Read Batak Dairi 2 Samuel 14 Bible Online

2 Samuel 14 - Batak Dairi bible

2 Samuel 14

¹Ibettoh si Joab ngo enggo nteddoh kalohon Raja Daud midah si Absalom,

²nai ipasulak mo meraleng sada kalak daberru cerdik i Tekoa nai. Soh kessa mo daberru i, idokken si Joab mo mbangsa, “baing kènè mo bagè cara bonek kènè; pakèken kènè mo pakèen bonek, janah ulang kènè merminak baungkus. Pakulah mo kènè bagè sada daberru sienggo ndekkah kalohon menangisi permatè tampuk pusuh-pusuhna.

³Nai dahi kènè mo raja i, janah dokken kè bagèen.” Nai ibagahken si Joab mo tabasa kadè sikennah dokenkenna.

⁴“Alè raja nami sinipersangapen. Urupi mo aku!”

⁵“Kadè pana?” nina raja i mengkusoi. Ialoi daberru i mo, “Sada daberru mbalu janah ncor ngo aku naposomèn. Ukum sinibalèngku enggo mo matè.

⁶Lot ngo anakku dua kalak. Nai tikan sidari merubat mo kalak i i jampalen. Kumarna oda lot kalak menelahi, gabè matè mo sada kalak ibunuh.

⁷Bagèndari karina kadè-kadèngku gabè musuhku janah nina kennah kusohken anakku simunuh i bai kalak i, asa ihukum matè ia, kumarna ibunuh dengan sibeltekna. Mula kupesoh anakku i bai kalak i, gabè tading mitilitil mo aku. Ai sadasa nai kin ngo kessa harapenku, i pè mula isalpuni nola, oda nèngè mo lot anak sinibalèngku lako menguduti pemparenna.”

⁸“Balik mo kènè, kuurus pè perkara ndènè i,” nina raja i mengaloi.

⁹“Alè Raja nami Sinipersangapen,” nina mengaloi. “Barang bakunè nola pè ibaing Rajai, aku dekket kadè-kadèngku ngo menggongken akibatna; ukum Rajai dekket dukak-dukak Rajai oda lot mersalah.”

¹⁰Ialoi raja i mo, “Mula lot kalak mengasup kènè bagahken kènè bangku, nai bakunè pè oda nè dak isusahi kènè.”

¹¹Nai idokken daberru i mo, “Mersodip mo raja i bai JAHOWA Dèbata raja i, asa ulang nè ilaluken kalak i sinaing memalesken permatè anakku kejahaten muat mbelgahna merkitè ibunuh nola anakku sisada nai.” Ialoi si Daud mo, “Merkitè-kitè gerar JAHOWA singgelluh i, oda ndorok ikekadè anakmu i.”

¹²Nai idokken daberru i mo, “Alè raja nami sinipersangapen, padiat mo aku mengerana cituk nai.” “Selloh,” nina raja i mengaloi.

¹³Nina daberru i mo, “Merkitè rana Rajai, enggo iaku Rajai, magahken Rajai sendiri mersalah oda ipadiat Rajai anakna sendiri mulak i pengungsinna nai. Kasa ibaing Rajai kesalahen bagidi taba bangsa Dèbata?

¹⁴Lako matè ngo kita karina, tosè ngo kita èn bagè laè orè mi tanoh oda nèngè ndorok terpepulung. Dèbata pè oda ngo ipegelluh nèngè sienggo matè i. Kumarna i kennah usahanken Rajai ngo asa ndorok mulak kalak siterbuang i.

¹⁵Roh pè aku menghadep Rajai kumarna iasup dèba ngo aku. Nai mersura-sura mo aku, lotiin aku roh mengeranaken i taba Rajai, katerra pè iuèi Rajai pengidoenku èn.

¹⁶Dok atèngku idengkohken Rajai ngo aku janah ipaluah bai kalak sinaing memunuh aku bak anakku idi nai. Ai naing iliplip kalak i ngo kami katèna i tanoh siniberèken Dèbata bai bangsaNa èn nai.

