Read Batak Dairi 1 Raja-raja 2 Bible Online

1 Raja-raja 2 - Batak Dairi bible

1 Raja-raja 2

¹Enggo kessa makin ndessingna ajal si Daud, idilo mo si Salomo anakna i, nai idokken mo tennahna perpodi. Nina si Daud mo,

²“Enggo mo dapet tikkingku lako matè. Jadi kennah tok ngo ko mi dirimu janah kennah berani.

³Ulaken mo siniperèntahken JAHOWA Dèbatamu bamu. Uèi mo karina pati-patien dekket perèntahNa sitersurat ibas Bukku si Musa, asa barang mikè pè kono laus dak merhasil ngo ko ipas karina ulaenmu.

⁴Mula iuèi kono JAHOWA, ipahèi mo padanNa imo asa pemparenku memerèntah Israel, asal mo kalak i dak tuhu-tuhu menguèi perèntahNa ipas pusuh peratèenna nai janah setia.

⁵Lot dèng sada nai! Kennah ièngèt ko dèng ngo sinibaing si Joab taba aku imo sinibunuhna i dua kalak lubalang Israel, imo si Abner anak si Ner dekket si Amasa anak si Jeter. Ibunuh ngo kalaki tikan mènak, lako memales bunuh-bunuh sinibaing kalak i tikan geraha. Ibunuh ia ngo kalak i siso mersalah, keppèken bagèndari aku nola gemongken ulah-ulahna i janah gabè aku nola mpersah.

⁶Asa alè pa, kennah balesken mo bana bakunè dok atèmu si sellohna; pellin èn, ulang paduè ia matè biasa.

⁷Tapi ukum taba dukak-dukak daholi si Barzilai kalak Gilead kennah merandal ngo bakinenmu. Kennah tanggungenmu siperlu bai kalak i gennep ari, ai merandal ngo ibaing kalak i taba aku, tikan mperrus aku kemulihken kakamu si Absalom.

⁸Tersèngèt si Simei anak si Gera i kuta Bahurim aur Benjamin nai, lot ma ngo tennahku bamu. I perdalanenku mi Mahanaim, isumpahi si Simei ngo aku tikala i. Tapi nola, tikan roh ia mengalengi aku i Laè Jordan, kusumpahken ngo bana merkitè gerar JAHOWA, mendokken oda kubunuh ia.

⁹Tapi èn mo tennahku bamu; ulang belli ia maluah ipas hukum nai. Kubettoh ngo, kalak bijak ngo kono; jadi tukasi pè enggo tua-tua ia, usahaken mo asa ihukum matè ia.”

¹⁰Nai matè mo si Daud janah ikuburken i Kuta si Daud.

¹¹Sidekkah empatpuluh tahun mo ia gabè raja kalak Israel: pitu tahun mo ia i Hebron janah 33 tahun i Jerusalem.

¹²Nai si Salomo nola mo mbangkit raja sumingkat si Daud bapana i. Ntegguh kalohon ngo kuasa raja Salomo.

¹³Tikan sidari laus mo si Adonia mendahi si Batsyeba. Nai ikusoi si Batsyeba mo si Adonia, “Merandal ma ngo ndia tujuen pekirohmu èn?” “Uè,” dok si Adonia mengaloi.

¹⁴Nai nina dèng ma, “Lot sada bagè sèkel aku mengido bai inang nai.” “Kadè pana?” nina si Batsyeba mengkusoi.

¹⁵Ialoi si Adonia mo, “Ibettoh kono ngo na- ngè, kennah aku kin ngo nemmu mbangkit raja ingo siniharapken bangsa Israel. Tapi keteridahenna balikna nola ngo masa, anggingku ngo mbangkit raja, kumarna bagi ngo hendah JAHOWA.

¹⁶Bagèndari lot sada pengidoenku, janah ulang mo nemmu itulak inang.”

¹⁷“Kadè pana pengidonmi?” nina si Batsyeba mengkusoi. Ialoi si Adonia mo, “Kupido bamu nangè asa uè ko mengidoken taba Raja Salomo asa ijin ia kukabini si Abisag, simerbaju i Sunem i nai. Tok ngo aku oda mak iuèi si Salomo pengidon inang.”

¹⁸“Uè, merandal,” nina si Batsyeba mengaloi. “Kuarihken pè nidokkenmu i taba raja i.”

¹⁹Nai idahi si Batsyeba mo raja i lako me- ngarihken sinipido si Adonia i. Mèter cènder mo raja i menimbaki inangna i janah sujud mersembah, nai kundul nola mo ia i babo tahtana. Nai idokken mo kalak asa ibaing sada kundulen kan kamuhunna kundulen inangna i.

²⁰Enggo kessa kundul, idokken si Batsyeba mo, “Aku mengidoken sada bagè pengidoen kètèk bamu. Harap ngo aku asa uènmu.” “Kadè pana i nangè?” nina si Salomo mengkusoi. “Kuuèi ngo i.”

²¹Ialoi si Batsyeba mo, “Paduè mo kakamu si Adonia mengkabini si Abisag.”

²²“Kasa mo i ipidoken inang bangku?” nina si Salomo mengkuso. “Dos ngo i dekket pengidoen asa kuberèken tahta kerajaen èn tabasa. Otang kakangku ngo ia? Janah ma kansa ngo Imam Abyatar dekket si Joab.”

