Read Batak Dairi 2 Samuel 5 Bible Online

2 Samuel 5 - Batak Dairi bible

2 Samuel 5

¹Enggo kessa i, merrohen mo karina pengulu marga-marga Israel mi Hebron mendahi si Daud, mendokken tabasa, “Kadè-kadè Rajai ngo kami.

²Tikala i nai ngo janah tikan si Saul dèng pè memerèntah kami, Rajai ngo menguluken soridadu Israel gennep lako mergeraha kalak i. Janah dèng ma enggo merbagah-bagah JAHOWA taba Rajai, magahken Rajai ngo menguluken bangsaNa janah gabè raja kalak i.”

³Nai merpadan mo si Daud dekket pengulu-pengulu Israel i, nai ipebangkit kalak i mo ia gabè raja Israel.

⁴Merumur tellupuluh tahun mo si Daud tikki mbangkit raja, janah empatpuluh tahun dekkahna ia mengerajai.

⁵Pitu sitengah tahun mo dekkahna ia i Hebron mengerajai Juda, janah tellupuluh tahun dekkahna ia i Jerusalem mengerajai suberri Israel bak Juda.

⁶Tikan sidari, berkat mo Raja Daud dekket parangenna lako mengkubu Jerusalem. Ukum dok atè kalak Jebus pengisi kuta i, oda tertaban si Daud Jerusalem i. Kumarna i nina kalak i mo tabasa, “Oda terbentas ko lako masuk mi kuta èn: Kalak pètung dekket kalak pangpangen pè sanggup ngo mengalo ko.”

⁷Nai idokken si Daud mo taba parangenna, “Lot ma ngo ndia kalak sinisèn i mergogo atè midah kalak Jebus, tosè bagè aku mergogo atè midah kalak i? Narih toko ngo nggogo atèna sanga sèkel ukurna memunuh kalak i? Mula lot ngo, cucuki kènè mo cerobong laè èn janah bunuhi kènè mo kalak pangpangen dekket pètung sikukecegoken i.” (I ngo kulih sebabna asa idokken dèba, “Kalak pètung dekket kalak sipangpangen oda ndorok mbengket mi Bages JAHOWA.”) Mennang ngo si Daud menaban bèntèng Sion. Igerari mo kuta i, “Kuta si Daud.” Ipekadè mo kuta i sikuliling bèntèng i, mulai i kebincaren nai imo delleng sinipedatesna merkitè tanoh.

¹⁰Makin ndekkah makin ntegguhna mo si Daud ibaing JAHOWA Dèbata Perkuasa dak mengurupisa.

¹¹Itengesken Raja Hiram i nagerri Tirus nai mo utusenna mendahi si Daud, bagi ma kayu arès Libanon dekket tukkang kayu bak tukkang batu lako memajek istana.

¹²Kumernaken i makin tokna mo si Daud, JAHOWA ngo petettahkensa gabè raja Israel janah petegguhken kerajaenna lako bai bangsa JAHOWA i.

¹³Enggo kessa lompat si Daud i Hebron nai mi Jerusalem, muat berru dèng ngo ia tah piga kali nai, janah ibaing dèng ma ngo tah piga nai siterbuangna; nai tambah ngo bilangen dukak-dukakna.

¹⁴Dukak-dukakna situbuh i Jerusalem imo: Si Syamua, si Sobab, si Natan, si Salomo,

¹⁵si Jibhar, si Elisua, si Nefeg, si Jafia,

¹⁶si Elisama, si Elyada dekket si Elifelet.

¹⁷Idengkoh kalak Palistin kessa mo enggo mbangkit raja Israel si Daud, roh mo kalak i naing menangkupsa. Tapi ibettoh si Daud ngo bertikna, nai laus mo ia mi bèntèng.

¹⁸Soh ngo kalak Palistin mi Napa Refaim janah petundukkensa.

¹⁹Nai mengkuso mo si Daud taba JAHOWA, nina mo, “Kennah aku ngo mengkubu kalak Palistin i? Mennang ngo aku ibaing kono?” “Kubu mo,” nina JAHOWA mengaloi. “Mennang pè ko kubaing.”

²⁰Nai laus mo si Daud mi Baal-Perasim, italuken mo soridadu kalak Palistin i sidi. Nai idokken mo, “Enggo ireppuk JAHOWA pertahanen musuhku, tosè bagè laè mengeraja mengampuh sagumanna ibagasen sigejap sambing.” Kumarna i mo asa ibaing gerar bekkas i Baal-Perasim.

²¹Mperrus mo kalak Palistin i, oda sanga nè iembah kalak i gana-gana sembahen kalak i. Ibuati si Daud dekket parangenna mo gana-gana i.

²²Oda pella sadikè dekkah nè ma, roh nola mo kalak Palistin merian i Napa Refaim.

²³Iulaki si Daud nola mo mengkusoi JAHOWA. Nina mo, “Ulang kanèn ko mengalo kalak i, tapi mergenning mo ko janah jalang mo kalak i i podi nai mayak kayu-kayu bakal.

²⁴Mula idengkoh kono sora bagè perderrap kalak merbaris i pucuk-pucuk kayu i, nai mènter dapetken mo, ai merdalan mo Aku i lebbèmu lako menaluken soridadu kalak Palistin i.”

²⁵Ibahanken si Daud mo bagè sinidokken JAHOWA bana i, gabè italuken mo kalak Palistin i mulai i Geba nai soh mi Gezer.