Read Batak Dairi 1 Raja-raja 11 Bible Online

1 Raja-raja 11 - Batak Dairi bible

1 Raja-raja 11

¹Mèduk ngo berru bangsa sidèban ngkelleng atè si Salomo. Laènken berru raja Mesir, ikabini si Salomo ma ngo daberru Het, Moab, Amon, Edom dekket Sidon.

²Enggo kin ngo iperèntahken JAHOWA oda ndorok kabin kalak Israel dekket bangsa-bangsa i, ai kalak i ngo mengabin kalak Israel nola i podi ari mersembah taba dèbata siso tuhu. Tukasi pè bagi, keppè ikabini si Salomo ma ngo berru sidèban i.

³Lot ngo pitu ratus berru raja ikabini si Salomo, janah lot dèng tellu ratus kalak nai siterbuangna. Sinibagesna i ngo mengabin si Salomo menadingken Dèbata,

⁴asa tua-tua kessa mo ia gabè iajar-ajari kalak i mo ia menembah dèbata siso tuhu i. Ukum si Daud bapa si Salomo, setia ngo taba JAHOWA Dèbata, tapi si Salomo oda bagè bapana i.

⁵Isembah si Salomo ngo Asytoret, sembahen bangsa Amon.

⁶Bagi mo si Salomo merdosa taba JAHOWA. Ukum si Daud, bapa si Salomo, dak ièkutken ngo JAHOWA ipas nasa atè-atèna nai, tapi si Salomo oda ngo bagi.

⁷I babo delleng kan kebincaren Jerusalem, ipecènder ngo bekkas mersembah taba Kamos, imo sembahen kalak Moab, bagi ma taba Molokh sembahen kalak Amon duana i sembahen kecegonken atè.

⁸Ibahan si Salomo ma ngo bekkas bai sinibagesna berru bangsa sidèban i lako menutung dahupa dekket memèlèken pèlèen bai sembahen kalak i sendiri.

⁹Enggo mo dua kali ipacidah JAHOWA Dèbata Israel dirina taba si Salomo lako pesèngètkensa oda ndorok ia mersembah taba dèbata siso tuhu, keppèken oda iuèi si Salomo JAHOWA i. Gabè itadingken nola ngo tupèh JAHOWA, memaing gabè melaga JAHOWA tabasa.

¹¹Idokken JAHOWA mo, “Kumarna satdar ngo ko mengelausken padanmu dekket Aku janah oda iuèi ko perèntahKu, Kurampasi mo kerajaen i bamu nai janah kuberèken bai sada kalak pugabèmu.

¹²Tapi kemulihken bapamu si Daud, oda Kubaing dèng i sidekkah nggelluh dèng ko. Lebbè tupung anakmu nola pè gabè raja, asa Kubaing i.

¹³Tapi oda karina kerajaen i Kurampasi bana nai. Kemulihken naposongku si Daud dekket Jerusalem sienggo kubaing gabè kutangku i, kuberèken ma mo sada marga nai bai anakmu.”

¹⁴Nai ibaing JAHOWA mo perukuren si Ha- dad, sada kalak pinempar raja Edom, merceggo atè taba si Salomo.

¹⁵Ndekkah dèng madèngkenna i, enggo kessa italuken Raja Daud kalak Edom, laus ngo si Joab pakalima si Daud mi Edom lako menanem denganna sienggo matè i si. Ennem bulan mo dekkahna ia dekket parangenna merian i Edom. Janah sinderrangna i, ibunuhi kalak i mo karinana daholi silot i si.

¹⁷Tapi si Hadad tikala i sidang bajar-bajar dèng, enggo mperrus mi Mesir rebbak dekket barang piga kalak denganna kalak Edom naposo bapana kin.

¹⁸Berkat ngo kalak i i Midian nai mi Paran. I sidi gabè rabbak mo kalak i dekket barang piga kalak nai denganna, nai rasken mo kalak i laus mi Mesir, mendahi raja Mesir. Iberèken raja i ngo bages bai si Hadad dekket tanoh mahan bekkasna merian bagi ma jaminen nggelluh.

¹⁹Nai gabè alè-alè raja i mo si Hadad, gabè ipekabin raja i mo anggina bana, imo anggi bindoharana si Tahpenes bai si Hadad mahan sinibagesna.

²⁰Nai itubuhken sinibages si Hadad i mo sada anak ibaing mo gerarna si Genubat. Sinibages raja i ngo pebelgah-belgahken anak i janah merian i istana ngo ia rebbak dekkat dukak-dukak raja i.

²¹Soh kessa mo barita bai si Hadad, enggo matè keppè Raja Daud dekket si Joab pakalima soridadu Israel pè enggo matè ma, idokken si Hadad mo taba raja Mesir, “Paduè mo aku balik mi tanohku pemerrè.”

²²“Kasa bagi?” nina raja i mengkusoi, “lot iakap ko kurangna i sèn, asa naing balik ko mi tanohmu?” “Oda lot kurangen aku barang kadè sambing pè,” nina si Hadad mengaloi, “tapi paduè mo aku laus.” Nai balik mo ia mi tanohna.

