Read Batak Dairi 2 Samuel 13 Bible Online

2 Samuel 13 - Batak Dairi bible

2 Samuel 13

¹Si Absalom anak si Daud, lot ngo turangna mberru kalohon mergerar si Tamar. Lot ma ngo anak si Daud tubuh sinibagesna sidèban mergerar si Amnon, ngkelleng ngo atèna midah si Tamar i,

²sèkel ngo ia rebbak meddem. Tapi oda terbaingsa i, kerna simerbaju dèng ngo si Tamar i, ai sumbang ngo i. Tapi dak merkalimesso ngo i pikiren si Amnon sanga sakiten teraen bulung meratah ia.

³Lot ngo supan-supan si Amnon cerdik kalohon, gerarna si Jonadab anak si Simea kaka si Daud.

⁴Idokken si Jonadab mo taba si Amnon, “Alè anak raja, kasa gennep ari dak marsak kono? Kadè pana merulah?” Ialoi si Amnon mo, “Ngkelleng ngo atèngku midah si Tamar, turang si Absalom kakangku i.”

⁵Nai idokken si Jonadab mo tabasa, “Murah ngo i. Galè mo ko i peddemenmu pakulah bagè cara cioen ko. Mula roh bapamu mendahi ko, dokken mo bana, ‘O Pa dokken mo si Tamar roh mi sèn asa ikebbasi pangaenku. Mula kupetengen-tengen ia merdakan i sèn, gabè tellap mo aku mangan.’ ”

⁶Nai dak galè mo si Amnon i peddemenna, bagè cara sakiten. Nai tikan roh Raja Daud menongkirsa, idokken si Amnon mo tabasa, “ O Pa, pasulak mo si Tamar roh mi sèn asa ibahan kuè kupetengen-tengen i sèn, asa tellap kupangan.”

⁷Nai itennahken si Daud mo si Tamar i istanana nai, nina mo, “Laus kono lebbè mi sapo turangmu si Amnon, janah tasak mo panganna.”

⁸Nai laus mo si Tamar mi si, idapet mo si Amnon gampar i peddemenna. Ibuat si Tamar mo cituk nditak, nai ipelias mo kuè panggangenna i hadeppen si Amnon.

⁹Enggo kessa ntasak, ihantarken mo kuè i. Tapi oda ngo uè si Amnon kipangan. Idokken mo ranana, “Pasulak mo i sèn nai laus karina.”

¹⁰Enggo kessa laus karina i bilik i nai, idokken si Amnon mo taba si Tamar, “Mbahken mo kuè i mi peddemenku èn, janah sulangi aku.” Iuèi si Tamar mo i.

¹¹Tapi idoroken si Tamar kessa mo kuè i tabasa, mèter ijèmak si Amnon mo turangna i ninganna idokken, “Turang, roh mo ko rebbak meddem kita.”

¹²“Ah, ulang mo turang!” nina mengaloi. “Ulang ipaksa kènè aku mengulaken kememalu i. Ai oda nung ibahanken dèba bagi i suberri Israel.

¹³Mula sanga tersor, mikè mo kubaing abèngku? Nai kono pè dosken jelma moto janah ilèai dèba mo i suberri Israel. Lotien mo ranaken i bai raja i, bakunè pè kennah toko atè raja i gabè sinibagesmu aku.”

¹⁴Tapi oda idengkohken si Amnon i. Kumarna gegohen ngo ia, gabè gegoh mo ibaing bana janah irampok mo turangna i.

¹⁵Enggo kessa pul, gabè nceggo kalohon mo atè si Amnon midah si Tamar, janah belgahen nola ngo nceggo atèna daripada ngkelleng atèna mula-mula. Nai idokken mo taba turangna i, “Laus mo ko i sèn nai.”

¹⁶Ialoi si Tamar mo, “Iah, kasa nola ipelaus kono aku? Mula ipelaus kono aku jahaten ngo i daripada ulah-ulahmu ndai.” Tapi oda idengkohken si Amnon rana i.

¹⁷Idilo mo naposona, nina mo, “Ruah mo daberru èn mi ruar, nai konci pèntu i!”

¹⁸Nai ibahanken naposona i mo bagè sinidokkenna i. Ukum pakèen si Tamar baju jubah nggeddang ngo janah tanganna pè ngeddang ma. Ai tikala i bagi ngo pakèen mula simerbaju dèng.

