Read Batak Dairi 1 Raja-raja 4 Bible Online

1 Raja-raja 4 - Batak Dairi bible

1 Raja-raja 4

¹Enggo mo gabè raja si Salomo i suberri nagerri Israel. En mo pengulu-pengulu sinipebangkit si Salomo. Imam-imam imo: Si Zadok, si Azarya anak si Zadok, si Abyatar Penurat imo: Si Elihoref dekket si Ahia dukak-dukak si Sisia Bendahara imo: Si Josafat anak si Ahilud Pakalima imo: Si Benaya anak si Joyada Pengabas imo: Si Azarya anak si Natan Penettoi raja imo: Imam Zabud, anak si Natan Ekuten perkebbas istana imo: Si Ahisar Ekuten mandur imo: Si Adoniram anak si Abda

⁷Ipebangkit si Salomo dèng ma ngo duabellas bupati i suberri Israel. Ulaen kalak i imo pepulungken i nagerrina nai belanjo raja dekket pengisi istana. Gennep bupati mergèlèren pepadaken siperlu i sidekkah sibulan ibagasen sitahun.

⁸Siduabellas pertaki i iuluken sada kalak gubèrnur. En mo gerar-gerar bupati-bupati i dekket aur nikuasaenna: Si Ben-Hur: Imo kan delleng aur Efraim si Ben-Deker: I kuta Makas, Saalbim, Bet-Semes, Elon, Bet-Hanan si Ben-Hesed: Kuta Arubot, Sokho, dekket karina aur Hefer si Ben-Abinadab, sinibalè si Tafat berru si Salomo: Karina aur Dor si Baana anak si Ahilud: Kuta Taanakh, Megido, dekket karina aur sinigembar Bet-Sean, ndessing mi kuta Sartan kan selatan kuta Jizreel soh mi kuta Abel-Mehola dekket kuta Jokmeam. Si Ben-Geber: Kuta Ramot i Gilead, kuta-kuta silot i Gilead milik kalak Jair pemparen si Manasye, aur Argob i Basan; karinana ennempuluh kuta mbellen, ipagar gabè kuta gotting, bagi ma igerruk dekket tembaga i pèntu pengkeruhenna si Ahinadab anak si Ido, i aur Mahanaim si Ahimaas, sinibalè si Basmat berru si Salomo: I aur Naptali si Baana anak si Husai: Aur Asyer, kuta Alot si Josafat anak si Paruah: Aur Isasar si Simei anak (...)

²⁰Ukum buè kalak Juda dekket kalak Israel, bagè kersik i biding laut ngo. Cukup ngo pangaen dekket ènumen kalak i janah sennang nggelluhna.

²¹Gennep jabu lot ngo pekken anggurna dekket pekken kayu ara. Sidekkah nggelluh si Salomo, mènak ngo karina ginemgem i suberri Juda dekket Israel mulai i Dan nai soh mi Bersyeba. Kumarna karina raja kan kesunduten Efrat patuh ngo bana, janah karina kerajaen gennep bangsa sikuliling kerajaenna i meralè-alè ngo dekketsa. Tanoh sikan kesunduten Laè Efrat mulai i Tifsah i biding Laè Efrat nai soh mi kesunduten mi kuta Gaza i Palistin soh mi perbalengen Mesir, ikuasai si Salomo ngo karinana. Bangsa-bangsa i nagerri i patuh ngo bana janah menggarar cokè. Keperluen pangaen bai si Salomo gennep ari imo lima ribu sellup topong halus, sipuluh ribu sellup topong kasar, sipuluh lembu kandang, duapuluh lembu jampalen dekket seratus biri-biri. Tambahna dèng ma balkih, rigarung, bèdu dekket manuk-manuk.

²⁶Balapergunggung si Salomo buèna sipuluh dua ribu kalak merkuda dekket empatpuluh ribu kandang kuda penarik kurètana.

²⁷Mergèlèren ngo gennep bupati memerèken bekkel bai Raja Salomo sibulan sibulan, dekket bai karina kalak siterolih i istana nai, asa oda ngo nung kurangen barang kadè pè kalak i.

²⁸Karina pertaki i memerèken gandum dekket nggala pagè mahan pangaen karina kuda si Salomo, bang kuda pasangen bak kuda penarik kurèta. Itaruhken ngo pangaen pinakan i mi kandangna merguru mi perluna.

²⁹Iberèken Dèbata ngo bai si Salomo kepantasen, dekket perbinettohen, bang pengantusien mbages kalohon.

³⁰Ukum i nagerri kan kebincaren dekket i Mesir oda lot jelma pantasen daripadasa.

³¹Tuhu-tuhu ngo ia simpantasna ibas karina jelma. Ilampoi dèng ngo si Etan kalak Ezrahi, si Heman, si Kalkol dekket si Darda dukak-dukak si Mahol. Termurmur ngo gerar si Salomo i nagerri sikuliling karajaenna.

³²Lot ngo tellu ribu umpama dekket lebbih seribu endè ikarang.

³³Sanggup ngo ia mengeranaken tersèngèt matcam bagè kayu dekket suan-suanen mulai kayu ares i Libanon nai soh mi lumut si turah i lingling batu. Iranaken ma ngo tersèngèt binatang-binatang, umpamana manuk-manuk, simenjoror dekket ikan.

³⁴Terbertik ngo taba raja-raja i suberri dunia èn tersèngèt kepantasen si Salomo, gabè iutus kalak i ngo roh mendahisa lako memegèken ranana.