Read Batak Dairi 1 Raja-raja 3 Bible Online

1 Raja-raja 3 - Batak Dairi bible

1 Raja-raja 3

¹Ibaing si Salomo mo Mesir gabè denganna, merkitè ikabini berru raja Mesir. Ibaing si Salomo mo sinibagesna i merian i kuta si Daud mèma pul ibahan istana raja dekket Bages JAHOWA bak bèntèng i sikuliling kuta Jerusalem.

²Kumarna madèng ipajek Bages JAHOWA tikanna i, mèrap dèng ngo ginemgem i karina mèlèken pèlèenna.

³Ikekelengi si Salomo ngo JAHOWA janah iulaken ngo peddah bapana, tapi tong dèng ngo ia pindah-pindah lako menembellih bak mèlèken pinakan mahan pèlèenna.

⁴Bekkas mersembah sitermurmurna imo Gibeon. Ngkatep ngo i sidi si Salomo mèlèken pèlèenna. Tikan sidari, laus mo ia mi si bagè sienggona.

⁵Bernginkenna i, ipacidah JAHOWA mo dirina tabasa ibas nipina, idokken mo tabasa, “Alè Salomo, pido mo barang kadè ipergeddo atèmu siberèenkenKu bamu.”

⁶Ialoi si Salomo mo, “Alè JAHOWA enggo ituduhken kono magahken ngkelleng kalohon ngo atèmu midah bapangku si Daud naposomi. Selloh ngo ia, bujur janah setia taba kono. Tandana hot kelleng atèmu bana, iberèken kono ngo sada anak bana simemerèntah bagèndari sumingkatsa.

⁷Alè JAHOWA Dèbatangku, ipebangkit kono ngo aku gabè raja sumingkat bapangku, tukasi pè pososu dèng ngo aku nemmu, janah oda kubettoh bakunè carana memerèntah.

⁸Merian i tengah-tengah bangsa sinipilihmu gabè bangsaMu i ngo aku. Bangsa mbellen ngo kalak i oda terbilangen buèna.

⁹Kumarna i alè JAHOWA, berrè mo bangku kepantasen, ai i ngo perlu bangku lako memerèntah bangsaMu èn, asa adil janah asa ndorok kusirang apai mendè janah apai nggodo. Mula oda, bakunè mo kubaing memerèntah ummatMu sinterrem kalohon èn?”

¹⁰Lolo ngo Jahowa mendengkoh pengidoen si Salomo i,

¹¹nina mo mbangsa, “Kumarna kepantasen ngo ipido kono asa adil memerèntah, oda ngo umur nggeddang barang kinibèak lako bamu sambing, barang pè asa ripas karina musuhmu,

¹²èn pè, kuuèi mo pengidoenmi. Kubaing mo ko mpantasen janah pandèen daripada barang isè sambing pè, bang sienggo leppas bak sinaing roh pè.

¹³Siso ipido kono pè Kuberèken mo bamu: Sidekkah nggelluhmu kaya jong ngo ko janah ihormati lebbih daripada raja-raja sidèbanna i barang siapaina pè i.

¹⁴Janah mula bagè bapamu si Daud i ma ngo kono menguèi bangKu janah iulaken kono pati-patinKu, kuberèken mo bamu umur nggeddang.”

¹⁵Terengnget kessa mo si Salomo, satdar mo ia, Dèbata ngo keppè mengerana dekketsa ipas nipina. Nai molih mo ia mi Jerusalem janah cènder mo ia i lebbè Pèti Perpadanen JAHOWA. Ipèlèken mo pèlèen situtungen dekket pèlèen perdamèen. Enggo kessa i merpèsta mo ia lako bai karina pugabèna.

¹⁶Tikan sidari, roh mo dua kalak daberru sibabijalang menghadep Raja Salomo.

¹⁷Mongkam mo sada kalak bai kalak i nai, “Alè Raja Nami, rebbak sada bages ngo aku dekket daberru èn. Isè poda lot sidèban merian rebbak kami. Piga-piga ari sienggo leppas kutubuhken ngo sada dukak daholi. Dua ari nai nola ma itubuhken daberru èn ma mo sada dukak daholi.

¹⁹Tikan sada berngin tikan meradu meddem kami, gabè idendenni daberru èn mo dukakna i gabè matè mo.

²⁰Tengah mberngin sidang meddem aku, kèkè mo ia, icukung mo dukakku i gembarku nai. Ibaing mo dukakku i mi pedemenna, janah dukakna sienggo matè i igancihken mi peddemenku.

²¹Sibarembenkenna kèkè kessa aku naing pepènumken dukakki, kuidah mo enggo matè ia. Enggo kessa kupelingkè-lingkè, keppè oda ngo dukakku i ia.”

²²“Luap!” nina daberru sisada nai. “Singgelluh èn ngo dukakku, simatè i, ngo dukakmu!” “Oda ngo!” nina daberru perlebbè i menga- loi. “Sienggo matè èn ngo dukakmu, singgelluh i ngo dukakku!” Bagidi mo dak mersoali kalak i i hadeppen raja i.

²³Nai nina Raja Salomo mo, “Duana kènè mendokken anak singgelluh i ngo dukakmu, oda ngo simatè i.”

²⁴Enggo kessa idokken raja i bagi, ipasulak mo mengalengi peddang.

²⁵Nai iperèntahken raja i mo, “Pastik kènè mo anak singgelluh i dèng gabè penggel dua, nai berrèken kènè mo bai daberru i tersada mpenggel.”

²⁶Mendengkoh perèntah i, idokken inang situhuna i mo, “Ulang mo alè Raja nami bunuh anak i. Berrèken mo bana.” Idokken pè bagi kumarna ngkelleng atèna ngo midah anakna i. Tapi ukum daberru sisada nai mendokken, “Tuhu ngo i, isèat mo i lotien asa sada poda kami merpatohken.”

²⁷Nai idokken si Salomo mo, “Ulang bunuh kè anak i. Barrèken mo ia bai daberru perlebbè i, ai ia ngo inangna.”

²⁸Idengkoh bangsa Israel kessa mo tersèngèt keputusen si Salomo ipas perkara i, kagum mo kalak i janah hormat tabasa. Ai enggo ntangkas taridah, Dèbata ngo merrèken kepantasen bana memaing adil.