Read Batak Dairi 2 Samuel 22 Bible Online

2 Samuel 22 - Batak Dairi bible

2 Samuel 22

¹Enggo kessa ipaluah JAHOWA si Daud bai si Saul nai dekket bai karina musuhna nai, ièndèken si Daud mo endè èn bai JAHOWA,

²Kukekelengi Ko JAHOWAku, kerna Ko ngo gegohku.

³Tosè bèntèng ntegguh ngo JAHOWA bekkasku meronding-onding ngo ia. Tosè delleng batu ngo Dèbatangku ia ngo perculèndungenku. Bagè tambeng-tambeng ngo ia mengemkemmi aku asa njuah-njuah dak ijaga ngo aku.

⁴Dilo-dilo ngo aku bai JAHOWA sipatut ipoji, ipaluah ngo aku ibas musuh- musuhku nai.

⁵Kematèen ngo mencingkoi aku janah iremrem laè kebinasaen i ngo aku.

⁶Kematèen ngo mencingkoi aku togong-togong kematèen i ngo dak i lebbèngku.

⁷Kudilo ngo JAHOWAku mula tersessak aku kusurakken mido bai Dèbatangku asa iurupi aku. I BagesNa nai idengkohken ngo sorangku janah iperdatèken ngo pengidoenku.

⁸Tumuyu-tuyu mo dunia èn janah dumegger karina dangaen delleng mogot-ogot janah menggirgir kumernaken laga Dèbatangku.

⁹Mercèmpul ngo cèmber i lubang ègungNa nai api dekket rara remuar i babahNa nai.

¹⁰Ibellah ngo langit i nai susur Ia merkitè hembun tuiten i terruh nènèhNa.

¹¹Kerubim ngo pasangenna lako ngkabang, mayap-ayap Ia i babo kabeng angin.

¹²Isangkemmi ngo diriNa dekket gellap tuiten, nggondem janah ngkapal ngo hembun mengkulilingisa.

¹³Ipas pelian i hadeppenNa nai, remuar mo hembun, baho dekket api.

¹⁴Merkata mo renggur i langit nai ibaing JAHOWA, janah ipedengkohken Sitermurmur i ngo soraNa.

¹⁵Itèmbakken ngo anak panahNa, lako pesompar-baèrken musuhna. Icalitken ngo dakdak perkasna, memaing mperrus kalak i karina.

¹⁶Taridah ngo dangaen laut, janah hatap tanoh èn pè mbuka, tikala isergang JAHOWA musuhNa merdengan laga.

¹⁷I babo nai idoroken JAHOWA tanganNa, ijèmak mo aku janah isintak i laè mbages nai.

¹⁸Ipaluah ngo aku bai musuh mergegoh i nai, bagi ma bai kalak simergogo atè baku nai, kumarna mergegohen kalak i alongku.

¹⁹Ikubu kalak i ngo aku tikanku isessak mara, tapi lot ngo mengurupi aku, imo JAHOWA.

²⁰Ipaluah ngo aku mula roh mara, njuah-njuah mo aku kumarna toko atèna midah aku.

²¹Ibales JAHOWA ngo pemahanku merandal i, ipasu-pasu ngo aku kumarna oda mersalah i.

²²Kuuèi ngo perèntah JAHOWAku, oda sumirpang menuju Dèbatangku.

²³Karina hukumNa kuperatè-atèken, karina perèntahNa oda nung kulupaken.

²⁴Ibettoh ngo oda mertikas aku, kupesisi ngo asa ulang mersalah aku.

²⁵Nai JAHOWA ngo malesken mendè bangku, kerna ibettoh ngo oda mersalah aku.

²⁶Alè JAHOWA, setia ngo Ko bai kalak setia, janah tobok bai kalak tobok.

²⁷Mbadia ngo ko taba kalak simbadia, tapi nggogo ngo atèmu midah pernggèduk i.

²⁸Ipaluah ko ngo kalak sincerrep merukur, tapi ipetunduk ko ngo kalak situnggang merukur.

²⁹Kono ngo maing merbendella pelitangku, JAHOWA Dèbatangku ngo menerangi kegellapenku.

³⁰Kono ngo mempergegohi aku mengalo musuh i, merkitè pengurupi Dèbatangku kurumpakken pertahanen kalak i.

³¹Soh mo merandalna pemaing Dèbata, tuhu ngo bagah-bagah JAHOWA. Tosè bagè tambeng-tambeng ngo ia, bai karina jelma siculèndung baNa.

³²Ai pellin JAHOWA ngo kessa Dèbata, janah pellinsa ngo mengurupi kita.

³³Ia ngo Dèbata mempergegohi aku, janah mènak ngo ibaing dalanku.

³⁴Ipergegohi ngo nèhèngku bagè nènèh balkih, janah ijaga asa njuah-njuah aku i delleng i.

³⁵Iajari ngo aku lako mrgeraha, gabè terbaing aku menintak panah sintegguhna.

³⁶Alè JAHOWA, kono ngo mengondingi bak paluahken aku, janah menoat aku merkitè kuasaMu, gabè termurmur aku kumara pemakinMu.

³⁷Ijaga ko ngo aku asa oda tertaban, janah oda nung tergempang aku tikan merdalan.

³⁸Kujalang musuhku janah kutaluken kalak i, oda nung sondar kum mak lebbè tumpat kalak i.

³⁹Kureppuk janah kurabbatken kalak i maknè terbaingsa kèkè, gampar mo kalak i i terruh nèhèngku maknè mergoldè.

⁴⁰Iberèken kono ngo gegoh mergeraha bangku, dekket kemenangen meraloken musuhku.

⁴¹Mperrus ngo ibaing ko karina musuhku, janah ibinasaken ko simernggogo atè midah aku.

⁴²Mengido tolong kalak i tapi oda lot mengurupi, dilo-dilo kalak i taba JAHOWA tapi oda ialoi.

⁴³Kulemetti kalak i bagè abu merhamburen, janah kusapu bagè kubang i dalan.

⁴⁴Ipas jelma durhaka nai ipaluah kono ngo aku, janah mi karina bangsa gabè perkuasa ngo aku; bangsa siso kutandai gabè hambangku.

⁴⁵Kalak sidèban pè tunduk bangku, janah iuèi karina perèntahku.

⁴⁶Enggo mersep keberanien kalak i, menggirgir ngo kalak i remuar i pertahanenna nai.

⁴⁷Nggelluh ngo JAHOWA! Nipoji mo Pembèlangku i! Pesangap mo kebelgahen Dèbata siPaluahken aku i.

⁴⁸Mennang ngo aku ibaing meraloken musuhku, karina bangsa ipepatu i hadeppenku,

⁴⁹ipaluah ngo aku ipas musuhku nai. JAHOWA ngo maing mennang aku i alongku nai, ilegenni ko ngo aku bai jelma kejam nai.

⁵⁰Kerna i kupoji mo Ko i tengah-tengah karina bangsa, janah kuèndèken pemoji-mojien baMu alè JAHOWA.

⁵¹Dèbata ngo memerèken kemenangen mbellen bai rajana, dak mermasèh atè ngo ia taba jelma sinipilihNa, imo si Daud dekket pinemparNa, soh mi amman sumendah.