²³Ibaing Dèbata ma ngo si Rezon, anak si Eliada, merceggo atè midah si Salomo. Si Rezon èn, imo sada kalak hamba Raja Hadadezer i Zoba nai, tapi mperrus ngo ia i sidi nai.

²⁴Nung ngo italuken raja Daud si Hadadezer èn, janah ibunuhi ngo dengan si Hadadezer kalak Siria. Tikanna i mperrus ngo si Rezon bai si Hadadezer nai, nai ipepulung mo dèba kalak, nai ia mo gabè èkuten pemberontak i. Laus mo ia dekket parangenna mi Damaskus janah merian i kuta i. I si mo ia ipebangkit parangenna i gabè raja Siria.

²⁵Tosè bagè si Hadad, Raja Rezon pè mermusuh ngo taba Israel sidang i nggelluh si Salomo janah dak isusahi ngo nagerri i.

²⁶Sidèbanna dèng ma memberontak taba si Salomo imo sada kalak pugabèna kin mergerar si Jerobeam. Anak si Nebat i Zereda sini Efraim nai ngo ia. Inangna enggo mebalu mergerar si Zerua.

²⁷Bagèen mo tori-torienna pemberontaken si Jerobeam. Sinderrang itèmbun tanoh sikan selatan Bages JAHOWA i, janah ipelias dingding batu kuta i,

²⁸mengula ma ngo si Jerobeam i si. Idah si Salomo kessa mo si Jerobeam i kalak pandè janah ngkasah, gabè iberèken mo tabasa memanduri perodi i aur marga Manasye bak Efraim.

²⁹Tikan sidari, karuar mo si Jerobeam i Jerusalem nai. Nai i tengah ndalan i jampalen, idapetken Nabi Ahia i Silo nai mo ia janah tikanna i memakè jubah rembaru.

³⁰Nai italkasi si Ahia mo jubahna i, janah iribaki mo gabè ribak dua bellas.

³¹Nai idokken mo taba si Jerobeam, “Buat mo sipuluh bagian bamu, ai bagèen ngo nina JAHOWA Dèbata Israel, ‘Kurampasi mo kerajaen èn bai si Salomo nai janah kuberèken sipuluh marga bamu.

³²Sada marga nai tong ngo hot bai si Salomo, kemulihken naposongKu si Daud dekket Jerusalem sienggo Kupilih i suberri nagerri Israel nai mahan kutangKu.

³³Kubaing pè bagi, kumarna itadingken si Salomo ngo Aku janah mersembah ia taba dèbata siso tuhu, imo: Asytoret, sembahen kalak Sidon; Kamos, sembahen kalak Moab, dekket Milkom sembahen bangsa Amon. Oda ngo ièkutken si Salomo gerrek atèngKu. Oda ngo bagè bapana si Daud ia dak menguèi bangKu janah dak mengulaken perèntah-perèntahKu.

³⁴Tapi tukasi pè bagidi oda ngo karina kerajaen i kubuat bana nai. Kubelli ngo tong merkuasa ia sidekkah nggelluhna. Kubaing bagi, Kemulihken naposongKu si Daud siKupilih i, janah dak iuèi pati-patinKu dekket perèntah-perèntahKu.

³⁵Bai anak si Salomo nai ngo Kubuat kerajaen i janah Kuberèken sipuluh marga bamu.

³⁶Ukum sada marga Kubelli ngo tong bana, asa dak tong lot sada kalak ibas pemparen si Daud nai, memerèntah merkitè Aku i Jerusalem, kuta siKupilih i mahan bekkas mersembah taba Aku.

³⁷Janah kono alè Jerobeam naing Kupebangkit gabè raja Israel janah Kupaduè ko memerèntah suberri aur sinikelemokenmu.

³⁸Mula bagè naposongKu si Daud ngo kono, tuhu-tuhu menguèi Aku janah mula mengèkutken pati-patinKu nggelluhmu janah pesampangken atèngKu merkitè iulaken kono karina perèntahKu bamu, nai dak Kudengani mo kono. Kupebangkit mo kono gabè raja i Israel. Kujamin ma ngo, pinemparmu pè gabè raja ma mo i Israel sumingkat kono, tosè bagè siKubaing i bai si Daud.

³⁹Kumarna merdosa si Salomo, Kuhukum mo pemparen si Daud, tapi oda ngo soh mi amman sumendah.’ ”

⁴⁰Soh kessa mo berita i bai si Salomo, gabè iusahaken mo memunuh si Jerobeam. Tapi mperrus ngo si Jerobeam mendahi Raja Sisak i Mesir, janah merian i si mo ia soh matè si Salomo.

⁴¹Berita sidèbanna tersèngèt karina sini- bahanken si Salomo dekket tersèngèt kepan- tasenna, enggo isuratken ibas bukku Sukut-sukuten tersèngèt si Salomo.

⁴²Empatpuluh tahun mo dekkahna si Salomo memerèntah karina Israel i Jerusalem.

⁴³Nai matè mo ia janah ikubur i Kuta si Daud. Nai si Rehabeam anakna i mo sumingkatsa gabè raja.