Read Batak Dairi 1 Raja-raja 10 Bible Online

1 Raja-raja 10 - Batak Dairi bible

1 Raja-raja 10

¹Raja daberru i Syeba mendengkoh tersèngèt ketermurmuren Raja Salomo. Nai roh mo ia mi Jerusalem lako mengoji si Salomo merkitè kuso-kuso simahal antusen.

²Roh ngo ia merdengan mbuè kalohon pendenganina bagi ma unta merembah rempah-rempah mbuè kalohon, bagi ma batu permata janah mbuè kalohon emmas. Pejumpa kessa mo ia dekket si Salomo, ipengkusoken raja daberru i mo mermatcam bagè kuso-kuso sindorok terpikirkensa.

³Karinana ngo kuso-kuso i ndorok ialoi si Salomo, ai sada bagè poda sulit iakap.

⁴Isaksiken raja daberru i sendiri ngo kepantasen si Salomo i. Idah ma ngo istana sinipajek si Salomo i.

⁵Bagi ma cara mahan bahaen pugabè-pugabè istanana, dekket perdos pakkèen bak bages kalak i. Idah ma ngo pangaen bak ènumen sinipehantar, bagi ma bakunè cara perkebbas mengkebasi tupung pèsta, dekket pèlèen-pèlèen sinipèlèken si Salomo i Bages JAHOWA. Karinana i memaing gabè kagum janah lengang raja daberru Syeba i.

⁶Nai nina mo taba si Salomo, “Karina sikudengkoh i nagerringku tersèngèt Rajai dekket kebijaken Rajai tuhu ngo keppè.

⁷Ukum tikanna i, oda ngo percaya aku, tapi enggo kessa roh aku, janah matangku sendiri mengidah karinana, gabè tok mo aku. Situhuna karina sikudengkoh i, oda lot sitengah sikuidah bagèndari. Keppèken lebbih dèng ngo kepantasen bak kinibèak Rajai daripada sinibagahken dèba taba aku.

⁸Merlaba olih kalohon ngo sinibages Rajai. Janah langkah kamuhun ngo pengakap karina pugabè simengula rebbak Rajai, gabè ndorok idengkoh bai Rajai nai karina peddah dekket kepantasen.

⁹Terpoji mo JAHOWA Dèbata Rajai. Kemulihken ipebangkit Rajai gabè raja Israel, teridah ngo merkitè i, sampang ngo atè JAHOWA midah Rajai. Oda merkedungen ngkelleng atèna midah Israel, kemulihkenna I ngo ipebangkit Rajai gabè raja kalak i, asa cèndek ibaing Rajai hatoren dekket keadilen.”

¹⁰Nai iberèken raja daberru nagerri Syeba imo luahna bai si Salomo, imo lebbih empat ribu kilo emmas dekket mbuè kalohon batu permata bak rempah-rempah. Oda nung nè si Salomo menjalo rempah-rempah bagè buè siniberèken raja daberru nagerri Syeba i. (

¹¹Keppel-keppel si Hiram simerembah emmas i Ofir nai bai si Salomo, mbuè ma ngo merembah batu permata dekket kayu jati.

¹²Ibaing si Salomo mo kayu i mahan pagar-pagar i Bages JAHOWA dekket istana raja i, bak mahan kucapi dekket gendang lako pakkèen perendè. Kayu jati simerandalna ngo kayu i sinaing iembah i mi Israel; oda nung nè idah dèba kayu bagi mendèna.)

¹³Tambah pemerèken Raja Salomo bagè ncemmalna, iberèken ma ngo bai raja daberru i nagerri Syeba i nai kadè sambing ipido. Nai molih mo raja daberru i mi kutana rebbakken dekket pendenganina i.

¹⁴Gennep tahun dak ijalo si Salomo ngo emmas, mohmoh duapuluh tellu ribu kilo,

¹⁵oda dèng termasuk laba ibas pertiga-tigaen nai dekket cokè bai saudagar-saudagar mbellen nai, bak bai raja-raja kalak Arab nai dekket gubèrnur-gubèrnur Israel.

¹⁶Ibahan si Salomo ma ngo dua ratus tambeng-tambeng mbellang ipas emmas pelangki nai. Gennep tambeng-tambeng pitu kilo emmas.

¹⁷Ibahan ma ngo 300 tambeng-tambeng emmas narih kèdèk. Gennep tambeng-tambeng kèdèk i dua kilo emmas. Karina i emmas pelangki ngo. Karina tambeng-tambeng i ibaing ngo i bekkas simergerar Bekkas Tembak Libanon.

¹⁸Ibahan ma ngo sada mbelgah karosi kerajaen, ilampis dekket gading janah itiktik dekket emmas tulèn.

¹⁹Mertangan ngo karosi i, janah i kacimbang lambung lot gana-gana nipersinga. I podi karosi i lot gana-gana takal lembu. Ennem tingkah ngo ardan karosi i.

²⁰I punca kacimbang lambung gennep tingkah ardan i lot ngo gana-gana nipersinga dua bellas ngkabuah ngo karina. Oda lot nung karosi kerajaen bagidi, barang i karajaen i dikè sambing pè i.

²¹Karina perènumen si Salomo ipas emmas nai ngo iteppa, bagi ma ngo dekket perkekkas i Bekkas Tembak Libanon iteppa ipas emmas pelangki nai. Oda lot ipas pirak nai iteppa. Kumarna i tikki si Salomo, oda ngo maharga ukum pirak dok atè jelma.

²²Mèduk ngo keppel mebellen si Salomo merlayar rasken dekket keppel-keppel Raja Hiram. Sikali tellu tahun molih ngo keppel-keppel i merembah emmas, pirak, gading, kerra dekket manuk-manuk uo.

²³Bèaken janah pantasen ngo Raja Salomo daripada karina raja barang i dikè sambing pè i dunia èn.

²⁴Karina jelma ni dunia èn sèkel pejumpa dekket si Salomo lako mendengkoh peddah kepantasen siniberèken Dèbata bana.

²⁵Merrohen ngo kalak i merembah luah bai si Salomo. Iberèken kalak i ngo pirak, emmas, oles, senjata, rempah-rempah, kuda dekket kuda boban. Bagi ngo dakdak mertahun-tahun.

²⁶Ibaing si Salomo ma ngo soridaduna seribu empat ratus kurèta perang, dekket sipuluh dua ribu soridadu merkuda. Dèba i Jerusalem ngo ibaing, janah dèba nai i barang piga kuta sidèbanna i.

²⁷Tikan pemerèntahen si Salomo, ukum pirak barang biasa sambing ngo idi i Jerusalem, ai dosken batu bagi ngo i, janah mertinèncuk ngo kayu arès Libanon tosè bagè kayu biasa.

²⁸Merkitè saudagar saudagar raja i, merrohen ngo kuda i Mesir nai bak i Kilikia nai,

²⁹dekket kurèta perang i Mesir nai. Harga sada kuda seratus limapuluh riar pirak janah harga sada kurèta perang ennem ratus riar pirak. Nai idèai saudagar-saudagar i ma mo dèba kuda dekket kurèta perang i bai raja-raja Het dekket raja-raja Siria.