Read Batak Dairi 2 Samuel 18 Bible Online

2 Samuel 18 - Batak Dairi bible

2 Samuel 18

¹Ipepulung si Daud mo parangenna, nai isagi mo gabè tah piga nuhnuhen, dèba seribu kalak, dèba seratus kalak. Nai ipebangkit mo simenguluken nuhnuhen i.

²Enggo kessa bagi, ipeberkat mo kalak i mergeraha tellu kelompok, siniuluken si Joab, si Abisai anggi si Joab, dekket si Itai kalak Gat. Idokken si Daud mo taba parangenna i, “Aku pè dekket mo, rebbak mo kita.”

³Tapi ialoi kalak i mo, “Ulang pella dekket Rajai. Ai mula kennah terpaksa ngo kami mperrus, barang pè matè kami sitengah, oda dèng puas musuh i, ai Rajai ngo niletlet kalak i. Ai dosken sipuluh ribu kalak ngo Rajai. Janah ma lotiin ngo Rajai pasulakken mengurupi kami i kuta nai.”

⁴Nai nina raja i mo, “Kènè mo mula bagi.” Nai cènder mo ia i gembar pèntu pengkeruhen kuta i. Merbaris mo korina merotor soridadu mi ruar ipas nuhnuhen seribu kalak bak seratus kalak.

⁵Nai ipernoi raja i mo si Joab, si Abisai dekket si Itai, nina mo, “Ulang pella ugahen baing kènè si Absalom i kemulihken aku.” Karina ngo soridadu mendengkoh perèntah si Daud i.

⁶Nai berkat mo parangen si Daud mengalo parangen Israel. Juhap mo kalak i i rambah Efraim.

⁷Talu mo Israel ibaing parangen si Daud. Ketaluen mbellen ngo i, ai sanga duapuluh ribu kalak buèna matè sidarinkenna i.

⁸Rarat mo geraha i mi suberri aur i. Buèen ngo matè laling i rambah i daripada matè i perjuhapen.

⁹Tikan ipasang si Absalom kudana, sintempu mèter pejumpa mo ia dekket parangen si Daud. Memellus mo kuda i arap terruh kayu mbellen tapi ncerrep, gabè sangkut mo takal si Absalom mi dahan kayu i. Lojang mo kudana tapi ukum ia, tading ngo mantong-antong i dahan kayu i.

¹⁰Lot mo sada kalak parangen si Daud idah-idahen i, nai ibagahken mo taba si Joab, “Tuan nami, kuidah ngo ndai si Absalom mantong-antong ipas sada kayu mbellen.”

¹¹Ialoi si Joab mo, “Bakunè nimu? Idah kono ia? Kasa oda ibunuh kono? Mula ibunuh kono kin ia, kennah kuberèken upahmu sipuluh riar pirak dekket sada tali abak.”

¹²Tapi ialoi mo, “Mula pè iberèken bangku seribu riar pirak, oda uè aku mengkekadè anak raja i. Karina ngo kami mendengkoh sinidokken raja i bamu, bak bai si Abisai dekket si Itai, asa ulang pella ilukai si Absalom i kemulihken raja i.

¹³Mula kubunuh pè ndai si Absalom, kennah terbettoh ngo i bai raja i, ai tentu terbertik ngo karinana bai raja i janah kono pè oda isampati ko aku.”

¹⁴“Enggo mi. Kerri tikki pellin mersoal dekket kono sambing,” nina si Joab. Nai ibuat si Joab mo tellu kujur, ipantemken mo mi tenten si Absalom, ai nggelluh dèng kin ngo si Absalom sitersangkut mantong-antong i kayu i.

¹⁵Nai iurup-urupken sipuluh kalak parangen si Joab mo ia janah ibunuh.

¹⁶Isempul si Joab mo sarunèna, gabè ipettadi parangenna mo mengeletlet parangen Israel i.

¹⁷Nai ipekèkè kalak i mo bangkè si Absalom idabuhken mo mi telaga mbages silot i rambah i. Itamburi kalak i mo telaga i dekket batu. Mperrus mo karina parangen Israel balik mi begesna gennep.

