Read Batak Dairi 1 Raja-raja 12 Bible Online

1 Raja-raja 12 - Batak Dairi bible

1 Raja-raja 12

¹Laus mo si Rehabeam mi Sikhem kumarna enggo pulung i sidi karina kalak Israel si kan utara lako meminakisa gabè raja.

²Tikanna i, i Mesir dèng ngo si Jerobeam anak si Nebat kumarna mperrus ia bai Raja Salomo nai. Terbertik kessa mo bana tersèngèt si Rehabeam, balik mo ia mi Israel.

³Ginemgem si kan utara mendiloi si Jerobeam nai rebbakken mo kalak i laus menghadep si Rehabeam. Nina kalak i mo,

⁴“Ukum si Salomo bapa Rajai, mbotong ngo boban nami ibaing. Bagèndari pè mula ipenahang Rajai ngo boban nami, janah ikurangi kinipersuk nami, menguèi ngo kami taba Rajai.”

⁵Ialoi si Rehabeam mo, “Merpikir lebbè aku ibagasen tellu ari èn. Roh nola mo kènè enggo kessa tellu ari.” Nai mermulaken mo jelma nterrem i.

⁶Nai ipido si Rehabeam mo peddah bai situa-tua nai sienggo pennah kin gabè pemeddahi bai si Salomo bapa si Rehabeam. “Bakunè mo ningku mengaloi kalak i?” nina si Rehabeam mengkusoi. “Bakunè ngo ajar ndènè?”

⁷Ialoi kalak i mo, “Mula tuhu-tuhu ngo Rajai naing mengendengken ginemgem i, uèi mo pengidoen kalak idi i, asa menguèi kalak i bai Rajai sidekkah-dekkahna.”

⁸Tapi oda isarihken si Rehabeam peddah situa-tua i. Gabè laus nola mo ia mendahi kalak poso dèng sisada nterbang dekketsa, janah mengurupisa bagèndari.

⁹Ikusoi ma mo kalak i, “Bakunè ajar ndènè bangku lako mengaloi ginemgem simendokken bangku asa kupenahang boban kalak i?”

¹⁰Ialoi kalak i mo, “Naing mo bagèen pendokken Rajai taba kalak i, ‘Mula pè ndotè aku, gegohen dèng ngo aku daripada bapangku!’

¹¹Ukum bapa boban mbotong ngo iberèken bai ndènè, tapi botongen dèng ngo boban sinaing kuberèken bai ndènè. Kettang ngo ibaing mengeligas kènè, tapi ukum aku dori tada-tada ngo kubaing membatbat kènè!”

¹²Enggo kessa tellu ari roh nola mo si Jerobeam dekket jelma nterrem i menghadep Raja Rehabeam, bagè sienggo idokken kin.

¹³Merralo mi peddah situa-tua i, mèter isergangi ngo jelma siroh mendahisa i.

¹⁴Bagè pendokken kalak sinarih poso dèng, nina mo, “Ukum bapa, boban mbotong ngo iberèken bai ndènè, tapi botongen dèng ngo boban sinaing kuberèken bai ndènè. Kettang ngo ibaing mengeligas kènè, tapi ukum aku dori tada-tada ngo kubaing membatbat kènè!”

¹⁵Oda ngo isarihken pengidoen ginemgem i. Tapi karina i harkat JAHOWA ngo. Ai kennah saut ngo sinidokken JAHOWA merkitè Nabi Ahia i Silo i nai tersèngèt si Jerobeam anak si Nebat.

¹⁶Idah jelma nterrem i kessa mo, oda uè raja i menguèi pengidoen kalak i, mèter mersurak mo kalak i, “Man kadènta mo si Daud dekket pemparenna! Ai oda nung ibaing i barang kadè pè siperlu banta. Alè Israel, ita kè mo balik! Belli mo si Rehabeam i mengurus dirina sendiri!” Nai mermulaken mo kalak Israel,

¹⁷asa pellin nagerri Judea mo kessa i rajai si Rehabeam.

¹⁸Tukasi pè bagi, idokken Raja Rehabeam dèng ma ngo si Adoniram mandur perodi i lako pemènakken jelma nterrem i. Tapi ibentiri kalak i ngo ia dekket batu gabè matè mo ia. Mengidah i, isudu si Rehabeam mo memasang kurètana, nai mperrus mo ia mi Jerusalem.

¹⁹Mulai i sidarinkenna i nai dak memberontak ngo ginemgem si kan utara kerajaen Israel taba raja-raja pemparen si Daud.

²⁰Idengkoh karina kalak Israel kessa mo enggo balik keppè si Jerobeam i Mesir nai, idilo kalak i mo ia mi sada pulungen nai iminaki kalak i mo ia gabè raja Israel. Pellin kalak Juda sambing nai ngo kessa tong setia taba pemparen si Daud.

²¹Soh kessa mo Raja Rehabeam mi Jerusalem, ipepulung mo parangenna 180.000 kalak sisellohna i marga Juda bak Benjamin nai lako mengalo kalak Israel asa hot kuasana bang taba marga-marga silot i utara Israel.

²²Tapi ipasulak Dèbata mo Nabi Semaya

²³mendahi si Rehabeam lako magahken berita èn, bagi mendahi karina marga Juda bak Benjamin,

²⁴“Ulang mergeraha kènè dekket kaka-anggi ndènè kalak Israel. Mulak mo kènè! Ai aku ngo maing masa karina simasa i.” Nai karina mo kalak i menguèi sinidokken JAHOWA i, nai balik mo kalak i mi bagesna gennep.

²⁵Enggo kessa mbangkit si Jerobeam gabè raja Israel ipetegguh mo kuta Sikhem i aur uruk Efraim, nai merian i si mo ia lebbè. Nai laus nola mo ia i sidi nai janah ipetegguh mo kuta Pnuel.

²⁶Ai bagèen ngo sura-surana, “Mula dak tong dèng ngo jelma nterrem i laus mi Jerusalem lako memèlèken pèlèen i Bages JAHOWA, bagè sapatna èn, bakunè pè balik nola ngo kalak i kan si Rehabeam raja Juda, gabè ibunuh nola mo aku.”

²⁸Enggo kessa itimbangi tersèngèt mi si, iteppa mo dua mèjan emmas niperlembu, nai nina mo taba jelma nterrem i, “Kènè alè bangsa Israel! Enggo toko dekkahna dak laus kènè mi Jerusalem lako menembah JAHOWA! Bagèndari pè, èn mo dèbata ndènè sienggo mengarak kènè karuar i Mesir nai!”

²⁹Nai ibaing si Jerobeam mo emmas niperlembu i sada i Betel janah sada nai i Dan.

³⁰Nai gabè merdosa mo ginemgem i kumarna laus kalak i mersembah mi Betel dekket mi Dan.

³¹Ipecènder si Jerobeam dèng ma ngo bekkas mersembah sidèban i pucuk-pucuk delleng, janah ipebangkit mo gabè imam siso marga Lewi.

³²Nai idokken si Jerobeam mo imam-imam i merian i Betel lako mengulaken bahanna i si, janah ia sendiri mo memèlèken pèlèen taba gana-gana lembu emmas i. Ipettah mo ari lima bellas bulan ualuh gabè ari raya Israel, dos dekket ari raya i Judea. Tupung ari i laus ngo si Jerobeam mi Betel lako memèlèken pèlèen dekket mengerayaken ari raya sienggo nitentukenna i.