Read Batak Dairi 1 Raja-raja 17 Bible Online

1 Raja-raja 17 - Batak Dairi bible

1 Raja-raja 17

¹Lot mo sada kalak nabi mergerar si Elia. I Tisbe nai ngo asalna imo sada kuta i aur Gilead. Tikan sidari idahi mo Raja Ahab, lako mendokken, “Merkitè gerar JAHOWA singgelluh i, Dèbata sinisembah kalak Israel bak sikuuèi i, kubagahken mo bai Rajai, ibagasen dua barang tellu tahun roh èn, oda lot hembun barang roh udan giam cituk pè, mula oda aku mendokken.”

²Enggo kessa i, idokken JAHOWA mo taba si Elia,

³“Tadingken mo bekkas èn, laus mo ko mi kebincaren i kèpar Laè Jordan, ciboni mo ko i si i gembar anak Laè Kerit.

⁴Ndorok mo ko menum ibas anak batang laè idi nai, janah Kupasulak mo manuk-manuk kak merembah pangaen bamu.”

⁵Iuèi si Elia ngo perèntah i, janah laus mi laè Kerit, janah merian i si mo ia.

⁶Laè i mo ènumenna, janah roti dekket jukut ngo pa- nganna siniembah kak gennep ceggen bak gennep mbon.

⁷Enggo kessa barang sadikè dekkahna marsak mo dahan laè i kumarna oda roh udan.

⁸Nai idokken JAHOWA mo taba si Elia,

⁹“Laus mo ko bagèndari mi kuta Sarfat, ndessing mi Sidon janah merian i si mo kono. Enggo kudokken sada kalak daberru mbalu i sidi, asa merèken kono mangan.”

¹⁰Nai laus mo si Elia mi Sarfat. Soh kessa ia mi pèntu pengkeruhen kuta i, idah si Elia mo sada kalak daberru mbalu tupung pepulungken sebban. Nai idokken si Elia mo taba simbalu i, “Alè nangè, tolong mo alengi lebbè giam cituk laè asa mènum aku.”

¹¹Sidang merdalan daberru mbalu i lako mengaleng laè i, idokken si Elia mo, “Alè nangè, embah kènè ma mo dekket roti cituk.”

¹²Ialoi daberru mbalu i mo, “Merkitè gerar JAHOWA singgelluh i, Dèbata sinisembah ndènè i, kusumpahken mo oda lot rotingku. Pellin singgellem nai ngo kessa nditakku ibas mangkuk janah cituk nai ma minak Zaitun ibas botol. Tupung pepulungken sebban ngo aku lako naing kitasak nditak sicituk i, asa ndorok aku mangan dekket dukakku. Idi nai ngo kessa pangaen nami perpodi, enggo kessa kerri idi, pellin mèma lako matè nai ngo kami.”

¹³“Ulang mbiar kènè alè Nangè,” nina si Elia mbangsa. “Tasak kènè mo pangaen bai ndènè dekket bai anak ndènè i. Tapi sinderrang madèng i, bahan mo lebbè sada roti ibas nditak bak minak nai, janah taruhken mi sèn.

¹⁴Kumarna idokken JAHOWA Dèbata sinisembah kalak Israel ngo, ukum mangkuk i dak tong ngo sin nditak janah botol i pè dak tong ngo sin minak soh lebbè roh nola udan mi tanoh i ibaing JAHOWA.”

¹⁵Nai laus mo daberru mbalu i mengkebasi sinidokken si Elia. Jadi lot mo pangaen persediaen kalak i sitellu, cukup barang piga-piga ari dekkahna.

¹⁶Janah bagè sienggo idokken JAHOWA kin taba si Elia, dak tong mo sin nditak mangkuk i, janah botol i pè dak tong sin minak.

¹⁷Nai enggo kessa barang sadikè dekkahna nola, mberniten mo anak daberru mbalu i. Makin ndekkah makin mpiahna mo sakitna i, dungna matè mo ia.

¹⁸Nai idokken daberru mbalu i mo taba si Elia, “Alè naposo Dèbata, kasa bagidi ibaing kènè bangku. Mada ngo pekiroh ndènè mendahi aku asa gabè ièngèt JAHOWA karina dosangku, asa kennah matè anakku i?”

¹⁹Ialoi si Elia mo, “Taruhken mo anak i mi sèn.” Nai idokong si Elia mo anak i bai inangna nai, janah iembah mo mi pagu mi bilik mi bekkas si Elia menompang i. Ipegalè si Elia mo anak i mi babo pedemmen.

²⁰Nai nggang mo isodipken, “Ialè JAHOWA Dèbatangku, kasa tilakaen ibaing ko daberru mbalu èn?”

²¹Enggo kessa i ipetangkep si Elia mo dirina tellu kali mi babo anak i, ninganna mersodip, “Ialè JAHOWA Dèbatangku pegelluh mo anak èn.”

²²Idengkohken JAHOWA mo sodip si Elia i; kumessah mo anak i gabè balik nggelluh.

²³Nai sampur mo si Elia i bilikna i nai ninganna meneggu anak i, mendahi inangna idokken mo, “O, nangè, èn ngo anak ndènè i enggo mulak nggelluh ia.”

²⁴Ialoi daberru mbalu i mo, “Bagèndari enggo tok aku, naposo Dèbata ngo kènè janah tuhu ngo bai JAHOWA nai sinidokken ndènè.”