Read Batak Dairi 2 Samuel 7 Bible Online

2 Samuel 7 - Batak Dairi bible

2 Samuel 7

¹Dak iondingi JAHOWA ngo Raja Daud bai karina musuhna nai, gabè terbaingsa mo menettap i istanana.

²Nai idokken raja i mo taba Nabi Natan, “Tengen mo, ukum aku merian i istana sinibahan ipas kayu arès Libanon nai ngo, keppèken Pèti Perpadanen JAHOWA pellin i undung-undung ngo ipennep.”

³Nai ialoi si Natan mo, “Bahanken mo sura-suramu alè Raja, kerna iurupi JAHOWA ngo Raja i.”

⁴Tapi bernginkenna i nina JAHOWA mo taba si Natan,

⁵“Laus mo ko, janah bagahken mo tennahKu èn taba naposongku si Daud, ‘Mèter kono mo majek bages bangKu.

⁶Kessa nai kupaluah bangsa Israel i Mesir nai soh mi bagèndari, oda nung dèng Aku menettap ipas sada bages tapi dak kadap ngo aku janah merian ipas sada undung-undung.

⁷Sidekkah kadap Aku rebbak dekket bangsa Israel, oda nung Kusèngèti taba pengendeng siKupilih i, kadè kulih sebabna asa oda ipajek kalak i bages perkayuna kayu arès Libanon lako bangKu.’

⁸Kumarna i alè Natan bagahken mo taba naposongKu si Daud, Aku JAHOWA Pergegoh Sisotercodi mendokken tabasa, ‘Enggo kubuat ko ipas ulaenmu mermakan i jampalen nai janah Kupebangkit gabè raja lako mengerajai bangsangKu Israel.

⁹Dak kudengani ngo kono barang mikè sambing merlangkah. Karina musuhmu enggo Kupepatu tikanna mergeraha. Naing termurmur ngo kono Kubaing tosè bagè pemimpin simbelgahna i tanoh èn.

¹⁰Janah dèng ma enggo Kupèmaken bekkas bai bangsangKu Israel, janah Kubaing kalak i menettap i si, asa ndorok sennang nggelluh kalak i, ndaoh habat ndaoh mara. Kessa nai soh kalak i mi tanoh èn, janah Kupebangkit simenguluken kalak i, ikubu kalak simerlemmo atè maing kejahaten ngo kalak i, tapi oda nè ngo masa sibagidi mi podinken èn. Kujandiken bamu, magahken mènak mo kono oda nè dak iganggu musuhmu, janah Kuberèken mo pinempar bamu.

¹²Luas mula dapet ajalmu, ikubur mo ko i pendèban empungmu, sada kalak ipas pemparenmu nai mo Kupebangkit gabè raja. Ia mo mahan bages bangKu. Hot ngo kerajaenna i soh mi sidekkah-dekkahna. Sada kalak pinemparna memerèntah sikira raja.

¹⁴Aku mo gabè Bapana, janah ia gabè anakKu. Mula salah ia, Kuhukum mo ia tosè bagè pemaing sada bapa taba dukakna.

¹⁵Tapi dak merandal ngo kubaing meradepkensa tosè bagè siKujandikan i, dak kuèngèt ngo jandingKu bana i, oda bagè sikubaing taba si Saul sienggo Kuompat janah Kupesampur, asa gabè kono nola mbangkit gabè raja.

¹⁶Dak hot ngo lot pinemparmu janah hot kerajaenmu soh sidekkah-dekkahna. Soh mi amman sumendah ngo sada kalak ipas pemparenmu nai memerèntah sikira raja.’ ”

¹⁷Nai ibagahken si Natan mo taba si Daud karina nidokken JAHOWA tabasa i.

¹⁸Nai ibengketti Raja Daud mo Undung-undung JAHOWA. Kundul mo ia mersodip, “Ialè JAHOWA Nidates Karinana situhuna oda patut aku dekket pinemparku menjalo karinana simerandal sinidokkenmu bangku i, sidekkahna èn.

¹⁹Keppè lebih daripada i dèng ngo iberèken ko nola alè JAHOWA Sintèmbul i; Enggo ibaing kono padan tersèngèt pinemparku mi ari sinaing roh. Janah enggo ipacidah kono i taba aku, tukasi pè aku jelma manusia sambing alè JAHOWA Nidates Karinana.

²⁰Kadè dèng mo ndia ndorok dokenkenku taba kono? Ibettoh kono ngo karina tersèngèt aku naposomèn.

²¹Merkitè padanmi ipas hendakMu sendiri Enggo ibaing kono karina pemahanen mbellen i lako memeddahi aku naposoMu èn.

²²Mermulia kalohon ngo ko alè JAHOWA Dèbata. Pellin kono ngo kessa Dèbata, isè poda lot tosè bagè kono. Kubettoh kami i kumarna enggo kin ibagahken kono i arnia nai.

²³Oda lot bangsa i suberri dunia èn bagè Israel. Pellin bangsa Israel ngo kessa ipaluah kono i perhambaen nai, asa gabè ummatMu. Kelengangen mbellen ngo ibaing ko bai kalak i, memaingken termurmur gerarmu i suberri dunia èn. Bangsa-bangsa sidèban rebbak dekket sembahenna enggo mo ipelaus kono, tikanna laus ummatMu mergeraha.

²⁴Enggo iabin kono bangsa Israel gabè ummatMu soh mi amman sumendah, janah kono ngo alè JAHOWA gabè Dèbata kalak i.

²⁵Bagèndari alè JAHOWA Dèbata enggo ipetetah kono padanmu i soh mi amman sumendah sienggo nidokkenmu tersèngèt aku bak pinemparku. Pesaut mo karina sienggo nipadankenmi.

²⁶Barang i dikè sambing pè dak ipesangap jelma i mo gerarmu ninganna idokken, ‘JAHOWA Pergegoh Sisotercodi ngo Dèbata kalak Israel.’ Asa sada ipas pemparenku nai ibaing kono mengerajai bangsa èn soh mi amman sumendah.

²⁷Alè JAHOWA Pergegoh Sisotercodi. Kuberaniken pè menodipken èn taba kono, kumarna Enggo ibagahken kono taba aku, keturunenku turun-tumurun ipebangkit kono mengerajai bangsa èn.

²⁸Ialè JAHOWA Sintèmbul i, kono ngo Dèbata; karina bagah-bagahMu dak ipesaut kono ngo, janah enggo iperbagah-bagah kono bangku simerandalna i.

²⁹Kemulihken i, dak pasu-pasu mo pinemparku, asa irasaken masèh atèmi soh mi amman sumendah. Ialè JAHOWA Nidates Karinana, enggo iperbagah kono karinana i, dak ipasu-pasu kono ngo pinemparku soh mi amman sumendah.”