Read Batak Dairi 2 Samuel 4 Bible Online

2 Samuel 4 - Batak Dairi bible

2 Samuel 4

¹Lot dèng ngo pemparen si Saul imo si Mefiboset anak si Jonatan. Kèpang ngo ia mulai merumur lima tahun, tikan matè si Saul bak si Jonatan. Ai tikan soh berita tersèngèt permatè kalak idi i kuta Jizreel nai, itempi pendèdahna mo si Mefiboset lako mperrus; tapi kumerna rudu-rudu daberru i, gabè ndabuh mo anak i, nai gabè kèpang mo. Idengkoh si Isyboset anak si Saul kessa mo enggo ibunuh si Abner i Hebron, gabè maknè mo bana tendina, janah gabè mbiar mo karina bangsa Israel. Lot ngo dua kalak pakalima perang si Isyboset: Sada mergerar si Baana, sada nai mergerar si Rekhab. Anak si Rimon ngo kalak i, i kuta Beerot nai, marga Benjamin. (Beerot termasuk kan suak Benjamin. Ukum pengisi aslina enggo mperrus mi Gitaim janah gabè merian i si).

⁵Berkat mo pakalima sidua i imo si Rekhab bak si Baana laus mi sapo si Isyboset janah soh mo kalak i tikan cèger ari, tupung tikan meddem tasari ia.

⁶Tertunduh ngo daberru penjaga bages tikan menapi pagè, terrus terpeddem. Kumarna i terbaing si Rekhab bak si Baana mo mbengket mendirip-ndirip.

⁷Ibengketti kalak i mo bilik pedemmen si Isyboset sienggo lenek meddem i, nai matè mo ia ijuluk. Ipancong kalak i mo takalna, janah iembah laus. Suntuk bernginna i merdalan kalak i i napa Jordan.

⁸Nai iberèken kalak i mo takal si Isyboset i taba si Daud i Hebron ninganna idokken, “En mo takal si Isyboset anak si Saul musuh Rajai, sidak mengeletlet kessah Rajai. Sidari èn mo ibalesken JAHOWA ulah-ulah si Saul bak pemparenna taba Rajai.”

⁹Tapi ialoi si Daud mo, “JAHOWA singgelluh i ngo paluahken aku ipas karina mara nai, ibettoh ngo tuhu ngo sinaing kudokken èn.

¹⁰Tikan i Ziklag, lot ngo kalak magahken bangku tersèngèt permatè si Saul, idokdok merembah berita selloh ia. Tapi kutangkup ngo ia janah kubunuh. Idi mo upahna mahan ali berita niembahna i kuberèken bana.

¹¹Kennah berraten dèng ngo hukum kudabuh bai kalak jahat sienggo memunuh kalak siso mersalah janah tikan meddem i bagesna. Bagèndari pè kupido ngo balesna i bamu, janah kusalpuni mo kono i babo tanoh èn nai.”

¹²Enggo kessa i, iperèntahken si Daud mo parangenna lako memunuh si Rekhab dekket si Baana. Enggo kessa ibunuh ipenggel mo tangan bak nèhè kalak i, igantung mo i gembar bendar. Tapi ukum takal si Isyboset ikuburken ngo i kuta i mi kuburen si Abner.