Read Batak Dairi 2 Samuel 6 Bible Online

2 Samuel 6 - Batak Dairi bible

2 Samuel 6

¹Enggo kessa i idiloi si Daud mo tenterra-tenterra sijagona i Israel merpulung tellupuluh ribu kalak buèna.

²Iuluken mo kalak i laus mi Baale-Jehuda lako mengaleng Pèti Perpadanen i sidi nai, kerna i si ngo idilo gerar JAHOWA Pergegoh Sisotercodi merian i babo kerubim.

³Ialeng mo Pèti Perpadanen i i bages si Abinadab nai i babo uruk janah iampèken mo mi babo pedati rembaru. Nai iarak si Uza bak si Ahio dukak si Abinadab mo pèti i; merdalan ngo si Uza kan lambungna,

⁴janah si Ahio merdalan kan lebbèna.

⁵Ukum si Daud dekket karina bangsa Israel kan jolo pèti i ngo merdalan ninganna tumataki bak mernangen lako pesangapken JAHOWA. Igerrit kalak i mo oning-oningen mermatcam bagè, imo kucapi, tambor, sordam, gendang sidua-dua bak gung.

⁶Soh kessa kalak i mi pengerriken si Nakhon, terdengdeng mo lembu penarik pedati i nai idoroken si Uza mo tanganna lako mencekkak Pèti Perpadanen i asa ulang ndabuh katèna.

⁷Gejapkenna i punguren mo Dèbata JAHOWA taba si Uza, ai dosken mengelèai JAHOWA ngo pemaingna i. Ibunuh mo si Uza gejapkenna i i bekkas i, i gembar Pèti Perpadanen i.

⁸Mulai i sidi nai mo bekkas i igerari Peres-Uza. Bonek ngo ukur si Daud kemulihken ibunuh JAHOWA si Uza.

⁹Tapi mbiar ngo si Daud taba JAHOWA, jadi nina mo, “Bakunè mo bagèndari perembahku Pèti Perpadanen i?”

¹⁰Nai gabè oda nè mo saut iembah Pèti Perpadanen i mi Jerusalem, tapi gabè ipeliniken mo mi bages si Obed-Edom kalak Gad.

¹¹Tellu bulan ngo dekkahna i si Pèti Perpadanen i, janah ipasu-pasu JAHOWA ngo si Obed-Edom bak karina pengisi bagesna.

¹²Terbertik ngo bai Raja Daud enggo ipasu-pasu JAHOWA simpangaen si Obed-Edom bak karina milikna kumarnaken Pèti Perpadanen i. Jadi laus mo ia mi bages si Obed-Edom lako meraleng Pèti i asa ilompat mi Jerusalem, ninganna merkerja mbellen.

¹³Enggo kessa merdalan ennem tingkah Pèti Perpadanen i, idokken si Daud mo kalak i mengadi. Nai ipèlèken mo lembu jantan dekket anak lembu sinipegomok.

¹⁴Nai tumataki mo si Daud mertuhu-tuhu lako pesampangken JAHOWA. Tikan bagidi mandar joppok ngo kessa ipakkè iberretken mi abakna.

¹⁵Bagi mo ibaing si Daud dekket karina kalak Israel mengompat Pèti Perpadanen i mi Jerusalem, ninganna mersurak-surak bak mersora sarunè.

¹⁶Tikan masuk Pèti i iarak mi kuta, itatap si Mikhal berru si Saul mo arap jendèla, nai idah mo Raja Daud menganjak-nganjak tumatak pesangapken JAHOWA, gabè moyang mo atè si Mikhal midah si Daud.

¹⁷Nai igamparken mo Pèti Perpadanen i mi undung-undung sienggo ibahan si Daud kin. Nai ipèlèken si Daud mo pèlèen situtungen dekket pèlèen perdamèen bai JAHOWA.

¹⁸Jadi ipasu-pasu mo kalak Israel merkitè-kitè gerar JAHOWA Pergegoh Sisotercodi.

¹⁹Nai ipempellaken mo pangaen bai kalak i karina. Gennep anak laki bang pè daberru silot i sidi terolih tersimbalging gulè sinitutung dekket roti bak salua. Nai molih mo kalak i karina mi bagesna gennep.

²⁰Tikan balik si Daud mi istana lako memasu-masu pengisi bagesna, karuar mo si Mikhal lako mendapetken si Daud, nina mo, “Sidari èn raja Israel tuhu-tuhu maing mersangap dirina. Enggo gabè sabar ia bagè kalak siso merukur siso bettoh-bettohen malu i hadeppen naposo daberru silot i istana.”

²¹Nai ialoi si Daud mo, “Tumataki aku lako pesangapken JAHOWA sienggo menulak bapamu dekket pemparenna ngo, janah memilih aku gabè menggem-nggemi Israel bangsaNa i. Kumarna i dakdak tumatak ngo aku pesangapken JAHOWA.

²²Lebihna i tupèh, uè ngo aku ilèai lebih daripada sindai. Asa mula pè merlèa aku idah kono, tapi ukum naposo sinialingenmu ndai, ipesangap ngo aku.”

²³Ukum si Mikhal berru si Saul i, nggempus ngo sidekkah nggelluhna.