia meralasken salimutna.

¹⁴Sibarembenkenna i, isurat si Daud mo suratna taba si Joab janah itengesken arap si Uria.

¹⁵Kata surat i, “Baing mo si Uria kan dikè geraha i si sebbuna, nai sondar mo ko siso pemettohna asa matè ia.”

¹⁶Nai sinderrang mengkubu kuta i si Joab idokken mo si Uria laus mi bekkas sinibettohna ntegguh ijaga musuh.

¹⁷Nai sinderrang karuar musuh i kuta nai lako juhap dekket parangen si Joab, nai matè mo dèba tenterra si Daud bagi dekket si Uria.

¹⁸Nai ipasulak si Joab mo utusenna mendahi si Daud lako magahken perdalanen geraha i.

¹⁹Nina si Joab mo taba pasulakkenna i, “Enggo kessa idengkoh raja i sukutenmu tersèngèt perdalan geraha i,

²⁰tah bakunè melaga ia janah mula ikusoi ko, ‘Kasa bagi njolmitna kènè mi kuta i? Otang ibettoh kènè ngo kennah ipanah musuh i kènè i babo pagar kuta i nai?

²¹Lupa ngo kènè bakunè permatè si Abimelekh anak si Gideon i Tebes? Otang permatèna pè kumarna sada kalak daberru memintirken batu penggmlingen topong i babo pagar nai mbangsa? Jadi kasa bagi njolmit ndènè mi pagar i?’ Mula bagi kuso-kuso raja i, bagahken mo taba raja i, ‘Si Uria pè matè ngo.’ ”

²²Nai berkat mo suruhen i menghadep Raja Daud janah magahken karina sinidokken si Joab tabasa i.

²³Nina mo, “Mahantuen ngo musuhnami i, nai karuar mo kalak i i kuta nai mi jampalen lako mengelentem kami. Tapi mertuhu-tuhu mo kami mengalo, gabè kusessakkami mo kalak i balik soh mi pèntu pengkeruhen kuta i.

²⁴Nai ipanahi kalak imo kami ibabo pagar kuta i nai, gabè matè mo deba pengendeng Rajai, bang si Uria pe enggo matè.”

²⁵Nai nina si Daud taba pasulakken i, “Pepihir mo ukur si Joab janah dokken tabasa, asa ulang melui ukurna, kumarna oda ngo sibettoh kin ise matè tupung geraha. Dokken ma bana, asa i kubu kuta i muat rapatna, asa menerah kuta i.”

²⁶Idengkoh si Batsyeba kessa mo enggo matè keppe sinibalèna, marsak mo ia, merhendem.

²⁷Nai enggo kessa pul ari merhendem, ipasulak si Daud mo meraleng daberru i mi istana, ibaing mo ia gabè sinibagesna. Enggo kessa barang piga bulan, itubuhken mo sada anak. Tapi nggerrah ngo atè JAHOWA midah ulah-ulah si Daud i.