Read Batak Dairi 2 Samuel 2 Bible Online

2 Samuel 2 - Batak Dairi bible

2 Samuel 2

¹Enggo kessa i ikusoi si Daud mo JAHOWA, “Mada ngo ipergeddo kono aku alè JAHOWA laus janah mengkuasai sada ipas kuta silot i Juda?” “Uè,” nina JAHOWA mengaloi. “Kuta apaina ngo alè JAHOWA?” nina si Daud. “Kuta Hebron ngo,” nina JAHOWA.

²Nai laus mo si Daud mi Hebron rebbakken dekket sinibagesna sidua kalak i, si Ahinoam daberru Jizreel dekket si Abigail simengkebaluken si Nabal, daberru Karmel.

³Bagi ma dekket parangen bak pengisi bagesna gennep mengèkutken si Daud. Nai merian i Hebron bak sikulilingna i mo kalak i.

⁴Nai merrohen mo kalak Juda mi Hebron, ipebangkit kalak i mo si Daud gabè raja Juda. Idengkoh si Daud kessa mo, enggo ikubur kalak Jabes sini Gilead keppè bangkè si Saul,

⁵ipasulak mo utusenna mi si, lako pesohken tennah, “Dak ipasu-pasu JAHOWA mo kènè, kumarna enggo ipacidah kènè setia ndènè taba raja ndènè merkitè ikuburken kènè bangkèna.

⁶Kerna i, dak hot mo ngkelleng atè JAHOWA midah kènè. Aku, pè mendè mo kubaing bai ndènè kumernaken simendè nibaing ndènè i.

⁷Sobar mo kènè, janah baing kènè mo tosè lubalang mahantu. Ukum si Saul raja ndènè i, tuhu enggo mo matè, tapi enggo ipebangkit kalak Juda aku gabè rajana.”

⁸Pakalima balapergunggung si Saul imo si Abner anak si Ner, enggo mperrus rasken si Isyboset anak si Saul, mi Mahanaim i kèparen Laè Jordan.

⁹Ipebangkit si Abner mo i sidi si Isyboset gabè raja i aur Gilead, Asyuri, Jizreel, Efraim dekket Benjamin soh mi karina Israel.

¹⁰Merumur empatpuluh tahun mo si Isyboset tikan ipebangkit ia gabè raja Israel, janah dua tahun dekkahna ia memerèntah. Tapi ukum marga Juda, tong ngo menguèi taba si Daud,

¹¹janah pitu sitengah tahun dekkahna si Daud i Hebron memerèntah Juda.

¹²Tikan sidari, laus mo si Abner i Mahanaim nai mi kuta Gibeon, idengani parangen si Isyboset.

¹³Bagi ma si Joab (inangna mergerar si Zeruya), rebbak dekket parangen si Daud laus mi kuta i. Sidua pulungen simeralo i pehadep i bendar Gibeon; si Abner dekket denganna kundul kan kèpar èn, nai si Joab bak denganna kan kèpar adoi.

¹⁴Nai nina si Abner mo taba si Joab, “Aci sidokken parangenta mertanding.” “Jadi”, nina si Joab mengaloi.

¹⁵Nai juhap mo sipuluh dua kalak marga Benjamin utusen si Isyboset, sipuluh dua kalak ma parangen si Daud.

¹⁶Mersiruahen buk mo kalak i ninganna menusuk beltek alona, gabè rebbak matè mo kalak i. Kemulihken i ngo igerari bekkas i “Juma Peddang”.

¹⁷Kessa i mèter mergeraha mo kalak i, italuken parangen si Daud mo si Abner bak soridadu Israel.

¹⁸Telluna ngo anak si Zeruya i si, imo si Joab, si Abisai dekket si Asael. Ukum si Asael, nderras ngo lojang bagè rigarung,

¹⁹ijalang mo si Abner janah iletlet.

²⁰Itulihken si Abner mo mi podi, ikusoken mo, “Kono ngo i alè Asael?” “Uè”, nina mengaloi.

²¹“Ulang aku jalang!” nina si Abner. “Sada kalak ipas soridadu i nai mo tangkup janah buat mo sinjatana.” Tapi dakdak ipellet si Asael ngo ia.

²²Iulaki si Abner ngo sikali nai mendokken tabasa, “Ulang aku jalang! Asa ulang terpaksa kubunuh kono. Bakunè mo aku menengen abè si Joab kakamu i?”

²³Kumarna oda uè mengadi si Asael, gabè ipantem si Abner mo mi podi, kenna mo beltek si Asael, sanga tembus mi gurungna. Geppah mo si Asael janah matè gejapkenna i i bekkas i. Karina kalak simengidahsa i bekkasna gampar i tendo ngo.

²⁴Tapi ukum si Joab dekket si Abisai iterrusken ngo menjalang si Abner. Enggo kessa sundut mataniari, soh mo kalak i mi Uruk Ama, imo kan kebincaren Giah, kan padang gurun Gibeon.

²⁵Rebbak nola mo i si kalak Benjamin dekket si Abner, nai iatur kalak i nola mo barisenna i pucuk sada uruk.

²⁶Nai dilo-dilo mo si Abner i sidi nai taba si Joab, “Kennah siterrusken ngo geraha èn? Oda ngo satdar ko ukum geraha èn merembahken kinidersa? Ai denganmu sada bangsa ngo kami. Sadikè dekkah nai pèmanmu asa idokken ko parangenmi ulang nè menjalang-jalang kami?”

²⁷Ialoi si Joab mo, “Bagè sèntengna nggelluh JAHOWA, ukum oda idokken kono bagidi, kennah iletlet parangenku ngo kènè soh ceggen baremben.”

²⁸Nai isempul si Joab mo sarunèna magahken taba parangenna, asa ipetadi mengeletlet kalak Israel i, nai mentadi mo geraha i.

²⁹Suntuk bernginna i merotor mo si Abner dekket parangenna memellus Napa Jordan, nai isuberrangi mo Laè Jordan. Sidarinkenna i pè merdalan ngo kalak i nai soh mo kalak i mi Mahanaim.

³⁰Enggo kessa ipettadi si Joab mengeletlet si Abner i, ipepulung mo parangenna. Laènken si Asael, sipuluh sibah kalak mo kalak i mbalang.

³¹Ukum parangen si Daud memunuh tellu ratus ennempuluh kalak parangen si Abner i marga Benjamin nai.

³²Enggo kessa i iosong si Joab bak parangenna mo bangkè si Asael, janah ikubur mo mi kuburen sincelketna i Betlehem. Nai iterrusken kalak i mo merdalan suntuk bernginna i, jadi soh mo kalak i mi Hebron mayak nterrang ari.