Read Batak Dairi 2 Samuel 19 Bible Online

2 Samuel 19 - Batak Dairi bible

2 Samuel 19

¹Lot mo magahken taba si Joab dak mertahan tangis bonek ngo raja Daud kemulihken si Absalom.

²Nai gabè mobah mo kemenangen si sidari i menjadi bonek bai karina balapergunggung si Daud, kumerna idengkoh kalak i ngo itangisi raja i anakna i.

³Sipsip mo kalak balik mi kuta, tosè bagè soridadu mèla kemulihken mperrus i perjuhapen nai.

⁴Itutupi raja i mo abèna derru-derru, “Ialè pa, anakku Absalom! Nong ngalè Absalom, anakku.”

⁵Nai laus mo si Joab menghadep raja, nina mo, “Pemèlaken parangen i ngo cara Rajai ari èn, tukasi pè kalak i ngo mempebèlai kessah Rajai, bang kessah dukak-dukak dekket sinibages bak siterbuang Rajai.

⁶Ikekelengi Rajai ngo jelma simengkecegoken Rajai, tapi ikecegoken Rajai ngo jelma simengkekelengi Rajai. Enggo ntangkas ipetarar Rajai oda kadè lapatenna èkuten soridadu bak parangen Rajai. Balikna nola ngo keppè, lolo kalohon kin ngo keppèken Rajai ripas kami karinana sidari èn, asal mo nggelluh si Absalom.

⁷Kennah kèkè mo Rajai laus mi ruar lako pemènakken ukur parangen Rajai. Kusumpahken mo bai gerar JAHOWA, mula oda mi ruar Rajai mendahi kalak i, berngin èn nai mo mulai, sada kalak nè poda uè kan Rajai. Idi mo gabè kememago bai Rajai sidekkah nggelluh.”

⁸Nai kèkè mo raja i janah laus mi ruar. Kundul mo ia i gembar pèntu pengkeruhen. Terbertik mo taba parangenna enggo i si ia, nai roh mo kalak i karina, menghadep. Nderrangna i, ukum parangen Israel enggo mperrus karina balik mi bagesna gennep.

⁹I tengah-tengah karina marga Israel, masa mo perselisihen. Nina kalak i, “Enggo ipaluah Raja Daud kita bai raja Palistin nai janah ipebèlai kita bai musuh-musuhta sidèbankenna i nai. Keppè bagèndari enggo mperrus ia bai si Absalom nai, enggo itadingken nagerri èn.

¹⁰Sipebangkit nola mo si Absalom gabè raja, tapi enggo matè ia iperjuhapen. Kasa oda lot giam sada kalak lako mengalengi Raja Daud?”

¹¹Soh ngo rana i mi penggel si Daud. Kumarna i ipasulak mo Imam Zadok dekket Imam Abyatar lako mendokken taba pengulu-pengulu Juda bagèen, “Kasa kènè nola perpodi menimbak-nimbak bak mengarak raja i balik mi istana?

¹²Otang kaka-anggingku, bak kaumku janah horong- ku ngo kènè? Kasa kènè perpodi mengidoken asa mulak aku?”

¹³Ipasulak si Daud ma ngo mendahi si Amasa mendokken bagèen, “Otang supan-supanku ngo kono?” Mulai bagèndari kupebangkit mo kono gabè pakalima menggancihi si Joab. Ibunuh JAHOWA mo aku, mula oda kupesaut i.

¹⁴Bagi mo cara si Daud memuat ukur kalak Juda. Nai gabè itennahken kalak i mo taba raja i asa balik ia mi istana rebbak dekket pugabèna.

¹⁵Nai berkat mo raja i. Soh mo ia mi Laè Jordan. Sinderrangna i, enggo mo soh mi Gilgal ukum kalak Juda lako mengalengi raja i dekket menjagasa meneberangi laè i.

¹⁶Si Simei anak si Gera kalak Benjamin i mengarahken seribu kalak marga Benjamin, menudu roh rebbakken kalak Juda i, lako menimbaki raja i. Bagi ma ngo si Ziba pè imo hamba dukak-dukak si Saul rebbakken dekket dukakna sisipuluh lima kalak i bak siduapuluh kalak hambana; enggo mo isuberrangi kalak i Laè Jordan sinderrang madèng roh raja i.

¹⁸Iurupi kalak i ngo pengisi bages raja i suberrang janah mengulaken karina sinidokken raja i taba kalak i. Tikan naing meneberangi laè raja i, mersembah mo si Simei mi hadeppenna ninganna mendokken,

¹⁹“Pengidoenku, ulang mo dak idokdok Rajai aku mersalah. Ipehembun Rajai mo ukurna mengelupaken karina ulah-ulahku tikan mperrus Rajai i Jerusalem nai.

²⁰Enggo satdar aku, enggo merdosa aku. Kumarna i ipas marga-marga silot i julu, aku mo perlebbè kalohon roh lako menimbak-nimbak Rajai sidari èn.”

²¹Mendengkoh i, nina si Abisai anak si Zeruya mo, “Enggo patut ihukum matè si Simei, kumarna enggo sampè isumpahi raja nipilih JAHOWA.”

