Read Batak Dairi 1 Raja-raja 18 Bible Online

1 Raja-raja 18 - Batak Dairi bible

1 Raja-raja 18

¹Enggo kessa barang sadikè dekkah imo tupung petellu tahunken leggo mbellen i, idokken JAHOWA mo taba si Elia, “Lako mo menghadep Raja Ahab, ai oda ndekkah nèngè roh mo udan kubaing.”

²Nai berkat mo si Elia. Tikanna i enggo mparah kalohon lèhè matè kocing i, i Samaria.

³Kumarna i idilo si Ahab mo si Obaja asa roh menghadepsa. (Si Obaja imo èkuten pengurus istana. Sada kalak tuhu-tuhu merkebiaren midah JAHOWA ngo ia.

⁴Tikan ibunuhi si Izebel nabi-nabi JAHOWA, itolong si Obaja èn ngo seratus kalak nabi merkitè memoniken kalak i mi liang — limapuluh kalak ibas sada liang — janah iberrè mangan bak mènum).

⁵Idokken si Ahab mo mbang si Obaja, ita mo siagahi suberri nagerri èn, lako menulusi takal laè barang batang laè. Tah bakunè lot jupa kita dukut-dukut lako pangaen kuda bak kuda bobanta i, asa sada pè ulang pella sipatèken pinakanta i.

⁶Enggo kessa ibagi nagerri sinaing iagahi i, berkat mo kalak i. Si Ahab laus mi sisada, janah si Obaja mi sisada nai.

⁷I tengah ndalan pesimbak mo si Obaja dekket si Elia. Nai mèter isembah si Obaja mo si Elia ninganna ikusoi, “Tuhu ngo ndia kè si Elia?”

⁸“Tuhu ngo, si Elia aku,” nina si Elia mengaloi. “Bagèndari pè lako mo bagahken bai rajamu, i sèn ngo aku.”

⁹Ialoi si Obaja mo, “Kadè pana salahku asa naing ipesakat Kènè aku taba si Ahab asa lako ibunuh?

¹⁰Merkitè gerar JAHOWA singgelluh i Dèbata sinisembah ndènè i, kubagahken mo enggo ipasulak raja i aku menulusi Kènè soh-soh tah mi ladang dikè. Mula idokken penguasa sada nagerri i oda lot i si kènè, mèter idokken si Ahab ngo taba penguasa nagerri i asa isumpahken, tandana oda lot idah kènè i si.

¹¹Keppèken bagèndari idokken Kènè aku laus mendahisa, magahken i sèn Kènè?

¹²Mula laus kessa nahan aku i sèn nai, keppè ibabaken Tendi JAHOWA Kènè mi bekkas siso kubettoh. Nai mula kubagahken taba si Ahab, i sèn Kènè, keppè oda idah kènè i sèn, tentu ibunuh mo aku. Asa ibettoh Kènè, mulai anak-anak nai ngo aku tuhu-tuhu merkebiaren bai JAHOWA.

¹³Tah mada ngo madèng terbertik mendahi Kènè berita, imo tikan ibunuhi si Isebel nabi-nabi JAHOWA, ku- boniken ngo seratus kalak mi liang — lima-limapuluh kalak i sada liang — janah kubaing ngo kalak i mangan bak mènum?

¹⁴Nai kasa nola ipasulak Kènè aku lako magahken taba raja i, i sèn kènè? Bakunè pè kennah ibunuh ngo aku.”

¹⁵Ialoi si Elia mo, “Merkitè JAHOWA Pergegoh Sisotercodi sikuuèi i, kudokken mo ari èn roh aku menghadep raja i.”

¹⁶Nai laus mo si Obaja memagahken i mendahi raja, jadi roh mo si Ahab menjumpai si Elia.

¹⁷Idah si Ahab kessa mo si Elia, idiloken si Ahab mo, “En mo kalakna pengeributi i Israel.”

