Read Batak Dairi 2 Samuel 20 Bible Online

2 Samuel 20 - Batak Dairi bible

2 Samuel 20

¹Lot mo sada kalak pengguluti i kuta Gilgal mergerar si Seba. Anak si Bikri ngo ia i marga Benjamin nai. Tikan roh nuhnuhen si Daud i, mèter isempul si Seba mo sarunèna, ninganna idilo-diloken, “Oda lot perdemuenta dekket si Daud. Man kadènta mengèkutkensa? Kènè alè kalak Israel, ita kè mo mulak.”

²Nai merlausen mo kalak Israel i menadingken si Daud ièkutken kalak i mo si Seba. Tapi ukum kalak Juda hot ngo, janah iarak kalak i ngo si Daud i Laè Jordan nai soh mi Jerusalem.

³Enggo kessa soh si Daud mi istana i Jerusalem, ipepulung mo siterbuangna sisipuluh kalak i mi sada bages janah dak lot ngo ibaing menjaga. Karina keperluen kalak i ihantari ngo, tapi ukum si Daud oda nèngè nung rebbak meddem dekket kalak i. Nai bagè cara ikurung ngo kalak i sidekkah nggelluhna, janah tosè bagè simbalu soh matè.

⁴Nai iperèntahken raja i mo taba si Amasa, “Pepulung mo kalak Juda, janah rebbak roh mo kènè ibagasen tellu ari èn.”

⁵Nai berkat mo si Amasa lako pepulungken kalak i, tapi oda mulak ia ibas tikki sinibuhul raja i.

⁶Nai idokken raja i mo taba si Abisai, “Merbahayaen dèng ngo si Seba daripada si Absalom. Kumernaken i arahken mo parangenku asa ayaki ia, asa ulang sanga itaban nola kuta gotting, gabè mperrus ia banta nai.”

⁷Nai iuluken si Abisai mo parangen si Joab bak parangen pertaram raja dekket karina parangen sidèbanna i dèng i Jerusalem nai lako mengayaki si Seba.

⁸Soh kessa mo kalak i mi batu mbellen i Gibeon, roh mo si Amasa menjumpai kalak i. Ukum si Joab, merpakèen perang ngo tikalana i, janah mbenting peddang mersembung i abakna. Tikan merdalan ia mi lebbè, ndabuh mo sembung peddangna i mi tangan kambirengna.

⁹Nai idokken si Joab mo taba si Amasa, “Kadè berita kaltu?” ninganna ijèmak dekket tangan kamuhunna janggut si Amasa, ipekulah bagè naing menanggohsa.

¹⁰Oda idah si Amasa lot peddang i kambirang si Joab. Sintempu, mèter ijuluk si Joab mo beltek si Amasa dekket peddangna i, gabè hambur mo ginagatna mi tanoh. Matè mo ia gejapkenna i, oda sanga ipedua kali si Joab menjuluk. Nai iterrusken si Joab dekket anggina si Abisai mo mengayaki si Seba.

¹¹Cènder mo sada kalak parangen si Joab i gembar bangkè si Amasa mendiloken, “Barang isè kan si Joab bak si Daud, ièkutken mo si Joab.”

¹²Gampar i tengah ndalan i ngo bangkè si Amasa. Idah parangen si Joab i ndai ngo, dak tendo karina kalak simengidah bangkè i. Nai iruah mo bangkè i mi juma nisidi, nai isangkemmi mo dekket selimut gobar.

¹³Enggo kessa ipesisi bangkè i i dalan i nai, gabè karina mo kalak i menerrusken perdalanenna mengèkutken si Joab lako mengayaki si Seba.

¹⁴Ukum si Seba enggo mo sanga idahi karina aur marga Israel, nai soh mo ia mi kuta Abel-Bet-Maakha ièkutken karina marga si Bikri.

¹⁵Terbertik mo bai parangen si Joab i kuta i keppè si Seba nai ikubu mo kuta i. Itèmbun kalak i mo dekket tanoh pagar kuta i kan ruar, nai ikurak kalak i mo tanoh i terruh pagar i lako mengerumpakken pagar i.

¹⁶Lot mo sada daberru bijak i kuta i. Cènder mo ia i babo pagar i, nai idiloken mo, “Dengkohken kènè aku. Dengkohken kènè lebbè sorangku. Kupido asa roh lebbè si Joab mi sèn, ai naing lot dokenkenku tabasa.”

¹⁷Nai roh mo si Joab. Jadi ikusoi daberru i mo, “Kono ngo si Joab?” “Uè aku ngo,” nina si Joab mengaloi. Nai idokken daberru i mo, “Dengkohken mo ranangku èn alè Tuan.” “Kudengkohken pè, dokken mo,” nina si Joab mengaloi.

¹⁸Idokken daberru i mo, “Nggati ngo idokken dèba arnia bagèen, ‘Mula sèkel atèmu peddah, laus mo ko mi kuta Abel’ — nai iulaken mo bagi.

¹⁹Mbellen ngo kuta Abel èn. Sada kuta sitermènakna janah setia i tanoh Israel. Kasa naing ibukar kono nola? Uè ngo ko mencèdai tanoh milik JAHOWA?”

²⁰“Ndaoh mo ia bangku nai” nina si Joab mengaloi, “Oda lot ukurku mencèdai barang mengerumpakken kutamu èn.

²¹Oda ngo bagi sura-sura nami. Tapi lot sada kalak mergerar si Seba anak si Bikri, i delleng Efraim nai asalna, memberontak taba Raja Daud. Mula ipessoh kènè ia bai nami, mèter laus mo aku i kuta èn nai.” Nai nina daberru i mo, “Kubentiri kami pè takal si Seba i babo pagar èn nai bai tuan i.”

²²Nai laus mo ia, iakkali mo lako magahken sura-surana i taba pengisi kuta i. Enggo kessa i ipenggel mo takal si Seba janah ibentirken mo bai si Joab. Nai isempul si Joab mo sarunèna. Itadingken parangenna i mo kuta i, balik mo kalak i mi bagesna gennep. Si Joab pè mulak mo mi Jerusalem.

²³En mo gerar èkuten sinipebangkit si Daud: Pakalima karina balapergunggung Israel imo si Joab. Ekuten parangen pertaram si Daud imo si Benaya anak si Joyada.

²⁴Simenguluken pengula paksa imo si Adoram. Menjèmak peremasen imo si Josafat anak si Ahilud.

²⁵Penurat imo si Seya. Imam imo si Zadok dekket si Abyatar.

²⁶Imam i istana imo si Ira i kuta Jair nai.