²²Tapi idokken si Daud mo taba si Abisai dekket kakana si Joab, “Ulang campuri. Kasa isusahi kènè aku? Sidari èn mbangkit raja nola ngo aku i Israel. Oda ndorok lot kalak Israel ihukum matè.”

²³Nai isumpahken raja i mo, “Aku mo kalangmu mak ndorok ihukum matè ko.”

²⁴Roh ma ngo dekket si Mefiboset kempu si Saul lako menimbak-nimbak raja i. Oda iborih nèhèna, oda ikondè janggutna, janah oda itaptapi pakènna kessa nai itadingken Raja Daud kuta Jerusalem, soh balik ia njuah-njuah.

²⁵Tikan roh si Mefiboset i Jerusalem nai lako menimbak-nimbak raja i, idokken raja i mo mbangsa, “O Mefiboset, kasa oda ièkutken kono aku tikala i?”

²⁶Ialoi mo, “Alè sinipersangapen, ibettoh Rajai ngo kèpang aku. Kudokken ngo taba naposongku asa ipèmaken kalodè pasangenku, asa kuèkutken Rajai. Tapi iselbuh naposongku i mo aku.

²⁷Luap dèng ngo ia bai Rajai tersèngèt aku. Tuhuna ngo Rajai bagè malaèkat Dèbata. Kumarna i baing mo kadè selloh mengèkutken pertimbangen Rajai.

²⁸Ai karinana kadè-kadè keturunen bapa, patut ngo ihukum matè, tapi tukasi pè bagi, enggo iijinken Rajai aku mangan i istana. Ukum bagèndari oda pang nèngè aku mengido barang kadè pè bai Rajai nai.”

²⁹Ialoi raja i mo, “Ulang pella dokken barang kadè nèngè. Enggo sanga kudokken memerèken karina harta si Saul bamu dekket bai si Ziba.”

³⁰Nai ialoi si Mefiboset mo, “Belli mo bai si Ziba karinana i. Enggo sennang ukurku kumarna njuah-njuah Rajai balik.”

³¹Roh ma ngo si Barzilai kalak Gilead i Rogelim nai lako mendengani raja i meneberangi Laè Jordan.

³²Ukum si Barzilai enggo mo tua-tua kalohon, enggo merumur ia ualuhpuluh tahun. Bèak kalohon ngo ia. Ai sidekkah i Mahanaim raja i tikala i, si Barzilai ngo mèmaken pangaen raja i.

³³Idokken raja i mo tabasa, “Dekket mo ko mi Jerusalem. Kuhantari pè karina siperlu bamu i si.”

³⁴Tapi ialoi si Barzilai mo, “Oda ndekkah nèngè aku nggelluh. Nai kadè mo gunana kuèkutken raja i mi Jerusalem?

³⁵Umurku pè enggo mo ualuhpuluh tahun, janah kadè poda nèngè lot maing sennang ukurku. So ndorok nè giam kuakapken rasa sikupangan barang sikuènum, oda ma ngo kudengkoh sora kalak merendè. Gabè boban nola ngo aku bai Rajai.

³⁶Oda terjalo aku sibasa-basa sanga bagi belgahna. Sèkel ngo aku naing dekket menaruhken Rajai giam tah piga ntingkah i kèpar Laè Jordan.

³⁷Enggo kessa i sennang mo ukur Rajai paduèken aku balik mi bagesku, janah matè bak itanem i gembar kuburen partuangku. Tapi i sèn ngo anakku si Kimham. Mula toko atè Rajai, ia mo dekket menaruhken Rajai janah bana mo ibaing Rajai kadè dok atè Rajai selloh.”

³⁸Ialoi raja i mo, “Kuembah pè si Kimham janah kubaing pè bana bakunè gerrek atèmu, janah kadè sambing ipido kono kuuèi pè.”

³⁹Nai isuberrangi si Daud bak parangenna mo Laè Jordan. Isanggoh si Daud mo si Barzilai janah mersitenahen dekketsa. Enggo kessa i balik mo si Barzilai mi bagesna.

⁴⁰Karina parangen Juda dekket sitengah parangen Israel mendengani raja i meneberangi laè. Nai terrus mo raja i mi Gilgal. Si Kimham pè rasken ngo dekketsa.

⁴¹Nai roh mo karina kalak Israel menghadep raja, janah nina mo mbangsa, “Alè Raja nami, kasa idokdok kaka-anggi nami kalak Juda kalak i kessa merhak mengalengi Raja janah menjaga Raja bak karina pengisi bages dekket parangen Rajai lako menuberangi Laè Jordan?”

⁴²Nai ialoi kalak Juda mo, “Kennah bagi ngo, ai sincelket nami ngo raja i. Kasa nola melaga kènè? Idokdok kènè ngo itanggung raja i keperluen nami barang lot iberèken upah nami?”

⁴³Ialoi kalak Israel mo, “Sipuluh kali lempit ngo hak nami taba raja i, daripada kènè. Kasa melèas kènè midah kami? Asa ibettoh kènè, kami ngo lebbèen merarih lako menga- lengi raja i asa balik.” Tapi mpihiren ngo kalak Juda asa kalak Israel, janah dèng ma oda uè talu.