²³Enggo kessa idokken bagidi, isumpahken si Salomo mo merkitè gerar JAHOWA, “Matè ihukum JAHOWA mo aku mula oda kuhukum matè si Adonia kemulihken pengidoennna i.

²⁴Enggo ipetetah JAHOWA kundulenku i tahta bapangku si Daud. Enggo ipepahè JAHOWA padanna janah enggo iberèken kerajaen èn bangku dekket pemparenku. Kusumpahken mo merkitè gerar JAHOWA singgelluh i, kennah ibagasen sidari èn matè si Adonia.”

²⁵Nai iperèntahken si Salomo mo taba si Benaya, jadi laus mo si Benaya memunuh si Adonia.

²⁶Nai idokken Raja Salomo mo taba Imam Abyatar, “Lako mo laus mi kutamu Anatot. Situhuna patut ngo ko ihukum matè, tapi oda kubunuh ko ari èn, kumarna tikan rebbak dèng kènè dekket bapangku, dekket ngo ko menggongken sagumanna kinidersana. Janah kono ma ngo mengurus Pèti Perpadanen JAHOWA.”

²⁷Nai ipetadi si Salomo mo si Abyatar ipas ulaenna imam nai. Merkitè sinibaing si Salomo i saut mo sinidokken JAHOWA i Silo tersèngèt pemparen Imam Eli.

²⁸Terbertik mo karina simasa i bai si Joab. Gabè buradan mo ia kumarna kan si Adonia ia. Tapi ukum tikala i, oda ngo kan si Absalom ia. Nai lojang mo ia mi Undung-undung JAHOWA, ijèmak mo punca langgaten i.

²⁹Ibagahken mo berita i bai Raja Salomo. Nai ipasulak raja i mo si Benaya memunuh si Joab.

³⁰Laus mo si Benaya mi Undung-undung JAHOWA, idokken mo mbang si Joab, “Idokken raja i, karuar mo kono i sidi nai.” “Oda” nina si Joab mengaloi. “ Isèn mo matè aku.” Balik mo si Benaya memagahken taba raja i.

³¹Mendengkoh i idokken raja i mo, “Lako mo bahanken bagè sinidokkenna i. Bunuh mo ia janah kubur, asa ulang mengenna nè bangku dekket bai karina pinempar bapangku, kumarna ibunuh si Joab kalak siso mersalah.

³²JAHOWA ngo menghukumsa kumarna memunuh ia oda pemettohen bapa. Ai oda mersalah si Abner lubalang Israel dekket si Amasa lubalang kalak Juda. Lotien dèng ngo kalak i daripada si Joab, keppèken ibunuh ngo kalak i.

³³Hukum kemulihken permatè lubalang sidua kalak i, mengenna taba si Joab dekket pinemparna soh mi amman sumendah. Tapi karina pinempar bapangku sigabè raja, dak ngo ipasu-pasu JAHOWA — merlaba mo kalak i.”

³⁴Nai laus mo si Benaya mi Undung-undung JAHOWA, ibunuh mo si Joab i sidi. Nai ikubur mo si Joab i i sapona i ruar kuta.

³⁵Nai ipebangkit raja i mo si Benaya gabè pakalima soridadu singkat si Joab. Si Zadok ipebangkit gabè imam singkat si Abyatar.

³⁶Enggo kessa i idilo raja i mo si Simei, nai idokken mo mbangsa, “Bahan mo bagesmu i Jerusalem èn. Merian i sidi mo ko janah ulang karuar ko i kuta èn nai.

³⁷Mula pang kono karuar janah laus sanga ilausi ko anak laè Kidron, kennah bunuhen ngo ko, janah kono sendiri mo menggongken kesalahen i.”

³⁸“Toko Alè Raja Nami,” nina si Simei me- ngaloi. “Kuuèi ngo perèntah Rajai.” Nai merian i Jerusalem mo si Simei.

³⁹Enggo kessa tellu tahun masa mo bagèen: Mperrus mo hamba si Simei dua kalak mi Gad mendahi Raja Akhis anak si Maakha. Ibagahken kessa mo taba si Simei tersèngèt mi si, ipelanoi

⁴⁰mo kudana, nai laus mo ia mendahi Raja Akhis i Gad lako menulusi hamba sidua kalak i. Jupasa mo kalak i janah iarahken mo balik.

⁴¹Idengkoh si Salomo kessa mo pemaing si Simei i,

⁴²ipasulak mo mengalengi si Simei, idokken mo, “Enggo ngo merpadan ko kubaing merkitè gerar JAHOWA, oda ndorok tadingenkenmu Jerusalem. Enggo ma ngo kupesèngèt kono, mula karuar kono i Jerusalem nai, kennah matè mo ko. Otang enggo ipadanken kono janah tuju ukurmu lako menguèi perèntahku i?

⁴³Tapi kasa ilausken kono padanmu i bagèndari janah ilanggar kono perèntahku?

⁴⁴Ibettoh kono ngo kejahaten meradepken bapangku. Kernana i, ihukum JAHOWA mo ko,

⁴⁵tapi ukum aku ipasu-pasu ngo janah kerajaen bapangku pè ipetegguh ngo soh mi amman sumendah.”

⁴⁶Enggo kessa idokken bagi, iperèntahken raja i mo taba si Benaya memunuh si Simei. Merkuasa kalohon mo si Salomo i kerajaenna i.