Read Batak Dairi 1 Raja-raja 16 Bible Online

1 Raja-raja 16 - Batak Dairi bible

1 Raja-raja 16

¹Nai idokken JAHOWA mo taba Nabi Jehu anak si Hamani, nina mo, “Pesoh mo taba si Baesa tennahKu èn,

²‘Ukum arnia, kadè kin poda ko, tapi enggo Kupebangkit ko gabè èkuten bangsangKu Israel. Bagèndari merdosa ngo ko bagè si Jerobeam memaingken bangsangKu Israel pè gabè merdosa, mendungkul pungurKu.

³Kemulihken i, kono pè dekket kadè-kadèmu kennah Kuripasken tosè bagè sienggo kubaing taba si Jerobeam.

⁴Kadè-kadèmu simatè i kuta, kennah ipangani biang, janah simatè i ruar kuta kennah ipangani manuk-manuk.’ ”

⁵Ipesakat Nabi Jehu ngo tennah JAHOWA sitaba si Baesa bak kadè-kadèna i kumerna merdosa ngo si Baesa ipenengen JAHOWA, ai idungkuli si Baesa ngo laga JAHOWA, oda ngo pellin kumarna ibunuh i karina sisimpangaen si Jerobeam. Tori-torien sidèbanna i dèng tersèngèt si Baesa dekket kelubalangenna enggo isurat ibas bukku Tori-torien Raja-raja Israel. Matè mo si Baesa nai itanem mo i Tirza. Anakna si Ela mo mbangkit raja menggancihisa.

⁸I tahun peduapuluh ennemken pemerèntahen Raja Asa i Juda, mbangkit raja mo si Ela anak si Baesa i Israel. I Tirza ngo ia memerèntah dua tahun dekkahna.

⁹Si Zimri sada kalak lubalang memguluken sitengah soridadu merkurèta, mertaki mengalo si Ela. Tikan sidari, mènum-mènum mo si Ela i Tirza sanga mabuk i bages si Arza, huntuen pengurus Istana raja.

¹⁰Nai roh mo si Zimri ibunuh mo si Ela, nai mbangkit raja mo ia menggancih si Ela. Masa ngo i i tahun peduapuluh pituken pemerèntahen Raja Asa i Juda.

¹¹Enggo kessa gabè raja si Zimri, mèter ibunuh mo karina kadè-kadè Raja Baesa. Bagi ma ngo dekket karina kaka-anggi si Baesa dekket dengan-dengan simpanganna pè oda lot maluah.

¹²Tosè bagè sinidokken JAHOWA tersèngèt si Baesa merkitè Nabi Jehu, karinana ngo kadè-kadè si Baesa terbunuh.

¹³Si Baesa bak anakna si Ela mersembah ngo taba sembahen memaing kalak Israel pè gabè memaing dosa. Kumarna i idungkuli kalak i ngo pungur JAHOWA Dèbata sikennah isembah kalak Israel.

¹⁴Tori-torien tersèngèt si Ela enggo isurat ibas bukku Tori-torien Raja-raja Israel.

¹⁵I tahun peduapuluh pituken pemerèntahen Raja Asa i Juda mbangkit raja Israel mo si Zimri janah i Tirza ngo ia memerèntah pitu ari dekkahna. Tikanna i tupung ngo balapergunggung Israel mengkubu Gibeon kuta kalak Palistin.

¹⁶Idengkoh kalak i kessa mo enggo mertaki janah ibunuh si Zimri raja i, sidarinkenna i ma, ipebangkit kalak i mo si Omri pakalima kalak idi gabè raja Israel i perundung-undungen kalak i.

¹⁷Nai itadingken si Omri bak parangena i mo Gibeton, ikubu kalak i mo Tirza.

¹⁸Idah si Zimri kessa mo enggo terampas kuta i, ibengketti mo istana, nai iserbu mo istana i rebbak dekketsa, nai matè mo ia.

¹⁹Masa ngo i kumarna mengulaken jahat ngo ia ipenengennen JAHOWA. Codi bagè Raja Jerobeam, si Zimri pè merdosa ngo taba JAHOWA, memaing kalak Israel pè merdosa ma.

²⁰Tori-torien sidèbanna i tersèngèt si Zimri dekket taki-taki selbuhna, enggo isurat ibas bukku Tori-torien Raja Israel.

²¹Masa mo persilisihen i tengah-tengah kalak Israel kumarna lot kalak sèkel asa si Tibni anak si Gimat mo gabè raja, tapi lot ma ngo sèkel asa si Omri mo mbangkit raja.

²²Ujungna mennang mo si kan si Omri. Matè mo si Tibni janah si Omri mo mbangkit raja.

²³Masa ngo i petellupuluh sada tahunken pemerèntahen si Asa i Juda. Dua bellas tahun ngo dekkahna si Omri mengerajai Israel. Ennem tahun dekkahna ia memerèntah i Tirza.

²⁴Nai itokor mo sada delleng ennem ribu riar pirak hargana bai sada kalak nai mergerar si Semer. Ibahan mo gabè kuta i delleng i, janah igerari mo i Samaria, mengèkutken gerar si Semer sidasa delleng i kin.

²⁵Belgahen dèng ngo dosa siniulaken si Omri daripada siniulaken raja-raja simemerèntah i lebbèenkenna.

²⁶Bagè si Jerobeam, si Omri pè merdosa ngo memaingken kalak Israel pè merdosa janah mersembah taba sembahen. Kemulihken i idungkul kalak i ngo pungur JAHOWA, Dèbata sikennah sembahen kalak Israel.

²⁷Tori-torien sidèbanna i dèng tersèngèt si Omri dekket karina sinibakinna enggo isurat ibas bukku Tori-torien Raja-raja Israel.

²⁸Enggo kessa matè si Omri janah itanem i Samaria, anakna si Ahab mo mbangkit raja menggancihisa.

²⁹I tahun petellupuluh ualuhken pemerèntahen Raja Asa i Juda, mbangkit raja Israel mo si Ahab anak si Omri, janah i Samaria mo ia memerèntah, duapuluh dua tahun dekkahna.

³⁰Belgahen ngo ibahanken ia dosa daripada raja-raja ilebbèenkenna ipenengen ni JAHOWA.

³¹Tong ngo oda merkebiasen dèng bana mengulaken dosa bagè Raja Jerobeam. Ikabini mo si Izebel berru Raja Etbaal i Sidon nai, janah Baal ngo isembah.

³²Ipajek ngo bages persembahen taba Baal i Samaria, janah ibahan ngo sada langgaten i bages i bai sembahen i.

³³Ibahan ma ngo mèjan Sembahen Asyera. Buèen dèng ngo dosa iulaken daripada siniulaken karina raja Israel simemerèntah i lebbèenkenna. Kumarna i idungkul ngo pungur JAHOWA, Dèbata sikennah isembah kalak Israel.

³⁴Tikan pemerèntahen si Ahab, ipekadè si Hiel kalak Betel nola mo balik kuta Jeriko. Tapi bagè sienggo idokken JAHOWA kin merkitè si Josua anak si Nun, kepatèen anak dua kalak mo si Hiel: Si Abiram anakna situaen matè tikan mahan pèntu pengkeruhen kuta i si Hiel.