Read Batak Dairi 1 Raja-raja 21 Bible Online

1 Raja-raja 21 - Batak Dairi bible

1 Raja-raja 21

¹I gembar istana Raja Ahab i Jizreel lot ngo sinterpuk pekken anggur si Nabot.

²Tikan sidari idokken si Ahab mo mbang si Nabot, “Berrè mo bangku pekken anggurmi, kerna ndessing mi istanangku. Sèkel ngo aku naing menuan rorohen i si. Kuberèken pè bamu pekken anggur termendèen i sidi nai mahan gancihna, barang mula uè kono, kutokor mo dekket harga patut.”

³Ialoi si Nabot mo, “Permanohen bai empung nai ngo pekken anggur èn. Merkitè gerar Dèbata, tuhu-tuhu oda terberèken aku i bai Rajai.”

⁴Ibagasen ukur jut bak melaga kumarna mendengkoh sinidokken si Nabot i mbangsa, balik mo si Ahab janah galè mo ia i peddemenna ninganna ipesiding abèna janah oda uè ia mangan.

⁵Nai idahi si Izebel sinibagesna i mo ia, ikuso mo, “Kasa bagè jut kono? Kasa oda uè kono mangan?”

⁶Ialoi si Ahab mo, “Oda kuakap merasa ibaing si Nabot. Kupido ngo asa idèa pekken anggurna bangku, barang kugancihi dekket pekken anggur sidèban, mula bagi dok atèna, tapi oda uè ia.”

⁷“Otang raja Israel ngo kono?” nina si Izebel mengaloi. “Kèkè mo ko, mangan mo. Pesennang mo ukurmu, aku pè merrèken pekken-pekken anggur i bamu.”

⁸Nai ibaing si Izebel mo surat si Ahab janah icapken cap raja i surat i. Itengesken mo surat i taba pengulu-pengulu dekket simpantasniasè i Jizreel.

⁹Bagèen mo kata surat i, “Tingtingken mo asa puasa ginemgem janah dokken mo kalak i pulung. Tikan pulung i baing mo si Nabot i takal belagen.

¹⁰Ajar-ajari mo dua kalak jahat kundul i hadeppenna janah tukas mo ia menumpahi Dèbata bak raja i. Nai ruah kènè mo ia mi ruar kuta, janah bentiri kènè mo ia dekket batu asa matè.”

¹¹Ibahanken pengulu bak simpantasniasè sini Jizreel mo perèntah si Izebel i.

¹²Itingtingken kalak idi mo asa puasa ginemgem i. Nai idokken mo jelma nterrem i merpulung janah ibaing mo si Nabot kundul kan julu meddem.

¹³Dua kalak perjahat kundul pehadep-hadep dekket si Nabot, janah i lebbè sinterrem i itukas mo ia menumpahi Dèbata bak raja i. Kumarna i iruah mo ia mi ruar kuta, nai ibentiri mo dekket batu, gabè matè.

¹⁴Ibagahken kalak i mo bai si Izebel berita i, enggo saut ibunuh si Nabot i.

¹⁵Enggo kessa soh berita i bai si Izebel mènter nina mo mbang si Ahab, “Enggo matè si Nabot. Bagèndari pè lako mo buat pekken anggur i, kumarna oda uè ia mendèaken i bamu.”

¹⁶Nai mènter laus mo si Ahab memuat pekken anggur i gabè milikna.

¹⁷Nai nina JAHOWA mo taba si Elia, nabi sini Tisbe i nai,

¹⁸“I Pekken anggur si Nabot ngo bagèndari si Ahab raja Samaria i naing menghakai pekken i gabè milikna. Lako mo mi si,

¹⁹janah pesoh tabasa, Aku JAHOWA mendokken bagèen, ‘Enggo memunuh, menghakai dèng. Kumarna i idilati biang ma mo darohmu i bekkas biang mendilati daroh si Nabot.’ ”

²⁰Idah si Ahab kessa mo si Elia, nina mo, “Alè musuhku, ujungna dapet ngo aku ibaing ko.” “Tuhu,” nina si Elia mengaloi. “Kemulihken mbori ko memaing jahat ipenengen JAHOWA,

²¹asa bagèen mo pendokken JAHOWA bamu, ‘Kubaing mo roh olpek ba- mu. Kupatakken mo ko, janah gennep anak laki pinemparmu, tua-tua barang pè poso dèng, kennah kupetumpat.

²²Dukak-dukakmu kennah bagè dukak-dukak Raja Jerobeam anak si Nebat janah bagè dukak-dukak Raja Baesa anak si Ahia, ai kumernaken kono ngo asa mengulaken dosa kalak Israel mendungkul lagangku.’

²³Tersèngèt si Izebel idokken JAHOWA kennah ipangan biang ngo dagingna i tengah kuta Jizreel.

²⁴Barang isè kadè-kadèmu matè i kuta, kennah ipangan biang, janah mula matè i ruar kuta kennah ipangani manuk-manuk.”

²⁵Ai oda nung dèng lot kalak mertekkat mengulaken jahat ipenengennen JAHOWA bagè siniulaken si Ahab i. Karina kejahaten siniulakenna kumernaken ajar laplap si Izebel sinibagesna i ngo.

²⁶Ai ntengam kalohon ngo dosa siniulaken si Ahab i, mersembah ngo ia taba sembahen sinibaing kalak Amori, imo kalak sienggo ipuari JAHOWA i nagerri Kanaan nai tikala ibengketti kalak Israel nagerri i.

²⁷Enggo kessa pul si Elia mengerana, iribaki si Ahab mo pakènna, nai ipakkè nola mo kaèn bagè goni tanda peselsel, nai puasa mo ia. Tikan meddem pè tong kaèn goni ipakkè, janah mula merdalan ia dak ncèrngut ngo abèna terrus.

²⁸Nai idokken JAHOWA mo mbang si Elia,

²⁹“Enggo ma ngo idah kono bakunè cara si Ahab peterruhken dirina i hadeppenKu? Kumarna i oda dèng roh Kubaing olpek i sidekkah nggelluh ia. Lebbè tupung anakna mo asa roh Kubaing olpek i taba dukak-dukakna.”