Read Batak Dairi 1 Raja-raja 19 Bible Online

1 Raja-raja 19 - Batak Dairi bible

1 Raja-raja 19

¹Nai isukutken Raja Ahab mo taba sinibagesna si Izebel, karina sienggo ibaing si Elia i dekket bakunè carana si Elia memunuh karina nabi Baal.

²Nai itennahken si Izebel mo berita èn taba si Elia, “Baremben tosè tupung bagèen mula oda kubaing bamu bagè pemaingmu taba nabi-nabi Baal i, ihukum bègu sembahen i mo aku janah ibunuh mo aku lotien.”

³Gabè mbiar mo si Elia, nai mperrus mo ia asa ulang ibunuh. Laus mo ia mi Bersyeba i Judea rebbak dekket naposona i. Nai itadingken mo naposona i, i sidi,

⁴nai merdalan nènèh mo ia mi padang gurun sidari merdalan dekkahna, nai mengadi mo ia i terruh sada batang kayu ntemtem. Kundul mo ia i si janah sèkel ukurna asa lotien mo matè. “Oda nèngè tahan aku alè JAHOWA,” nina taba JAHOWA. “Buat mo kessahku. Ai oda ngo sellohen aku daripada empungku.”

⁵Nai galè mo ia i terruh kayu i, gabè terpeddem mo. Sintempu idungkul sada kalak malaèkat mo ia, janah nina mbangsa, “Ndungo ko Elia, mangan mo ko!”

⁶Itengen si Elia mo merkuliling, nai idah mo i gembar takalna roti dekket kiong sin laè. Nai mangan bak mènum mo ia, kessa i iolihi nola mo galè.

⁷Nai roh mo malaèkat JAHOWA pedua kaliken mendungkulsa janah mendokken, “Kèkè mo ko Elia, mangan mo ko, asa tahan ko merdalan ndaoh.”

⁸Kèkè mo si Elia, nai mangan bak mènum mo ia. Nai gabè mergegoh mo ia janah tahan merdalan empatpuluh ari dekkahna mi Delleng Sinai, imo bekkas JAHOWA pacidahken dirina.

⁹Mermalam i liang mo si Elia i sidi. Nai idokken JAHOWA mo mbangsa, “O Elia, merkadè ko i sèn?”

¹⁰Ialoi si Elia mo, “Ialè JAHOWA Dèbata Perkuasa, pellin siperlu bamu sambing ngo kessa kuulaken. Tapi dak ilanggar kalak Israel ngo padanna dekket ko. Irumpakken kalak i ngo langgatenMu janah ibunuh ngo nabi-nabiMu. Pellin aku nai ngo kessa tading, janah bagèndari, naing ibunuh kalak i ngo bang aku pè.”

¹¹“Karuar mo ko i liang i nai,” nina JAHOWA mbangsa, “janah cènder mo ko men- dempakken Aku i babo ndelleng i.” Nai mentas mo JAHOWA i si, janah angin nderras kalohon ngo solo-solona gabè merrigaten mo uruk-uruk janah mpustak mo bak delleng-delleng. Tapi oda dèng ngo ipacidah JAHOWA dirina ibas angin i. Ndong kessa mo angin i, masa nola mo rènur, tapi ipas rènur i pè oda dèng ngo ipacidah JAHOWA dirina.

¹²Nai roh nola mo api, tapi oda dèng ma lot ipas api i JAHOWA. Enggo kessa bagi mèter sip mo, nai terdengkoh mo sora hanjar melamlam.

¹³Idengkoh si Elia kessa mo sora i, ikemkemmi mo abèna dekket jubahna, nai karuar mo ia janah cènder mo ia i babah liang i. Nai terdengkoh mo sora mendokken, “ O Elia merkadè ngo ko i sèn?”

¹⁴Ialoi si Elia mo, “Ialè JAHOWA Dèbata Perkuasa, pellin siperluna bamu sambing ngo kessa kuulaken. Tapi ukum kalak Israel dak ilanggar ngo padan kalak i bamu. Irumpakken kalak i ngo langgatenmu janah ibunuhi ngo nabi-nabiMu. Pellin aku nai ngo kessa tading, janah bagèndari naing ibunuh kalak i ngo bang aku pè.”

¹⁵Nai nina JAHOWA mo, “Balik mo ko mi padang gurun i gembar Damaskus. Nai laus mo ko mi kuta janah minaki mo babontakal si Hasael, mahan pertanda mbangkit gabè raja Siria ia.

¹⁶Bagi ma mo baing taba si Jehu anak si Nimsi asa gabè raja Israel ia, dekket taba si Elisa anak si Safat i Abel-Mehola nai, asa gabè nabi ia mahan gancihmu.

¹⁷Barang isè oda ibunuh si Hazael, kennah ibunuh si Jehu, janah kalak simaluah bai si Jehu nai, kennah ibunuh si Elisa.

¹⁸Tapi kupaluah mo pitu ribu kalak Israel imo kalak sidak setia taba aku janah oda nung sujud mersembah mèjan Baal barang pè menanggohsa.”

¹⁹Nai berkat mo si Elia mendahi si Elisa tupung tikan meninggala lot dua bellas mpasang tinggala i lebbèna, tapi ukum si Elisa membajak dekket tinggala perpodi. Tikan memellus si Elia i gembar si Elisa, mèter italkasi si Elia mo jubahna, nai isangkemken mo mi si Elisa.

²⁰Nai itadingken si Elisa mo karina lembu tinggalana i, ijalangi mo si Elia, ninganna idokken mo, “Paduè mo aku permisi lebbè mendahi pertuangku, enggo kessa i, kuèkutken pè Kènè.” Ialoi si Elia mo, “Lako mo, oda kugerra kono.”

²¹Balik mo si Elisa mi jumana, isèati mo lembuna. Perkayu tinggalana i mo ibaing mahan sebban lako kiroroh jukut lembu i. Nai ipempellaken mo gulè i taba pengu- rupina, nai ipangani kalak i mo. Enggo kessa pul i, berkat mo si Elisa mengèkutken si Elia janah gabè naposona mo ia.