¹⁸“Oda ngo aku pengeributi,” nina si Elia mengaloi, “tapi Rajai sendiri ngo. Ai Rajai dekket simpangaen Rajai ngo mengeributi, merkitè mersembah taba gana-gana Baal, enggo gabè ilanggar Rajai perèntah JAHOWA.

¹⁹Bagèndari pè perèntahken mo taba karina kalak Israel asa pejumpa dekket aku i Delleng Karmel. Arahken ma mo nabi Baal siempat ratus limapuluh kalak dekket nabi Asyera siempat ratus kalak i, sinibelanjoen permasuari Izebel.”

²⁰Nai ipepulung si Ahab mo karina jelma nterram dekket nabi-nabi Baal i mi delleng Karmel.

²¹Nai ijolmiti si Elia mo jelma nterrem i, janah idokken mo, “Soh ndigan ngo kènè dakdak merdua ukur? Mula JAHOWA ngo Dèbata sembah kènè mo JAHOWA i. Mula Baal ngo Dèbata, sembah kènè mo Baal i.” Sip ngo karina jelma nterrem nisidi.

²²Nai nina si Elia dèng ma, “Ukum nabi JAHOWA, pellin aku nai ngo kessa, tapi nabi Baal lot ngo empat ratus limapuluh kalak i sèn.

²³Bagèndari pè iring kènè mo mi sèn dua lembu tonggal. Dokken kènè mo taba nabi Baal i asa ibuat sada janah isembellih, nai ilapah, kessa i iampèken mi babo sebban. Tapi ulang ilakati api i si. Lembu sisada nai, kubaing ma mo bagi. Kusembellih janah kulapah, nai kubaing ma mo mi babo sebban. En pè oda ma ngo kulakati api i si.

²⁴Nai mersodip mo nabi Baal i mendahi dèbata sembahen kalak i, janah aku pè mersodip ma mo mendahi JAHOWA. Barang siapai mengaloi merkitè apm, ingo Dèbata situhuna.” Karina jelma nterrem i mengaloi dekket sora nggang kalohon, “Oang.”

²⁵Nai nina si Elia mo taba nabi-nabi Baal i, “Kumarna mbuèen kènè pilih kènè mo lebbè lembu i janah kebbasi kènè mo, tapi ulang lakati kènè api i sebban i. Enggo kessa ihantari kènè mersodip mo kènè taba dèbata ndènè i.”

²⁶Nai ipilih kalak i mo sada lembu janah ikebbasi mo. Enggo kessa i, mersodip mo kalak i mulai siceggen nai soh mi cèger ari taba Baal ninganna mersurak-surak. “Aloi mo kami alè Baal.” Ninganna bagidi dak tumataki ngo kalak i kuliling langgaten kalak idi. Tapi laju ngo oda lot mengaloi.

²⁷Enggo kessa cèger ari, imulai si Elia mo mengerèhè-rèhèi kalak i. “Pegang kènè mo sodip ndènè. Otang dèbata ngo ia? Tah bakunè tupung merangan-angan ia, barang pè laus i podi. Barang tah tupung ia i perdalanen. Barang tah bakunè tupung meddem ia, jadi kennah dungoi kènè mo ia.”

²⁸Nai makin ipegang nabi-nabi i mo sorana mersodip. Bagè biasana ibaing kalak i, itoriki kalak i mo dagingna merkitè peddang bak kujur sanga marir darohna.

²⁹Bagi mo kalak i bagè siselluken soh mi ciboen. Tapi kadè poda mengaloi, kadè ma poda giam memperdimata.

³⁰Nai idokken si Elia mo taba jelma nterrem i, “Pejolmit kènè mo mi sèn!” Roh mo kalak i pulung mencingkoi, nai ipelias mo langgaten JAHOWA sienggo merumpak i.

³¹Ibuat mo dua bellas batu, gennep sada batu imo utusen gennep marga pemparen si Jakob sienggo igerari JAHOWA, Israel.