¹⁷Tok ngo aku mi bagah-bagah Rajai menjamin keluahen naposomèn, ai tosè bagè malaèkat Dèbata ngo raja i, ndorok membija-bijaken simendè bak singgodo. Dak idengani JAHOWA Dèbata mo Rajai.”

¹⁸Nai nina raja i mo mengaloi, “Lot naing kusonku taba kènè, aloi kènè mo dekket situhuna.” “Kusoken kènè mo Raja nami,” nina daberru i mengaloi.

¹⁹Idokken raja i mo, “Si Joab ngo pasulakken kono?” Nai ialoi daberru i mo, “Bagè sèntengna nggelluh kessah Rajai, oda terperso aku mengaloi kuso-kuso Rajai, tuhu ngo si Joab mengajarken taba aku bakunè sibaingenku dekket sinaing dokenkenku.

²⁰Tapi ibaing pè bagi, asa mendè ngo dungna karina simasa i. Ai bijak ngo Rajai bagè malaèkat Dèbata, memettoh karina simasa.”

²¹Enggo kessa i idiloi raja i mo si Joab nina raja i mo tabasa, “Kuuèi mo nipergeddo ukurmi. Alengi mo si Absalom janah arahken mo ia mi sèn.”

²²Mersembah mo si Joab i hadeppen si Daud, ninganna idokken, “Ipasu-pasu Dèbata mo Rajai. Enggo kubettoh, ipasulak Rajai aku bagèndari, kumarna iuèi Rajai pengidoenku.”

²³Nai berkat mo si Joab mengalengi si Absalom mi Gesur, asa iarahken balik mi Jerusalem.

²⁴Tapi oda ipaduè raja i si Absalom merian i istana, ai nina, “Oda uè aku mengidahsa,” dok raja i. Nai mi bagesna mo si Absalom balik, oda pella ia menghadep raja.

²⁵Termurmur ngo kemaholien si Absalom i suberri Israel. Oda lot nè termaholien bana nai. Mulai i tapap-tapap nèhèna nai soh mi punca bukna, oda lot mertikas.

²⁶Ngkapal kalohon ngo bukna, janah kennah igettap ngo sikali sitahun, ai mbotongsu iakap. Bukna sinigettapna i lebbih ngo dua kilo mengèkutken timbangen raja.

²⁷Lot ngo tellu anak si Absalom, janah sada berruna mberru kalohon mergerar si Tamar.

²⁸Enggo mo dua tahun dekkahna si Absalom i Jerusalem, tapi madèng ngo nung ia pejumpa dekket raja i.

²⁹Nai tikan sidari idiloi mo si Joab lako pasulakkensa menghadep raja tapi laju oda uè roh si Joab. Idiloi nola mo si Joab sikali nai tapi laju oda uè roh.

³⁰Nai idokken si Absalom mo taba hamba-hambana, “Ibettoh kènè ngo simbalang jumangku dekket juma si Joab, isuani dekket pagè? Suluhi kènè mo jumana i.” Nai laus mo kalak i menuluhi juma i.

³¹Nai roh mo si Joab mi bages si Absalom lako mengkusoken, “Kasa iserbu hamba-hambamu jumangku?”

³²Ialoi si Absalom mo, “Kumarna oda uè kono roh tikan kudiloi. Naing kupasulak ngo ko mendahi raja i mengkusoken kuso-kusongku èn, ‘Kadè gunana kutadingken Gesur janah roh mi sèn? Lotien mo aku merian i si.’ ” Idokken si Absalom dèng ma, “Usahaken mo asa ndorok aku menghadep raja, janah mersalah dèng ngo aku dok atèna, uè ngo aku ihukum matè.”

³³Enggo kessa i laus mo si Joab menghadep Raja Daud, pesohken pengidoen si Absalom i. Nai idiloi raja i mo si Absalom, nai mersembah mo si Absalom i hadeppen raja i. Nai isanggoh raja i mo ia.