¹⁸Tikan nggelluh dèng kin si Absalom enggo kin ngo ibahan mèjanna i Lembeng Raja kumerna oda lot dukakna daholi menerrusken pemparenna. Ibaing ngo gerar mejanna i bagè gerarna, janah soh sidari èn tertandaen ngo mèjan i, mèjan si Absalom.

¹⁹Nai idokken si Ahimaas anak si Zadok mo taba si Joab, “Paduè mo asa lojang aku mendahi Rajai magahken bana, berita sampang atè èn, enggo ipaluah JAHOWA raja i i musuhna nai.”

²⁰“Ulang,” nina si Joab, “barang dahari mo i. Ukum ari èn oda ngo ko merembah berita, kumerna matè anak raja i.”

²¹Nai idokken si Joab mo taba naposona sada kalak Sudan, “Laus mo ko magahken taba raja i siniidahmu.” Mersembah mo naposona i, nai laus mo ia merdigal.

²²Tapi dak ipidoken si Ahimaas ngo tong taba si Joab, “Barang kadè masa, sandok padiat mo dekket aku ma merembah berita èn.” “Kasa igolgolken kono kennah laus alè Pa?” nina si Joab mengkuso. “Ai oda lot upahmu kemulihkenna.”

²³“Oda pella kadè i,” nina si Ahimaas. “Laus mo aku.” “Mula bagi, lako mo,” nina si Joab. Nai merdigal mo si Ahimaas mengèkut-ngèkut dalan i lembeng Laè Jordan, janah oda pella ndekkah ilebbèi mo kalak Sudan sienggo perlebbè berkat i ndai.

²⁴Kundul i kellang-kellang pèntu pengkeruhen bagasen bak perluar kuta i ngo si Daud. Ukum penjaga cènder ngo i babo saong pèntu pengkeruhen i. Tikan mengerior ia, idah mo lot sada kalak roh merdigal.

²⁵Nai idiloken perjaga i mo mi terruh lako magahken taba raja i, nai nina raja i mo, “Mula pellin sada kalak ngo ia, berita mendè ngo niembahna.” Naing soh kessa mo ia,

²⁶idah perjaga i mo lot sada kalak nai roh merdigal ma. Nai idiloken ma mo, “Tengen mo, lot dèng ma sidèban sada kalak roh merdigal mi sèn.” Ialoi raja i mo, “Pasti merembah berita mendè ma ngo ia.”

²⁷Idokken perjaga i dèng ma, “Si Ahimaas ngo siperlebbè i, ai kutandai ngo perlojangna.” “Kalak selloh ngo ia. Tentu merembah berita selloh ia,” nina raja i.

²⁸Njuah-njuah nina si Ahimaas mendiloken salamna taba raja i. Nai mèter sujud mo ia, ninganna mendokken, “Nipoji mo JAHOWA Dèbata ni Raja i, sienggo menohken taba raja i kalak simemberontak taba Raja i.”

²⁹Nai ikusoken raja i mo, “Njuah-njuah ma ngo si Absalom anak perana i?” Ialoi si Ahimaas mo, “Alè raja nami, tikan ipasulak si Joab aku ndai, kuidah bagè lot rengak kalohon, tapi oda kubettoh kadè masa.”

³⁰“Kan adoi mo ko cènder,” nina raja i; nai laus mo si Ahimaas mi lambung janah cènder i sidi.

³¹Nai soh mo naposo si Joab, nina mo taba raja i, “Merembah berita selloh ngo aku bai Rajai. Enggo iberèken JAHOWA sidari èn kemenangen bai raja i ai enggo talu karina kalak simemberontak.”

³²Ikusoi raja i mo ia, “Njuah-njuah ma ngo si Absalom anak perana i?” Nai ialoi naposo i mo, “Katerra pè nemmu karina mo musuh Rajai dekket karina kalak simemberontak taba Rajai, dos nasipna bagè nasip anak Rajai.”

³³Mendengkoh i, marsak kalohon mo raja i, gabè ibengketti mo bekkas i babo pèntu pengkeruhen i ninganna tangis derru-derru. “Ialè pa, anakku! Anakku Absalom! Nong alè Absalom, anakku! Lotien mo nemmu aku matè singkat badanmu, alè pa. Nong ngalè nang, Absalom anakku.”