³²Merkitè batu-batu i ipellias si Elia nola mo mengolihi langgaten bekkas mersembah taba JAHOWA. I sikuliling langgaten i, ikurak ngo parik-parik siat sipuluh lima sellup laè.

³³Isusun mo sebban i babo langgaten i, nai ilapah mo lembu sisada nai i janah ibaing mo mi babo sebban i. Nai nina mo, “Domi kènè laè mo empat goci, nai orèken kènè mo laè i mi babo pèlèen bak sebban i.” Enggo kesa ibaing kalak i bagi,

³⁴idokken nola mo, “Baing kè sikali nai,” nai ibaing kalak i nola mo tuhu. “Sikali nai dèng,” nina si Elia, nai ibaing kalak i ma mo tuhu.

³⁵Nai marir mo laè i sikuliling langgaten i, gabè dom laè mo parikna i.

³⁶Enggo kessa dapet tikanna mèlèken pèlèen ciboen, ijolmiti Nabi Elia mo langgaten i, nai mersodip mo ia, “Ialè JAHOWA, Dèbata sinisembah si Abraham, si Isak dekket si Jakob, petandaken mo bagèndari, kono Dèbata kalak Israel janah naposoMu ngo aku. Bagahken ma mo, kono ngo memerèntahken bangku lako mahanken karinana sikubaing i.

³⁷Aloi mo aku alè JAHOWA. Aloi mo aku asa ibettoh karina jelma nterrem èn, kono ngo alè JAHOWA Dèbata situhuna, janah kono ma ngo memaing kalak i mulak taba kono.”

³⁸Nai itenges JAHOWA mo api i langit nai, nai messeng mo ilekkup pèlèen i rebbak dekket sebban i pè, bagi ma bak batu-batu bak tanohna i janah kerri mo bak laè siniparik api i.

³⁹Idah jelma nterrem i kessa mo simasa i, geppah mo kalak i mi tanoh ninganna idokken, “JAHOWA i ngo asa tuhu Dèbata. Tuhu-tuhu JAHOWA i ngo Dèbata.”

⁴⁰Nai idokken si Elia mo, “Tangkup kènè mo nabi-nabi Baal i. Sada kalak pè ulang lot maluah.” Nai itangkup kalak i mo nabi-nabi Baal i, nai iiring si Elia mo kalak i mi Laè Kison, jadi ibunuh mo kalak i karinana i sidi.

⁴¹Enggo kessa i idokken si Elia mo taba Raja Ahab, “Bagèndari selloh mo Rajai laus mangan. Sigedjap nai roh mo udan, ai enggo terdengkoh sora perdengungna.”

⁴²Nai laus mo si Ahab mangan, janah si Elia laus mi babo Delleng Karmel. Kundul mo ia i si tungkuk, abèna mendempak mi tanoh i kellang-kellang tèunna.

⁴³Idokken mbang naposona, “Lako mo mi babo ndelleng, nai tatap mo mi laut.” Nai laus mo naposona i mi babo, kessa i balik nola mo ia janah nina mo, “Oda lot kadè kuidah.” Sanga ngo pitu kali ipasulak si Elia naposona i menangkeng mengencuah lako menatap.

⁴⁴Pepitu kaliken balik naposo i, nina mo, “Kuidah lot hembun kira-kira nasa sinteppap bellangna roh i laut nai.” Nai idokken si Elia mo mbang naposona i, “Lako mo dahi Raja Ahab, dokken mo ipasang kurètana janah mulak mo ia, asa ulang sanga sondat nola kumarna udan.”

⁴⁵Sigejap sambing dèng mèter nggondem mo langit janah angin pè ndor mo janah roh mo udan keppah-kepala. Nai inaiki si Ahab mo kurètana, nai balik mo ia mi Jizreel.

⁴⁶Tikan bagidi ipergegohi JAHOWA mo si Elia. Ilempit mo jubahna mi babo itapelken mo mi abakna nai lojang mo ia mengelebbèi si Ahab i dalan i soh mi pèntu pengkeruhen kuta Jizreel.