¹⁹Nai ibaing si Tamar mo cirabun mi takalna, iribak mo bajuna, ninganna tangis, laus mo ia janah itutupi abèna dekket tanganna duana.

²⁰Idah si Absalom kessa mo ia, ikusoi mo, “Mada ngo isuanken si Amnon siso leppek bamu? Enggo mo turang, ulang pella pikirken nèngè i. Otang turangmu ma ngo bang ia. Jadi ulang pella bagah-bagahken i barang bai isè pè.” Nai gabè melui mo ukur si Tamar janah merian i bages si Absalom turangna i mo ia longo-longoen.

²¹Terbertik ngo i bai Raja Daud gabè punguren mo ia.

²²Si Absalom pè gabè dendam mo taba si Amnon, janah oda uè ia mermongkamisa kumarna irampok turangna si Tamar i.

²³Dua tahun nai nola, merpèsta mo si Absalom kumarna igonting bukbuk biri-birina i Baal-Hazor i gembar kuta Efraim janah idilo ngo karina dukak-dukak raja.

²⁴Idahi mo Raja Daud, nina mo, “Naing merpèsta ngo aku kumarna kugonting bukbuk biri-biringku. Kerna i, roh mo ko Pa dekket karina simersangap i istana.”

²⁵Tapi ialoi raja i mo, “Ulang pella bagi alè pa, ai mula roh kami karina menusahi kono nola ngo i.” Tapi dak ipememmes si Absalom ngo mengidoken. Tukasi pè bagi oda ngo laju uè roh bapana i. Pellin pasu-pasu ngo kessa ibaing bana.

²⁶Nai nina si Absalom mo: “Mula bagi, giam dedahenku si Amnon dekket rebbak kami.” Idokken raja i mo, “Oda pella dekket ia.”

²⁷Tapi kumarna dak ipidoken si Absalom, gabè ipaduè si Daud mo karina dukak-dukakna bak si Amnon mengèkutken si Absalom. [Nai ihidangken si Absalom mo pangaen merasa-merasa.]

²⁸Idokken mo taba hamba-hambana, “Perdatèken kènè selloh, mula enggo mabuk si Amnon kumerna mènum anggur i, kubaing tanda bai ndènè, mèter bunuh kènè mo ia. Ulang mbiar kè. Aku ngo mertanggung jabab i si. Ulang kènè ragu, tapi kennah mhoho ngo kènè.”

²⁹Saut ngo ibahanken hamba-hamba i kata si Absalom i, ibunuh kalak i mo si Amnon. Mengidah i, mèter ipasang dukak-dukak si Daud mo kudana, gabè mperrus mo kalak i.

³⁰Tikan i tengah ndalan dèng kalak i lako balik enggo ibagahken dèba taba si Daud, “Enggo ibunuh si Absalom karina dukak Rajai, sada poda lot nè nggelluh.”

³¹Cènder mo Rajai, iribak mo pakènna kumerna luina, nai igarpahken mo dirina mi hatap. Nai karina mo penjaga dekket mengeribak pakènna.

³²Tapi idokken si Jonadab anak si Simea kaka si Daud mo, “Alè Raja nami, ulang ko rembekbekken janah ulang idokdok ko karina dukak Rajai matè. Pellin si Amnon ngo kessa matè, ai enggo ntangkas ia ngo kessa ipergeddo ukur si Absalom kessa nai irampok ia turangna si Tamar.

³³Asa ulang tok Rajai mula pè idokken enggo karina nina anak Rajai matè, ai pellin si Amnon ngo kessa matè.”

³⁴Ningan bagidi mperrus mo si Absalom. Nai idah penjaga istana si Daud mo nterrem roh kalak mengencuahi delleng i Horonaim nai, nai laus mo ia magahken i taba raja Daud.

³⁵Nai nina si Jonadab mo taba si Daud, “Iai mo dukak-dukak Rajai ngo i! Tuhu ngo sikudokken ndai.”

³⁶I dèng pul ia mengerana, mèter masuk mo dukak-dukak si Daud mi bagasen. Tangis mo kalak i. Si Daud bak naposona pè tangis ma mo.

³⁷Pindah mo si Absalom mi istana raja nagerri Gesur, imo mergerar si Talmai anak si Amihur. Merian i si mo ia tellu tahun dekkahna. Narih toko ngo dekkahna merhendem si Daud kemulihken si Amnon.

³⁹Tapi enggo kessa maknè melui atè si Daud, gabè nteddoh kalohon mo ia midah si Absalom.