Read Batak Dairi 2 Samuel 9 Bible Online

2 Samuel 9 - Batak Dairi bible

2 Samuel 9

¹Tikan sidari, kuso-kuso si Daud, “Lot dèng ngo ndia nggelluh pemparen si Saul? Ukum lot dèng ngo, naing ngo kubaing mendè basa bana kumernaken si Jonatan.”

²Lot ngo naposo pemparen si Saul mergerar si Ziba, nai idokken ia mo menghadep Raja Daud. Nai ikusoi Raja i mo ia, “Kono ngo si Ziba?” “Uè Raja nami,” nina mengaloi.

³Nai ikusoi raja i mo, “Lot dèng ngo nggelluh pemparen si Saul? Naing ngo kubaing mendè basa bana, bagè sienggo kupadanken bai Dèbata.” Ialoi si Ziba mo, “Lot dèng ngo sada nai anak si Jonatan, tapi kèpang ngo ia.” “I dikè ngo ia bagèndari?” nina raja i.

⁴“I Lodebar ngo, i bages si Makhir anak si Amel,” nina si Ziba mengaloi.

⁵Nai ipasulak Raja Daud mo mengalengi anak si Jonatan i.

⁶Si Mefiboset ngo gerar anak si Jonatan i. Roh kessa mo ia, mèter mersembah mo ia taba si Daud. Ipermongkami si Daud mo ia, nina mo, “O Mefiboset,” nai ialoi mo, “Kadè raja namm.”

⁷Nina si Daud mo, “Ulang kono mbiar. Naing mermasèh atè ngo aku taba ko kumernaken bapamu si Jonatan. Karina tanoh empungmu si Saul, kubalikken mo bamu janah sidekkah nggelluhmu mangan i istana èn mo kono.”

⁸Nai mersembah nola mo si Mefiboset ninganna idokken, “Kadè mo gunangku! Kasa bagi sellohna ibaing raja i taba aku?”

⁹Nai idiloken si Daud mo si Ziba naposo si Saul, nina mo mbangsa, “Karina harta tading-tadingen si Saul dekket pemparenna kuberèken taba kempu tuanmu èn.

¹⁰Kennah kono dekket dukak-dukakmu bak simengu- rupi kono mo mengula tanoh i lako bai tading-tadingen tuanmu si Saul. Berèken mo gegoh tanoh i bai kalak i asa cukup pa- ngaen kalak i. Tapi ukum si Mefiboset, dak mangan i istana mo ia sidekkah nggelluhna.” (Ukum si Ziba, sipuluh lima kalak ngo anakna janah duapuluh kalak naposona).

¹¹Ialoi si Ziba mo raja i, “Kubahanken pè karina perèntah Raja i.” Ukum si Mefiboset dak rebbakken mangan ngo dekket raja i, tosè bagè dukak Raja Daud sendiri.

¹²Lot ngo anak si Mefiboset mergerar si Mika. Karina dukak-dukak si Ziba gabè hamba si Mefiboset.

¹³Bagi mo si Mefiboset sikèpang duana nèhèna i merian i Jerusalem janah dak mangan i istana.