Read Batak Dairi 1 Raja-raja 15 Bible Online

1 Raja-raja 15 - Batak Dairi bible

1 Raja-raja 15

¹I tahun pesipuluhualuhken pemerèntahen si Jerobeam i Israel, mbangkit raja mo si Abiam i Judea,

²janah tellu tahun ngo dekkahna ia memerèntah i Jerusalem. Inangna mergerar si Maakha berru si Abisalom.

³Iulaken si Abiam ngo dosa bagè bapana. Oda ngo iuèi Dèbata JAHOWA ibas pusuh-pusuh peratèenna nai, laèn ngo ia bai si Daud nai, empungna i.

⁴Tapi kemulihken si Daud, nai iberrèken JAHOWA Dèbata sinisembah si Daud mo sada kalak anak bai si Abiam, lako menggancihsa gabè raja i Jerusalem, dekket lako mempertahenken kuta i.

⁵Ibaing JAHOWA pè i kemulihken si Daud dakdak pesampangken atèNa. Oda nung itonja si Daud perèntah JAHOWA, laènken tersèngèt si Uria kalak Het i.

⁶Geraha meradepken si Rehabeam dekket si Jerobeam simermula tikan pemerèntahen si Rehabeam nai dak terrus dèng ngo masa sidekkah pemerèntahen si Abiam.

⁷Tori-torien tersèngèt si Abiam enggo isurat ipas bukku Tori-torien Raja-raja Juda.

⁸Matè mo si Abiam janah ikubur i Kuta si Daud. Si Asa anakna i mo menggancihsa gabè raja.

⁹Peduapuluh tahunken si Jerobeam memerèntah Israel, mbangkit raja mo si Asa i Juda.

¹⁰Empatpuluh sada tahun mo dekkahna ia memerèntah i Jerusalem. Empungna imo si Maakha berru si Abisalom.

¹¹Tosè bagè si Daud empungna i, sampang ngo atè JAHOWA midah si Asa.

¹²Karinana perlangkah julu meddem silot i bekkas mersembah taba sembahen ipuari ia ngo, janah karina sembahen sinipecènder raja-raja sinderrang madèng ia, ipetumpat i suberri aur.

¹³Empungna imo si Maakha, ipettadi ipas ulanna nai sikira Inang permasuari, kumarna ia ngo mahan mèjan Asyera simemaingken luhlah, ai i ngo nina sembahen maing mberras. Irumpakken si Asa mo sembahen i janah ilekkup i Napa Kidron.

¹⁴Tukasi pè oda karina bekkas mersembah taba sembahen i irumpakken si Asa, tapi tong ngo setia ia taba JAHOWA sidekkah nggelluhna.

¹⁵Karina emmas bak pirak sienggo ipèlèken bapana bai JAHOWA, iembah ngo mi Bages JAHOWA, bagi ma ngo dekket emmas bak pirak sinipèlèkenna sendiri.

¹⁶Sidekkah si Asa memerèntah i Juda dekket si Baesa i Israel, dak tong ngo masa geraha bai raja sidua i.

¹⁷Ikubu si Baesa mo Juda janah ipetegguh kuta Rama lako memètut dalan karuar masuk Juda.

¹⁸Kemulihkenna i ibuat si Asa mo karina emmas dekket pirak silot i Bages JAHOWA dekket silot i istana raja, nai itengesken mo i mi Damaskus bai si Benhadad raja Siria anak si Tabriman imo kempu si Hezion. Itengesken ngo barang-barang i merkitè piga-piga kalak pugabè istana dekket tennah bagèen,

¹⁹“Merpadan mo kita asa tong meralè-alè bagè sienggo ibaing pertuanta. Isèn kutengesken ngo emmas bak pirak mahan luah, asa ulang nèngè meralè-alè raja i dekket si Baesa raja Israel, asa itarik balapergunggungna i nagerringku nai.”

²⁰Toko ngo atè si Benhadad mi pengidoenna i nai ipasulak mo lubalangna dekket balapergunggungna mengkubu kuta Israel. Italuken kalak i mo Iyon, Dan, Abel-Bet-Maakha dekket Kinerot i gembar Tao Galilea dekket karina nagerri Naptali.

²¹Idengkoh si Baesa kessa mo berita i, ipettadi mo petegguhken kuta Rama. Laus mo ia mi Tirza janah mentadi mo ia sigejap mergeraha.

²²Enggo kessa bagi, karina jelma silot i suberri aur Juda iperèntahken Raja Asa mo lako merembah batu dekket kayu sinipakkè si Baesa i Rama lako petegguhken kuta i. Gabè ibaing si Asa mo perkayu i lako petegguhken kuta Mizpa dekket Giba, imo kuta i aur Benjamin.

²³Tori-torien sidèbanna tersèngèt Raja Asa, kelubalangenna dekket kuta sinipetegguhna, enggo isurat ibas bukku Tori-torien Raja-raja Juda. Tikan tua-tua ia, cioen ngo duana nèhèna.

²⁴Matè mo ia janah itanem mi perkuburen raja-raja i Kuta si Daud. Anakna mo mbangkit raja sumingkatsa.

²⁵I tahun peduaken pemerèntahen Raja Asa i Juda, mbangkit raja mo si Nadab anak si Jerobeam i Israel, janah dua tahun mo dekkahna ia memerèntah.

²⁶Tosè bagè bapana, ia pè mengulaken kejahaten ngo i penengen JAHOWA, gabè imo memaing kalak Israel mengulaken dosa.

²⁷Si Baesa anak si Ahia, marga Isasar mertaki mengalo si Nadab, nai ibunuh mo si Nadab i. Tikanna i tupung ngo si Nadab bak parangenna mengkubu kuta Gibeton i nagerri Palistin.

²⁸Masa ngo i i tahun petelluken pemerèntahen si Asa i Juda. Bagi mo carana si Baesa gabè raja Israel menggancihi si Nadab.

²⁹Enggo kessa mbangkit raja si Baesa, mèter iriputken mo karina simpangaen si Jerobeam. Tosè bagè sienggo idokken JAHOWA kin merkitè nabi Ahia i Silo nai, terbunuh mo karina simpangaen si Jerobeam, sada kalak poda maluah.

³⁰Merdosa ngo si Jerobeam memaing asa merdosa ma kalak Israel. Merkitè bagidi idungkuli si Jerobeam ngo pungur JAHOWA Dèbata sinisembah kalak Israel.

³¹Tori-torien sidèbanna i tersèngèt si Nadab enggo isurat ibas Bukku Tori-torien Raja-raja Israel.

³²Sidekkah pemerèntahen Raja Baesa i Israel, dak masa ngo geraha i tengah-tengah si Baesa dekket Raja Asa i Juda nai.

³³I tahun petelluken pemerèntahen Raja Asa i Juda, mbangkit raja mo si Baesa anak si Asa i suberri Israel. Duapuluh empat tahun mo dekkahna ia memerèntah i Tirza.

³⁴Tosè bagè Raja Jerobeam, Raja Baesa pè merdosa ngo taba JAHOWA memaing kalak Israel pè mengulaken dosa.