Read Batak Dairi 1 Raja-raja 14 Bible Online

1 Raja-raja 14 - Batak Dairi bible

1 Raja-raja 14

¹Tikanna i cioen mo anak si Jerobeam mergerar si Abia.

²Nai idokken si Jerobeam mo mbang sinibagesna, “Kebbasi mo asa laus kono mi Silo mi bages Nabi Ahia simendokken bangku tikala i gabè raja Israel aku. Tapi pekalih rupa mo ko, asa ulang itandai dèba ko.

³Embah mo luahmu sipuluh roti, kuè cituk dekket tenggoli sada botol. Kusoken mo tabasa, kadè sinaing masa bai anakta si Abia. Bagahenken nabi i ngo bamu i.”

⁴Nai laus mo sinibages si Jerobeam mi bages Nabi Ahia i Silo. Oda nè ngo merpendidah nabi i kumarna enggo tua-tua kalohon.

⁵Tapi ibagahken JAHOWA ngo tabasa roh nè mo sinibages si Jerobeam lako mengkusoken tersèngèt anakna sicioen i. Ibagahken JAHOWA ma ngo taba Nabi Ahia sinaing dokenkenna nahan. Soh kessa mo sinibages si Jerobeam i si, ipakulah mo bagè cara kalak sidèban ia.

⁶Tapi idengkoh Nabi Ahia kessa mo sora nèhèna i pèntu, idokken mo, “Mi bages mo kènè. Kubettoh ngo, sinibages si Jerobeam ngo kènè. Ulang pella pakulah-kulah. Lot berita oda selloh bamu.

⁷Molih mo kènè janah bagahken kènè taba si Jerobeam, bagèen ngo pendokken JAHOWA Dèbata Israel, ‘Enggo Kupilih ko i tengah-tengah jelma nterrem i nai janah Kupebangkit gabè perkuasa taba ummatKu Israel.

⁸Enggo Kuberrè kerajaen bamu siKurampasi bai pemparen si Daud nai. Tapi oda ngo bagè naposongKu si Daud kono. Setia kalohon ngo ia bangKu janah patuh mi perèntahKu. Pellin siKusetujui ngo kessa iulaken.

⁹Tapi ukum kono, mengulaken buèen dèng kejahaten daripada siniulaken kalak i simemerèntah sinderrang oda dèng kono. Itadingken kono ngo Aku janah mendungkul lagangKu merkitè iteppa ko sembahen dekket mèjan emmas lako isembah.

¹⁰Kemulihken i Kubaing mo roh olpek taba simpangaen ko. Karina pemparenmu daholi barang kadè pè pangkatna, kennah ibunuh ngo. Kupetumpat mo kènè sisimpangaen, tosè bagè kalak menapu panting ceggah.

¹¹Kadè-kadèmu simatè i kuta, kennah ipa- ngan biang, mula matè i ruar kuta, kennah ipangani manuk-manuk. Èngèt mo, Aku JAHOWA simendokken i.’ ”

¹²Iterrusken Nabi Ahia mo mendokken taba sinibages si Jerobeam, “Bagèndari pè molih mo kè. Tikan soh kènè nahan mi kuta, matè mo anak ndènè i.

¹³Karina kalak Israel bonek janah mengkuburkensa. Pellin ia mo kessa sisimpangaen si Jerobeam selloh ikuburken, ai pellinsa mo kessa toko ipas ukur JAHOWA Dèbata, Israel.

¹⁴Naing ibaing JAHOWA mo sada kalak raja bai Israel lako mendungi pemparen si Jerobeam sebagè raja. Enggo dapet arina. Mulai bagèndari nai mo,

¹⁵ihukum JAHOWA kalak Israel, gabè mèol-èol mo bagè arngo ipas laè. Ipelaus JAHOWA mo kalak Israel i nagerri merandal èn nai siniberèkenna taba empung kalak i. Ipensèrakken mo kalak i mi kèparen laè Efrat, kumarna idungkul kalak i pungurNa merkitè meneppa mèjan sembahen Asyera.

¹⁶Itadingken JAHOWA mo Israel kumarna merdosa si Jerobeam janah memaing gabè erdosa ma kalak Israel.”

¹⁷Enggo kessa bagi, laus mo sinibages si Jerobeam i mi Tirza. Soh kessa mo ia mi sapona, matè mo anakna i.

¹⁸Bonek mo kalak Israel, nai ikuburken kalak i mo ia tosè bagè sienggo idokken JAHOWA kin merkitè Nabi Ahia, naposoNa i.

¹⁹Tori-torien sidèbankenna i tersèngèt si Jerobeam, bak pemerèntahenna dekket geraha siniulukenna, enggo isuratken ibas bukku Tori-torien Raja Israel.

²⁰Duapuluh dua tahun mo dekkahna si Jerobeam gabè raja, nai matè mo ia janah ikubur. Anakna mergerar si Nadab mo gancihna gabè raja.

²¹Tikan si Rehabeam anak si Salomo mbangkit raja i Judea, merumur mo ia empatpuluh sada tahun. Sipuluh pitu tahun dekkahna ia memerèntah i Jerusalem. Kuta idi ngo ipilih JAHOWA gabè bekkas mersembah tabasa, i suberri Israel. Inang si Rehabeam imo si Naama berru kalak Amon.

²²Mengulaken jahat ngo kalak Juda ipenengennen JAHOWA. Lebbih jahat dèng ngo ulah-ulah kalak i bai empungna nai lako mendungkul laga JAHOWA.

²³I babo delleng dekket i terruh-terruh kayu mbellen, ibahan kalak i ngo bekkas menembah sembahen, janah ipecènder ma ngo rumah bak mèjan Asyera gabè sembahenna.

²⁴I bekkas i mo ka- lak i merlangkah julu meddem mahan pèlèenna taba sembahen. Daholi pè gabè mengulaken luhlah mo samah-samahsa. Iulaken kalak Juda mo karina bagè pengelako siso kasèa siniulaken bangsa sienggo ipelaus JAHOWA i nagerri i nai tikan roh kalak Israel mi si.

²⁵I tahun pelimaken pemerèntahen si Rehabeam, ikubu si Sisak raja Mesir mo Jerusalem.

²⁶Itaban mo karina barang-barang maharga silot i Bages JAHOWA dekket i istana raja, bagi ma tambeng-tambeng sinibahan si Salomo.

²⁷Nai mahan gancihna ipeteppaken si Rehabeam nola mo tambeng-tambeng tembaga, janah ipesakat mo i taba èkuten penjaga pèntu pengkeruhen istana raja.

²⁸Gennep laus raja i mi Bages JAHOWA iembah perjaga i mo tambeng-tambeng i, enggo kessa i iulakken nola mo mi bilik jaga.

²⁹Tori-torien sidèbanna i dèng tersèngèt Raja Rehabeam enggo isurat ibas bukku Tori-torien Raja-raja Juda.

³⁰Sidekkah raja Rehabeam dak masa ngo geraha i tengah-tengah si Rehabeam dekket si Jerobeam.

³¹Nai matè mo si Rehabeam janah ikubur i perkuburen raja-raja i Kuta si Daud. Nai si Abiam anakna i mo gancihna gabè raja.